Gedagtes vir elke dag
Of lees almal by Gedagtes vir elke dag
Enigiemand wat meer oor die lewe te wete wil kom kan maar net die Bybel bestudeer; dit is 'n Boek oor die lewe: oor konings, boere, huisvroue, siekes, soldate, diensknegte, elke mens is in die Bybel; ook jou en my lewe word direk daarin weerspieël. Maar as jy nooit jou Bybel bestudeer nie kan jy nie verwag om lewenskennis te hê nie.
GOD IS OP SY TROON!
Ds A.E. van den Berg
“In die eerste jaar van Bélsasar, die koning van Babel, het Daniël 'n droomgesig gesien en gesigte van sy hoof op sy bed. Toe het hy die. droom opgeskrywe, die hoofsaak vertel” (Dan 7:1).
Jare gelede hou ek en my gesin vakansie aan die Natalse noordkus. Een oggend breek ligte branders rondom ons toe my een dogtertjie 'n groter brander sien en bang word. Ek het haar opgetel en verseker dat niks met haar sou gebeur nie. Vir haar was die brander 'n gevaar maar nie vir my nie. Sy was veilig in my arms. Die lewe kan soms soos groot branders vrees aanjaag want ons leef in 'n gebroke wêreld met oorloë, siektes en natuurlike rampe waaroor ons geen beheer het nie. As ons bang raak vir dinge om ons, moet ons nie vergeet dat God sy kinders in sy arms hou nie.
God wys vir Daniël in 'n paar visioene wat eintlik agter booshede sit en doen dit om die mense wat uit die ballingskap na Jerusalem teruggekeer het te bemoedig. Al lyk die lewe erg, is God altyd in beheer van alles:“ As die fondamente omgegooi word, wat kan die regverdige doen? Die Here is in sy heilige paleis; die troon van die Here is in die hemel; sy oë sien, sy ooglede toets die mensekinders” (Ps.11:3,4). Waarom is ons dan bang vir booshede as Hy in beheer is?
Die eerste verse van Daniël 7 begin met vier vreesaanjaende gedrogte wat uit die see opkom. Een lyk soos 'n leeu waarvan die vlerke afgeskeur is en soos 'n mens regop opstaan. Die volgende een lyk soos 'n beer met vleis in sy bek. Daarna 'n luiperd met vier koppe en vier vlerke. Hulle verteenwoordig bose wêreld-magte wat mense onderdruk en deur Satan begeester is; konings en regerings.
Daniël se profesie gaan meer oor 'n boodskap as die Sataniese magte se optredes. Die boodskap is dat die wêreld deur booswigte regeer word om mense te vertrap en te vernietig. Die slagoffers is magteloos om die booswigte met eie krag te stop. Hulle kan ook nie op die samewerking van minder skadelike magte hoop nie; slegs op Iemand groter as die gesamentlike bose magte.
Daniël se boodskap aan sy lesers en aan ons is om nie bang vir die toekoms te wees nie. Daar is hoop te midde van al die lelike dinge. Die wêreld is boos en golwe van wanhoop slaan gedurig om ons. Gelowiges se hoop lê egter nie in hierdie wêreld nie, maar in 'n koninkryk met 'n Koning wat ons nou nie kan sien nie maar wel daar is.
Dan verskuif die toneel na 'n troonkamer en Een wat daarop sit. Dis nie 'n nuwe persoon nie. In ons wêreld word 'n ou koning met 'n nuwe een vervang. Nie hier nie. Hy wat op hierdie troon sit, is van ewigheid daar: Ek het bly kyk totdat trone reggesit is en 'n Oue van dae gaan sit het; sy kleed was wit soos sneeu en die hare van sy hoof soos skoon wol; sy troon was vuurvlamme, die wiele daarvan 'n brandende vuur....duisend maal duisende het Hom gedien, en tienduisend maal tienduisende het voor Hom gestaan; die gereg het gaan sit, en die boeke is geopen” (:9,10)..
Hierdie visioen moes vir die Joodse krygsgevangenes moed gee en kennis neem dat daar 'n oppermagtige, onsigbare troon met hul ware Koning daarop is. Hy sal die wêreldleiers oordeel. Die visioen moes hulle gerus stel dat God hulle nie verlaat het nie. Al was hulle in ballingskap, was Hy steeds op sy troon en magtiger as hul vyand,
Hierdie Koning word in Dan.7 as volstrekte suiwerheid en geregtigheid voorgestel. Die kleur van sy kleed en hare is metafories daarvan. Vuur verteenwoordig sy krag en geregtigheid met 'n ontelbare skare wat Hom dien. Daniël kon die getal nie peil nie. Daarom herhaal hy die getal 1000 menigmaal.
Vir die mismoedige krygsgevangenes moes hierdie visioen hoop bring. Ja, wêreldse dinge maak ons soms bang, nogtans glo ons dat God 'n einde aan bose regerings gaan maak. Daar is eindelose hoop in die Koning wat in die hemel op sy troon sit. Ons hoop lê nie in 'n aardse koninkryk wat tot ons redding kan kom nie, maar in 'n Koning wat vir ewig oor sy ganse skepping heers.
Wie is die koning? Dis Jesus en die rede waarom Hy dikwels na Homself as die Seun van die Mens verwys het. Wanneer Hy dit sê, verwys Hy na Dan.7 en die allerheersende Koning wie se koninkryk geen einde het nie. Alle nasies en volke sal Hom eer.
Hierdie belofte is al in die tyd van die Babiloniese Ballingskap gemaak. God praat deur die profeet Jesaja met Juda: ” Ek sweer by Myself; geregtigheid gaan uit my mond, 'n woord wat nie herroep word nie: dat voor My elke knie sal neerbuig, by My elke tong sal sweer.” (Jes.45:23). Later herhaal Paulus dit in sy brief aan die Romeine: “Want daar is geskrywe: So waaragtig as Ek leef, sê die Here, voor My sal elke knie buig, en elke tong sal God bely” (14:11).
Dan.7 herinner gelowiges aan die bose geeste en hul handlangers om hulle wat lyk asof hulle wen, maar in werklikheid aan die verloorkant is. Hul optrede verontrus baie volksgenote. Onderdrukking en onreg-wetgewing is aan die orde van die dag. Daarbenewens word Christene in al hoe meer lande vervolg en gedood. Boosheid en gruwels neem toe en bied al hoe minder vryheid om Jesus te aanbid. Alles word net donker!.
Met Daniël se visioene verbreek twee waarhede hierdie donkerte. Eerstens dat die vyand, al vermorsel hy ook God se mense, dit nie vir altyd is nie. Bose magte het in werklikheid geen mag in hulself nie. God laat hulle net vir 'n tydjie toe. Tweedens sal God se raad byeenkom en 'n einde aan die vervolging teen gelowiges maak waarna hulle die ewige koninkryk vir ewig laat beërwe. Wat 'n troos! Gelowiges moet met verlange na hierdie dag uitsien!
Die visioen van Dan.7 laat gelowiges verby alle bose regerings kyk en opnuut besef dat God in beheer is. Dit maak nie saak hoe moeilik die lewe is nie en dat booshede skynbaar seëvier nie, God troon bo almal uit. Booswigte se dag kom voorwaar en sal gelowiges die ewige heerlikheid by Jesus geniet. En dis die reine waarheid en nie 'n kansel-storie nie.
Hierdie hoop is vir gelowiges soos 'n lig in die donkerste nag en 'n kombers tydens die koudste nag. Vertrou dus op God as die golwe van die lewe oor jou slaan. Hy sit op die troon en gaan die koninkryke van die goddelose skouspelagtig beëindig. Paulus skryf: “...en dan sal die ongeregtige geopenbaar word, hy wat die Here met die asem van sy mond sal verdelg en deur die verskyning van sy wederkoms tot niet sal maak” (2 Thess 2:8).
Moenie in hierdie bose wêreld moed verloor nie. Laat jou geloof van kinderlike afhanklikheid van die Vader getuig. Al lyk die branders ook hoe groot, sorg dat jy in Jesus se arms is. Hy sê kort voor sy dood vir sy dissipels:“Dit het Ek vir julle gesê, dat julle in My vrede kan hê. In die wêreld sal julle verdrukking hê; maar hou goeie moed, Ek het die wêreld oorwin” (Joh.16:33). Hulle moes die Onsigbare vertrou om die skynbaar onmoontlike te verwag.
Moet dus nie te veel na die hede kyk nie anders word die lewe te eentonig. Moet ook nie te veel na die verlede kyk nie, anders word jy dalk neerslagtig. Moet ook nie te veel na die toekoms kyk nie anders word jy dalk bang. Kyk liewers op en hou jou oog op 'n onwankelbare God. En as die pad voor jou toe lyk, stap dan in die geloof en nie op sig nie. Laat jou geloof altyd groter as jou vrese wees.