Gedagtes vir elke dag
Of lees almal by Gedagtes vir elke dag
Jakobus som die hart van al die probleme in die wêreld sowel as in die kerk op: “Waarvandaan kom oorloë en vegterye onder julle? Kom hulle nie hiervandaan, van julle welluste wat in julle lede stryd voer nie? Onderwerp julle dan aan God: weerstaan die duiwel en hy sal van julle wegvlug... Reinig die hande.... en suiwer die harte...” (Jak.4:1, 7,8).
QUO VADIS?
Waarheen is ons Afrikaanse kerke op pad?
Ds. A.E van den Berg
"Het ek nou jou vyand geword deur vir jou die waarheid te vertel?" (Gal.4:16)
Inleiding
Die vervolging van gelowiges word nie net van buite die kerk geloods nie, maar ook van binne deur kerke wat Satan ten prooi val. ʼn Sprekende voorbeeld hiervan is die Roomse Kerk wat deur die eeue miljoene mense wat nie met haar afgodiese leer saamgestem het nie, vervolg en doodgemaak het.
Net voor die wederkoms van Jesus gaan die vervolging van gelowiges wêreldwyd toeneem en meer gelowiges as ooit tevore die hoogste prys vir hul geloof betaal. Paulus noem dat hierdie tyd swaar tye gaan wees(2 Tim.3:9).Geloofsvervolging is eie aan die geloofslewe. Jesus sê:
“Hierdie dinge het Ek vir julle gesê, sodat julle nie mag struikel nie” (Joh.16:1).
Die Bybel sê dat die swaar tye nie net aan onaangename gebeure gekenmerk sal word nie, maar ook aan die optrede van ʼn valse kerk en haar kerklui. Dit sal aan ʼn valse leer, valse leraars en skynheilige lidmate wat hoogstens gepoleer en gestryk is, maar nooit in die reinigende bloed van Jesus gewas is nie uitgeken word:
“...mense wat ʼn gedaante van godsaligheid het, maar die krag daarvan verloën het” (2 Tim.3:5).
1. Valse leer
Nadat Suid-Afrika van haar Christengrondwet in 1996 ontslae geraak en ʼn wêreldse een omarm het, het talle hoofstroomkerke ontspoor. Duisende lidmate het die kerk verlaat wat veroorsaak het dat baie leraarsposte verlore gegaan het. Die NG Kerk het bv. tussen 2015-2019 meer as 200 predikantposte verloor.
Ontnugterde gelowiges het besef dat hul kerk nie meer die kerk van vroeër was nie en hul kerkbesoek gestaak of na ander kerkverbande oorgegaan. Blind lojale lidmate het egter hul lidmaatskap voortgesit en die dwalings gekondoneer.
Van die kerke het selfs rewolusionêre bewegings gehelp om hul waens deur die politieke driwwe te trek en daarna die staatkundige mag aan booswigte oorhandig. Die gevolg was dat hulle in die dryfsand van hul eie onverskillige toedoen versink het en onwaardig geword het.
2. Valse leraars
Die valse kerk gaan ook met valse leraars besmet wees; kerklui wat mense mislei om beheer oor hul geld, huwelike en selfs hul gedagtegang te verkry. Hulle gaan hul veral op vrouens toespits; ʼn weerspieëling van Satan se eerste aanslag op die mens in die tuin van Eden.
Valse leraars spits hul voorts ook op mense toe wat gedurig na nuwe waarhede op soek is.Hulle spring weens ʼn behoefte aan die waarheid telkens van die een na die ander kerk maar bly weens gebrekkige Bybelkennis dwaal.
Jesus waarsku:
“Valse leraars staan die waarheid teen en stook opstand teen God en ware leraars op. Hulle lieg maklik en is versot op tekens en wonders. Hulle kom God se opdrag om lig van die wêreld te wees skandelik kort. “Want daar sal valse christusse en valse profete opstaan, en hulle sal groot tekens en wonders doen om, as dit moontlik was, ook die uitverkorenes te mislei. Kyk, Ek het dit vir julle vooruit gesê” (Mt.24:24,25).
Paulus skryf oor die Antichris as volg:
“...hy wie se koms is volgens die werking van die Satan met allerhande kragtige dade en tekens en wonders van die leuen en met allerhande verleiding van ongeregtigheid in die wat verlore gaan, omdat hulle die liefde tot die waarheid nie aangeneem het om gered te word nie” (2 Thess.2:9.10).
Die pad na die ewige dood is met die skedels van duisende valse leraars plavei; mense wat onbekeerd is, booshede bevorder en lidmate verhinder om tot ʼn geloofsoorgawe aan Christus te kom. Hulle verdraai die Skrif om hul dwaalleer te pas en word maklik deur gelowiges geëien en ontmasker:
“Aan hulle vrugte sal julle hulle ken. 'n Mens pluk tog nie druiwe van dorings of vye van distels nie! So dra elke goeie boom goeie vrugte; maar 'n slegte boom dra slegte vrugte” (Mt.7:16,17).
“Maar hulle sal nie verder voortgaan nie, want hulle dwaasheid sal vir almal duidelik wees, soos ook dié van daardie manne geword het” (2 Tim.3:9).
3. Skynheiligheid
Net voor die wederkoms van Jesus sal die valse kerk ook aan ʼn toename aan skynheilige lidmate gekenmerk word. Mense sal vir die skyn kerktoe gaan, geestelike liedere sing en aan kerkverrigtinge deelneem. Met hul sondige lewenswandel kom die goddelose aap egter uit die vrome mou. Hulle is na aan die kerk, maar ver van God af!
In 2 Tim.3 noem Paulus ʼn paar eienskappe waaraan hierdie mense uitgeken sal word. Hulle sal,soos alreeds uit talle kerke se bedieningsmetodiek blyk, liefhebbers van hulself wees. Alles sal om die as van eie ek draai. Mense sal spog-siekwees en meer van hulself dink as wat gesond is.Hulle gedagtes, gesprekke en optredes is egter onheilig. Skandelike hartstogte laat bose genot in hul lewens seëvier.
Valse kerke ontsondig gruwels en spits hul op kanselvermaak in plaas van ware aanbidding toe. Hulle skyn op die oog af ʼn kilometer breed te vloei maar is in werklikheid slegs ʼn sentimeter diep! Wie se lewe en optrede van ʼn lewe sonderJesus getuig, voel hulle in hierdie kerke tuis. Gelowiges moet hul van sulke mens afskei om hulself teen besetting te beskerm. Paulus skryf:
“Moenie dwaal nie; slegte gesprekke bederf goeie sedes” (1 Kor.15:33).
“ ... Keer jou ook van hierdie mense af” (2 Tim.3:5).
4. ʼn Ander gees
Die plaaslike kerklike toneel word deur ʼn geheel ander gees as ooit tevore gekenmerk. Ongelowige akademici glo dat die geloof in Christus ’n byproduk van onderontwikkeling en agterlikheid is wat uiteindelik in ’n onomkeerbare proses van verwêreldliking gaan verdwyn. Namate wetenskaplike kennis toeneem, sal die geloof in ’n Almagtige God deur ’n geloof in die mens se eie vermoë om self ’n hemel op aarde te skep, vervang word.
Ongelukkig laat hoofstroomkerke nie die nodige helder klanke van die Skrif daarop hoor nie en verbreek al hoe meer lidmate hul lidmaatskap weens kerke se gebrek aan profetiese visie. Gevolglik soek al hoe meer mense na geestelike vervulling buite die kerk. Baie van ons jongmense bevind hulle buite die strukture van evangeliese kerke op soek na waterstrome in ʼn godsdienswoestyn.
Talle ander volksgenote hunker na openbare belewenisse van die geloof en vind by massasaamtrekke in oop ruimtes om na ʼn seepkisprediker te luisteraanklank. Kerk word buite die kerk gehou!
5. Blinde lojaliteit
Wie die ontsporing in hul kerke gelate aanvaar, gaan die geloof aan die einde van die tyd verloor. Dis die prys wat vir misplaaste lojaliteit betaal word.Dit lei tot breinspoeling soos wat die Roomse Kerk al eeue lank met lidmate doen en toenemend by hoofstroom Protestantse kerke kop begin uitsteek.
Dwaalleer word onder die dekmantel van byderwetse denke aanvaar. Leuens word as waarhede aangebied en kritiekloos vir die waarheid aanvaar omdat die Bybel glo kragtens nuwe wetenskaplike insigte anders as voorheen verstaan moet word. Verdraaide, halwe waarhede en bespiegelings is selfs erger as blatante leuens wat kundig opgedis word!
Daar is by hoofstroomkerklui ʼn argelose gelatenheid ten opsigte van skreiende onwaarhede. Dis asof ʼn tipe van universele bedwelming op hulle toegesak het. Geen wonder dat al hoe meer mense kerkloos word nie!
Om die uittog te probeer keer, word preke meer verbruikersvriendelik aangebied. Hoe dunner die Skriftuurlike basis van sulke preke, hoe dikker word dit in die glanspapier van vernuwing toegedraai. Verhoogkunstenaars in amptelike gewade vermaak lidmate met kwinkslae en verhoogtoertjies en verdun die liturgietot maklik verteerbare oppervlakkige sêgoed.
Slot
Ons volk se Christelike lewensbeginsels en Westerse beskawingsnorme is in ʼn proses van vervlakking en verval. Kerke behoort dringend ʼn oproep en aansporing tot ʼn hersiening van prioriteite wat op Bybelse waarhede gegrond is te maak. Ongelukkig gebeur dit nie.
Gevolglik is die vraag: Waarheen is ons eens trotse hoofstroomkerke op pad? Na die eenwêreldkerk waaroor die Antichris aan die einde gaan regeer? Een ding moet hulle weet - geen misleiers gaan aan die swaard van God se laaste oordeel ontsnap nie:
“Want die tyd is daar dat die oordeel moet begin by die huis van God. En as dit eers by ons begin, wat sal die einde wees van die wat aan die evangelie van God ongehoorsaam is?... Oor hulle is die oordeel van lankal af nie werkeloos nie, en hulle verderf sluimer nie”” (1 Pet.4:17; 2:2:3).