Gedagtes vir elke dag
Of lees almal by Gedagtes vir elke dag
Jy is gedurig in jou Skepper se lewe; Hy vergeet nooit van jou nie al besef jy dit nie altyd nie. Hy is nooit te besig met al die ander mense se probleme om aan jóu aandag te skenk nie. Nou is die vraag: is Hy gedurig in jóu gedagtes? Of is jý te besig met ander mense om Hom die tyd te gee wat Hom toekom?
KERK EN LEUENS
Ds A.E. van den Berg
“En toe hulle dit hoor, sê hulle: Nee, stellig nie! Maar Hy het hulle aangekyk en gesê: Wat beteken dan hierdie Skrifwoord...?”(Luk.20:16,17).
In die tyd van Jesus was die kerklui skynheilig, vals en eiegeregtig. Ongelukkig het mense eerbied vir hulle gehad het. Hulle was as’t ware die gewete van die volk en immers God se verteenwoordigers op aarde, of hoe? Alles behalwe! Hulle was net op eie belang ingestel en egopoetsers.
Niemand draai God ʼn rat voor die oë nie. Jesus het as God almagtig dwarsdeur hulle kunsmatige godsdienstige vertoon gesien en hul telkens sterk aangespreek: “Wee julle, Skrifgeleerdes en Fariseërs, geveinsdes, want julle is net soos gewitte grafte wat van buite wel fraai lyk, maar van binne vol doodsbene en allerhande onreinheid is. So lyk julle ook van buite vir die mense wel regverdig, maar van binne is julle vol geveinsdheid en ongeregtigheid “ (Mt.23:27,28).
Die kerklui was geensins met God se koninkryk besig nie. Om dit te illustreer, het Jesus ʼn gelykenis vertel van ʼn man wat op reis gegaan en sy wingerd-eiendom aan mense verhuur het. Toe hy op ʼn bestemde tyd huurinvorderaars stuur om die huurgeld te in, is hulle mishandel; die een na die ander. Toe hy later sy eie seun gestuur het, is die seun doodgemaaksodat die huurders beslag op die wingerd beslag kon lê om daarmee te doen wat hulle wou. Dit was ʼn groot fout. Hulle is gewaarsku dat as die eienaar terugkeer, hy hulle sal verdryf en die wingerd aan ander mense toevertrou wat dit reg sou oppas.
Die kerklui het presies geweet dat Jesus van hulle gepraat het. Hulle klok gaan lui! Israel se uurglas was besig om uit te loop en hul dae as uitverkore volk van God verby. Gevolglik het Jesus se woorde hulle geskok: “En toe hulle dit hoor, sê hulle: Nee, stellig nie!” Hulle was verontwaardig dat Jesus sulke dinge voor mense sê. ʼn Mens sê mos nie sulke dinge van kerklui voor mense nie!
Jesus se woorde was ʼn dolksteek in hul hart. Die kerklui wat veronderstel was om onderhouers van God se Wet te wees, was die oortreders daarvan en het vir mense se siele vere gevoel. Hulle was slegs oor hul kerkstatus en aansien in die gemeenskap besorg en sou alles doen om dit te behou; selfs om te lieg. Na die opwekking van Lasarus het hulle net een ding voor oë gehad: “Van dié dag af het hulle toe saam beraadslaag om Hom om die lewe te bring”(Joh.11:53).
Paulus skryf aan die gelowiges in Rome dat almal wat God se Woord minag en hul eie kop volg, aan die pen sal ry: “...hulle wat die waarheid van God verruil het vir die leuen en die skepsel vereer en gedien het bo die Skepper wat geprys moet word tot in ewigheid” (Rom.1:25).
Elkeen wat sy eie kop volg, draai van die enigste Bron van die waarheid af weg en beland op die glybaan van leuens. Dis ʼn bitter gladde en breë pad wat miljoene der miljoene mense al in die verderf laat beland het: “Gaan in deur die nou poort, want breed is die poort en wyd is die pad wat na die verderf lei, en daar is baie wat daardeur ingaan. Want die poort is nou en die pad is smal wat na die lewe lei, en daar is min wat dit vind” (Mt.7:14,15)
Dit wat vandag in die kerk gebeur, is niks nuut nie. Die leuen word geglo en die waarheid word verwerp. En die ergste is dat die kerk, soos in Jesus se tyd, van die voorbokke is. Dwaalleraars trek mense saam met hulle in ʼn geestelike doodspiraal af. Jesus waarsku: “Maar pas op vir die valse profete wat in skaapsklere na julle kom en van binne roofsugtige wolwe is”(Mt.7:16).
Jesus het in Luk 20 met mense gepraat wat die Joodse kerklui geglo, eerbiedig en geldelik onderhou het. Daar gaan ʼn dag kom dat valse kerklui rekenskap van hul leuens sal moet gee. Jesus se woorde het die kerklui geskok want niemand het ooit so ʼn iets van hulle gesê nie; altans nie voor gemeentelede nie!
Daarna het talle mense geestelik besin, ʼn U-draai gemaak en met die Joodse kerk gebreek; selfs van die kerklui: “En die woord van God het toegeneem, en die getal van die dissipels het in Jerusalem baie vermeerder en ʼn groot menigte van priesters het gehoorsaam geword aan die geloof” (Hand.6:7).
Mense wat in God se lig die lig sien, die leuen verwerp en die waarheid leer liefkry, is geseënd. Ongelukkig aanvaar baie kerkgangers steeds die leuen as dit as evangelie aangebied word. Die meeste is onverskoonbaar lui en volg eerder as om vir hulself te dink. En as dinge nie na wense verloop nie, keer hulle ʼn blinde oog daarna en spin hulself in die kokon van valse vrede toe. Dis immers die weg van die minste weerstand.
Dis bitter moeilik om mense wat hulself met kettings van onkunde vasbind, daarvan te bevry omdat hulle nie deur hul verstand nie, maar deur hul gevoelens gelei word. In sommige gevalle weet hulle baie goed wat die waarheid is, maar glo nogtans die leuen omdat die kerk dit in ʼn “polities korrek” vertrapte land soos dié van ons, van hulle verwag.
Mense word so maklik met leuens wat in godsdienstige taal geklee is mislei, veral as dit as nuwe Bybelse insig aangebied en vir die waarheid verkondig word. Hulle spin hulself in ʼn kokon van valse vrede toe.
Daar is net een teenvoeter vir die leuen en dis ʼn liefde vir die waarheid. Niks onderskei mense so van mekaar soos ʼn liefde vir die waarheid nie. Liefde vir die waarheid gaan altyd met stryd en opoffering gepaard. Dink maar aan Jesus se dissipels. Met die uitsondering van Johannes wat die boek Openbaring geskryf het, het almal ʼn martelaarsdood gesterf. “Dit het Ek vir julle gesê, dat julle in My vrede kan hê. In die wêreld sal julle verdrukking hê; maar hou goeie moed, Ek het die wêreld oorwin” (Joh.16:33).
Om die waarheid te verdedig, is egter vir gelowiges ʼn heilige verpligting. Waar dit nie verdedig word nie, neem die leuen oor. Al wat boosheid nodig het om te floreer, is mense wat niks doen om dit teen te staan nie. En dis hier waar ek en jy in die prentjie kom. God roep gelowiges om die waarheid te verdedig.
“Eindelik my broeders, word kragtig in die Here en in die krag van sy sterkte. Trek die volle wapenrusting van God aan, sodat julle staande kan bly teen die liste van die duiwel. Want ons worstelstryd is nie teen vlees en bloed nie, maar teen die owerhede, teen die magte, teen die wêreldheersers van die duisternis van hierdie eeu, teen die bose geeste in die lug. Daarom, neem die volle wapenrusting van God op, sodat julle weerstand kan bied in die dag van onheil...” (Efes.6:10-13)
Die plaaslike kerklike terrein word al hoe donkerder. Kerklui het, soos in die tyd van Jesus, die leuen liefgekry en ontspoor. Ons volk is deur ʼn magtige masjien van politieke en kerklike verraad verpletter en gif vir medisyne laat aansien. Dis egter nie Ikabod met ons volk nie. Daar is ʼnteengif; ʼn liefde en stryd vir die waarheid. Moenie stilbly nie want dis die gom wat ons stukkende volk weer aan mekaar gaan heg!