Gedagtes vir elke dag
Of lees almal by Gedagtes vir elke dag
Mense verrig geen boosheid so gelate as wanneer dit uit godsdienstige oortuiging gedoen word nie. Kyk maar net na die afwaartse spiraal die afgelope 20 jaar omdat kerke gehelp het om van die Christen grondwet aan die suidpunt van Afrika ontslae te raak!
ADINA SE BRIEWE (3)
Dr JP Botha
Lees reeks by Adina se briewe
By die Jordaan
Adina kon nie wag totdat sy van haar vader in Alexandrië 'n antwoord op haar eerste brief aan hom ontvang het nie, want sy het intussen in die heilige land nog meer dinge beleef waaroor sy graag vir hom wou skryf:
Liewe Vader
Ek is nou al 'n paar maande hier in die goeie Jerusalem en my verblyf by oom Simon, tant Hanna en Salóme word elke dag aangenamer en interessanter. Ek moet voor u bely dat my kennis van Hebreeus nog nie veel verbeter het nie, want ek hoor dit maar net af en toe wanneer ons by die tempel kom en die skrifgeleerdes dit praat. Ek ken Aramees al amper beter, want dit is oom Simon hulle se huistaal.
Tant Hanna het vir my 'n liefdevolle moeder geword. Sedert Mamma se dood agt jaar gelede, het ek haar tere sorg baie gemis. U liefde en opvoeding aan my was wonderlik, maar daar het maar altyd 'n leemte gebly wat net 'n moeder kan vul. Tant Hanna is 'n baie deugsame vrou. By al haar talente doen sy ook nog pragtige weefwerk. My niggie Salóme kan dit feitlik net so goed doen en ek self vorder al baie goed onder hulle toesig met my eie weefpogings. As ek dit een van die dae goed kan doen, gaan ek vir u 'n mooi kledingstuk weef, dalk nog 'n mantel, wat u Sondae in die sinagoge kan dra. Mag Jehova my seën en in staat stel om dit nog vir u te doen.
En dan, liewe Vader, wil ek graag vir u vertel van 'n merkwaardige gebeurtenis wat ons verlede week beleef het. Oom Simon was die vorige week 'n dag lank na sy plaas toe. Sy voorman en 'n paar van die werkers was 'n dag of wat vantevore by 'n vlak drif in die Jordaan, 'n entjie noord van die Dooie See. Daar was 'n hele aantal mense saamgepak langs die waterkant. Hulle het na 'n man geluister wat halflyf in die water gestaan het. Hy het vir hulle gepreek en gewaarsku om nie meer sonde te doen nie en hulle uitgenooi om in die water af te klim en deur hom gedoop te word.
Oom Simon wou graag gaan kyk en gaan hoor wat daar aangaan en het ons ander drie genooi om saam met hom te ry. Ons is vroeg die volgende môre hier weg en het die plek nog in die voormiddag bereik.
Daar het baie mense aan die kant van die vlak water rondgestaan. Sommige van hulle het in die skadu's van die lommerryke bome gesit. Almal het aandagtig geluister na die man in die water. Hy het met 'n luide stem wat teen die rivierwalle ge-eggo het, ons almal aangespreek en geroep:
"Bekeer julle, want die koninkryk van God het naby gekom! Ek is die stem van die een wat roep in die woestyn. Berei die weg van die Here en maak sy paaie reguit. Elke dal moet opgevul word en elke berg en heuwel wegsak. Die krom paaie sal 'n reguit pad word en die skurwe plekke gelyk gemaak word."
Toe sien hy dat 'n aantal Fariseërs en Sadduseërs tussen die mense rondbeweeg en gesprekke met hulle voer. Hy draai hom na hulle toe en roep uit:
"Addergeslag, wie het vir julle slange gewaarsku om te vlug vir die toorn van God wat aan die kom is? As julle julle wil bekeer, moet julle vrugte dra wat by die bekering pas. Moenie daarop roem dat julle Abraham vir 'n vader het nie. God kan vir Hom maklik kinders van Abraham verwek uit hierdie klippe. Die byl lê al gereed om julle bome wat geen goeie vrugte dra nie, uit te kap en in die vuur te gooi!"
Pappa, ons het verbaas gestaan daar langs die waterkant. Ek het nog gewonder waarom hy ons geëerde volksleiers, wat die wet van God so goed ken en die volk gereeld voorlig hoe om al die fynere punte daarvan getrou na te kom, so veroordeel en beledig, toe hy weer uitroep:
"Ek doop julle wel met water as julle jul bekeer en julle sondes laat staan, maar daar kom Iemand ná my wat my meerdere is. Ek is nie eers werd genoeg om sy skoene vir Hom aan te trek nie. Hy sal julle doop met die Heilige Gees en met vuur. Hy sal van sy dorsvloer af al die koring in sy skuur versamel, maar die kaf sal Hy met 'n onuitbluslike vuur verbrand."
Ek het gestaan en dink wat dit alles tog sou beteken. Hy het met groot nadruk op elke woord, amper driftig met ons gepraat. 'n Man wat langs oom Simon gestaan het, het vir hom gefluister dat dit Johannes die Doper, 'n profeet van God is.
Almal se oë het meteens van die Doper af weggedraai na die oorkant van die rivier. 'n Aanvallige Jongman het tussen die bome deur nadergestap, sy wit onderkleed opgebind en deur die vlak watertjies tot by die Doper gekom.
Dis snaaks Pappa, almal het skielik stil geword. Die Doper het Hom met groot oë aangestaar onderwyl Hy naderkom. Toe hoor ons hoe die Doper in 'n fluisterstem vir Hom sê: "Nee, ek kan U nie doop nie. Waarom kom U na my toe? Ek moet eintlik deur U gedoop word." Ons het almal die welluidende antwoord van die Jongman aan Johannes die Doper gehoor: "Ja Johannes, maar jy moet My doop, want dit is die wil van God dat dit moet gebeur."
Pappa, ons het daardie middag wonderlike dinge beleef. Ek hoop u sal my glo as ek dit vir u vertel. Toe die Jongman uit die water uitkom, fladder daar 'n lieflike wit duif uit die bloute op Hom neer en ons hoor 'n duidelike stem wat sê: "Dit is my geliefde Seun, in Wie Ek 'n welbehae het."
U sal seker begryp dat ons almal spraakloos en half bevrees daar gestaan en kyk het hoe hierdie Jongman weer met dieselfde paadjie as dié waarmee Hy gekom het, terugstap en tussen die bome verdwyn. 'n Klein rukkie later het die Doper ook uit die water gekom en 'n harige mantel aangetrek en dit met 'n leergordel om sy lyf vasgebind en met dieselfde pad weggestap. Hulle sê hy bly soos 'n kluisenaar in die woestyn en hy leef van sprinkane en heuning. Wie sou hy werklik wees en wie is daardie besonder aantreklike Jongman wat, nadat Johannes Hom gedoop het, ook in die woestyn in weggestap het? Ek het daardie dag wonderlike dinge gesien, maar ek het nie geweet dat voor ek daardie aand sou gaan slaap, ek van nog wonderliker dinge sou hoor nie.
Ons is vroeg van die Jordaan af weg, want oom Simon wou graag by ou vriende op Betanië aangaan om 'n rukkie te kuier. Hulle het my al so baie van Lasarus en sy susters, Maria en Martha vertel, dat ek daarna uitgesien het om hulle te ontmoet. Vader, dis die moeite werd om sulke liewe mense te leer ken. Al drie van hulle se diepe godsvrug en opregte vroomheid, trek 'n mens onwillekeurig aan.
Hulle was verras om te hoor dat ons van die Jordaan af kom, waar Johannes die Doper optree. Ons ontdek toe dat hulle baie van hom weet en ook van die Jongman, wat hulle Jesus noem. Maria het vir ons vertel dat Johannes die Doper se geboorte deur die engel Gabriël aangekondig is. Sy ouers, die priester Sagaria en Elisabet, moes hom as 'n nasireër vir God grootmaak. Die engel het gesê hy gaan in die gees en die krag van Elia met die volk praat, om hulle van hul verkeerde paaie af terug te bring. Hy moet ook die pad oopmaak vir die koms van die Messias, wat op hande is.
Maria, wat dit alles vir ons gesit en vertel het, sê toe: "Daardie Jongman wat Johannes vandag by die Jordaan gedoop het, se naam is Jesus. Die Here het groot genade aan julle vier bewys deur julle ooggetuies te laat wees van die doop van die heilige Messias. Die engel Gabriël het ook sy geboorte aangekondig vir sy moeder Maria en sy vader Josef. Dit is Hy wat ons volk weer volkome gaan verlos van alle dwingelandy wat ons teister."
Ek was uitermate verbaas en kon 'n rukkie lank nie 'n enkele woord uitkry nie, maar daar het 'n jubelende tinteling deur my gemoed gevloei toe ek begin besef dat ek bo baie ander bevoorreg was om die Verlosser van ons volk, oor wie die profete soveel jare lank geskryf het, met my eie twee oë kon aanskou.
Glo Vader ook dat Hy die Messias is? Ek sien daarna uit dat u aan my moet skryf wat die skrifte presies oor Hom sê, want ek kon nog nie al die boekrolle deurgaan voordat ek van u af weg is nie.
Ek verlang al baie na u en na Alexandrië, maar met u goedkeuring wil ek graag nog 'n onbepaalde tyd hier by oom Simon en tant Hanna hulle bly, want ek is seker dat hier in ons heilige land en veral in Jerusalem, binnekort merkwaardige gebeurtenisse gaan plaasvind. God is reeds besig om sy verdrukte volk te besoek.
Van u dogter Adina.