Gedagtes vir elke dag
Of lees almal by Gedagtes vir elke dag
Voel jy swak teen al die aanslae van die mense en gebeure rondom jou? Gee jouself aan die lewende Christus oor en versterk jouself met sy Heilige Gees. Dan sal jy sy beskerming ondervind teen alles wat jou lewe kan skaad en aftakel. Leef sy vergifnis prakties uit, dan kan niks wat enigiemand sê jou permanent verwond nie. Onthou, liefde en vergiffenis is die geheim om alle wonde te genees.
VREES NIE DIE REUSE IN JOU LEWE
Ds A.E. van den Berg
“Verder sê Dawid: Die Here wat my gered het uit die klou van die leeu en uit die klou van die beer, Hy sal my red uit die hand van hierdie Filistyn. Toe sê Saul vir Dawid: Gaan, en mag die Here met jou wees!” (1 Sam 17:37).
God was baie lief vir Dawid en het hom dikwels in moeilike situasies laat beland om sy geloof te toets. Dawid moes leer om nie op mense staat te maak nie, maar op sy hemelse Vader. In die gelese gedeelte het Dawid letterlik en figuurlik voor 'n reuse probleem te staan gekom wat maklik tot sy dood kon lei. Hy het egter op God vertrou en 'n opsienbarende oorwinning in die dal van die terpentynbome behaal.
Die dag van hierdie oorwinning het vir die jong man soos enige ander dag in sy lewe begin. Hy het skape opgepas. Die dag sou egter baie anders eindig as wat hy ooit kon droom. Sy pa het hom vroeg die oggend met kos vir sy broers op die gevegsfront gestuur waar hulle met Saul teen die Filistyne vir 'n oorlog gereed gemaak het.
Omdat daar destyds geen georganiseerde weermag in Israel was nie, het gewone burgers die koning in tye van oorlog gaan help. So het Dawid by die laer aangekom en gesien dat sy mense bitter bang was, veral vir die spottende drie meter lange Filistynse reus. Niemand het kans gesien om teen Goliat te veg nie, selfs nie Saul nie. Toe Dawid hoor hoe die reus teen God laster, kon hy dit nie daar laat nie. Daarvoor was hy te lief vir sy hemelse Vader.
Die dag het vir hierdie jong gelowige soos enige ander een normaal begin, maar voordat die son sak, sou hy van aangesig tot aangesig met 'n reuse probleem te staan kom. Dis hoe talle probleem-reuse in die lewe ontstaan; hulle gee selde kennis dat hulle kom. Jy staan die oggend op, aanvaar dat dit net nog 'n dag sal wees en eensklaps staan hy voor jou; 'n reus wat jy nie kan vermy of weg wens nie. Van hulle betrap ons soms so onverhoeds dat ons paniekerig raak en nie weet wat om te doen nie.
Ons leef in 'n wêreld van probleem-reuse wat soms vlak voor ons kom staan en ons uitdaag om teen hulle te veg. Om te wen, moet ons weet dat hulle nie vanself verskyn nie, maar dikwels ook deel van God se plan is om ons geloof te toets. Hy wil kyk wat ons optrede in sulke situasies is. Gee ons dit in sy hande en raak rustig of gaan ons van spanning oorboord? Hy wil hê dat ons rustig moet wees. Dieselfde Dawid skryf later: “Al gaan ek ook in 'n dal van doodskaduwee, ek sal geen onheil vrees nie; want U is met my: u stok en u staf dié vertroos my” (Ps.23:4). As ons dit werklik glo, kyk ons anders na die reuse in ons lewens.
Ons verkeer dikwels in dieselfde bootjie as oud-Israel. Toe hulle by Kanaan kom, was hulle bang vir dit wat die toekoms sou oplewer en het 12 verspieders uitgestuur om die land te gaan verken en verslag te doen. Het God hulle dan nie die land belowe nie? Waarom dan nog twyfel?!
Toe 10 van die verspieders met 'n negatiewe verslag terugkeer, het hul moed in hul skoene gesak – die Kanaäniete was reusagtig groot en sou Israel maklik vermorsel. Die kort en die lank van alles was dat hulle God se belofte nie vertrou het nie. As straf het Hy hulle vir 'n verdere 38 jaar in die woestyn laat rondswerf, waar dit normaalweg 'n skamele twee jaar sou neem!
God het uiteraard van die reuse in Kanaan geweet maar hulle nie laat verdwyn sodat Israel sonder teenstand kon inkom nie. Hy het dit juis so beskik dat hulle daar moes wees en Israel hulle in sy Naam die hoof moes bied. In plaas daarvan sny hulle 'n lyn en straf God hulle deur hul in die woestyn te laat rondswerf. Die ironie is dat toe hulle later terugkom, die reuse nog steeds daar was!
Geloofsbeproewings is dwarsdeur die Bybel opgeteken. Drie jong Jode bevind hulle in Babel in 'n brandende vuuroond. Daniël beland in 'n leeukuil. Jesus se dissipels bevind hul op 'n see van storms ens – alles deel van God se plan om hul geloof te toets.
Die reuse in ons lewe is nie toevallige verskynsels nie. God laat dit op 'n bestemde tyd toe om ons geloof in Hom te toets. Die reuse in ons lewe kan ons onderstebo klap of ons geloofsweerstand toon. Gevolglik het ons een van twee keuses – om soos Saul vir die reuse weg te kruip of om hulle soos Dawid met die krag van God tegemoet te gaan. Onthou: Die reuse in die lewe bly nie vir altyd daar nie. Hulle het 'n einde.
Toe Dawid Goliat se lastering teen God hoor, het hy besluit om hom dood te maak. Mense het hom probeer ontmoedig, maar nie van sienswyse laat verander nie. Sy geloof was op die vaste fondamente van vertroue in God gelê en nie in die leër van Saul of die wapenrusting wat hom aangebied is nie. Dawid het Iemand baie sterker as die Filistynse reus by hom gehad en oorwin.
Leer van Dawid 'n paar belangrike lesse hoe om die reuse in jou lewe te beveg, God het jou nie gered om deur 'n boosheid vernietig te word nie. Hy wil jou as oorwinnaar uit die stryd sien tree. Die reuse is deel van God se ewige plan met jou en beproewing maak jou geloof sterk. God los jou nie halfpad nie maar stap die pad enduit met sy kinders. Een van sy wonderlike eienskappe is sy onveranderlikheid. “Jesus Christus is gister en vandag dieselfde en tot in ewigheid” (Hebr.13:8).
Die God wat destyds wonderlik ingegryp het, is vandag nog dieselfde God. Hy stel nooit teleur nie. Wie op Hom vertrou, wen altyd. Wie egter op mense vertrou, kom dikwels sleg daarvan af. Waarop vertrou jy as daar reuse op jou lewenspad opduik? Jou eie vermoë of mense-hulp? Beide kan val, maar nie die vertroue op God nie.
Om die reuse in die lewe te oorwin, vereis ook sterk optrede van jou. Dawid het reguit op Goliat afgestap, sy geloof in God in die openbaar verklaar en hom met 'n klippie neergevel. Wat 'n oomblik in hierdie gelowige se lewe! Hy het dit wat hy geglo het, sien gebeur. God maak van hulle wat in Hom glo, oorwinnaars. Al wat ons moet doen, is om soos Dawid 100% op God te vertrou en die reuse van die lewe tegemoet te gaan. Dawid skryf later: “Want met U loop ek 'n bende storm, en met my God spring ek oor 'n muur” (Ps.18:30).
Waarom het Dawid vyf klippies gehad terwyl net een genoeg was? Miskien kon hy met die eerste een gemis het dan was daar genoeg oor om mee aan te hou totdat hy suksesvol was. So moet ons ook soms aanhou slinger totdat die reus in ons lewe verslaan is.
Hy sê vir Josua wat Israel na Moses se dood moes lei: “Wees sterk en vol moed, wees nie bevrees of verskrik nie; want die Here jou God is met jou, oral waar jy heengaan” (Jos 1:9). God beloof aan ons 'n oorwinning deur sy Seun wat selfs die dood oorwin het. “Ek is tot alles in staat deur Christus wat my krag gee” (Fil.4:13).
Wat gaan ons hierdie jaar met die reuse wat in ons lewe mag opduik, maak? Ons het een van twee keuses; ons kan in ons tente gaan wegkruip totdat hulle hopelik verdwyn. Dit gaan nie gaan gebeur nie. Goliat het ook bly staan en nie verdwyn soos wat die Israeliete gehoop het nie, maar al hoe nader gekom.
Jou reus sal nie weggaan nie, maar ook nader kom, dis nou te sê as jy niks gaan doen nie. Die tweede keuse is om sterk na vore te kom en om die reus in jou lewe met die krag van Jesus Christus te oorwin – 'n geestelike oorwinnaarslewe te geniet. Besluit jy maar self!