Gedagtes vir elke dag
Of lees almal by Gedagtes vir elke dag
As jy soggens wakker word, kry jou moed om die dag aan te pak met hierdie woorde van Jesus: "Ek is die lewe! Ek is die opstanding!" Hierdie woorde is die redding uit die doodsverstarring waarin tallose mense hulle lewe slyt.
VOLKSVERRAAD (3)
Koos Bester
Lees reeks by Volksverraad
DIE IDASA-KOMPLOT
In 1997 steier die Konserwatiewe Party oor onthullings van die sogenaamde "Conservative Dialogue Programme" (CDP) van die Amerikaans-befondste 'Institude for a Democratic Alternative for South Africa. (Idasa).
Idasa se frontmense in Suid-Afrika was die gewese Progressiewe Federale Partyleier en onderleier, onderskeidelik Frederick van Zyl Slabbert en Alex Boraine. Boraine sou sy swanesang in Suid-Afrika se ver-linkse politiek sing as lid van die berugte Tutu-kommissie. Idasa was in sy aanvangsjare en kort nadat Van Zyl Slabbert en Boraine die parlementêre politiek verlaat het sodat hulle die toneel buite die parlement in gereedheid kon bring vir die ANC en die SAKP, oënskynlik selfs te dik vir 'n daalder vir Nasionale Perskoerante.
In Februarie 1992 was Idasa gereed om pens en pootjies by die KP in die bed te klim. Die Trojaanse perde was die tweelingbroers Constand en Abraham Viljoen.
Die KP en die KP-leier dr Ferdi Hartzenberg het net hulself te blameer dat hulle hul geledere so oopgestel het vir Idasa se CDP. Ek glo hul gretigheid om met 'n generaal of generaals in hul geledere te spog, het tot dié haglikheid aanleiding gegee.
Prof Viljoen was 'n bekende linkse en was in algemene verkiesings 'n kandidaat vir die PFP. Ek het hom dikwels voor en na die referendum van 1992 in die KP se parlementêre wandelgange gesien waar hy in gesprek met KP-Volksraadslede was. Ek het hom selfs een keer, tydens 'n KP-konferensie, op die grond, byna soos Paulus aan die voete van Gamaliël, sien sit.
Die HNP-leier, mnr Jaap Marais, wei in Die Afrikaner van 9 – 15 Mei 1997 verder uit oor gebeure rondom die Idasa-komplot:
"...Die dokumente uit IDASA-lêers toon dat die koördineerder van die CDP prof Abraham Viljoen, reeds in Februarie 1992 met dr Hartzenberg gesprek gevoer het.
"In Maart 1992 skryf prof Viljoen: 'For the time being, the centre of activety... remains the CP caucus in Cape Town.'
"En natuurlik, waar die KP-koukus so geïdentifiseer word in die aktiwiteite van die CDP, sal die KP-leiers – Treurnicht en Hartzenberg – die belangrike teikens gewees het. Dit word deur prof Viljoen in dieselfde verslag van Maart 1992 bevestig. 'A lot of hard work and bargaining'...
"Belangwekkende aspekte daarvan het ter sprake gekom na aanleiding van 'n berig in Die Afrikaner waarteen dr Hartzenberg se prokureur, dr PJ Kotzé, beswaar gemaak het. Hy het onder andere geskryf: 'Ons kliënt ontken die bewerings wat u aangaande hom maak en in besonder dat hy enige verbintenis met IDASA het of gehad het...'
"Daarop het die redakteur van Die Afrikaner in 'n brief aan dr Kotzé aan die hand van dokumente uit IDASA se leggers 'n relaas gegee van die CDP se werksaamhede en skakeling met die KP en die AVF. Ten slotte het die redakteur in sy brief aan dr Kotzé verklaar: 'In die lig van die hierbogemelde feite en beredenering kan daar nie aanvaar word dat u kliënt geen verbintenis met IDASA gehad het nie'..."
Mnr Marais skryf in die artikel dat dr Kotzé sy ontevredenheid met die verduideliking in nog 'n brief te kenne gegee het, maar dat sy aanklag teen dr Hartzenberg "in nog skerper terme herhaal is". Hy sou in 'n brief aan dr Hartzenberg verklaar het:
"Met die inligting oor die CDP wat nou beskikbaar gekom het is dit duidelik dat u regstreeks en onregstreeks meegedoen het aan 'n sameswering en 'n reeks politieke misleidings wat kennelik beplan en aangestig is deur die De Klerk-regering se Intelligensiedienste, 'n Afrikaner-vyandige instansie soos IDASA, met die samewerking van die ANC-SAKP, om die Afrikaner sonder verset van hul vryheid en vaderland afstand te laat doen en onderworpenheid aan 'n voormalige terroriste-organisasie te aanvaar.
"Selfs hierdie uiters ernstige aanklagte het dr Hartzenberg nie beweeg om byvoorbeeld met 'n geregtelike aksie soos in die geval van die boek Volksverraad te dreig nie...
"In dieselfde brief het ek ook aan dr Hartzenberg geskryf: 'Uit hierdie verraad wat hoofsaaklik gewentel het rondom u self, Constand Viljoen, Tienie Groenewald, Dries Bruwer en Piet Gous, is die eerlose en versetlose onderwerping van die Afrikanervolk aan 'n kommunisties-beheerde Swart regering bewerkstellig.'
"Ook hierdie krasse aanklag kon dr Hartzenberg nie beweeg om so 'n klad van sy naam te verwyder nie.
"Naas hierdie aspek van dié saak is daar die verwante kant van die ander KP's en LP's wat in 1992 en 1993 by die IDASA-komplot betrokke was, soos Dries Bruwer, Piet Gous, Pieter Mulder, Tom Langley, en selfs die KP-onderleier, dr Willie Snyman."
In 'n brief aan dr Hartzenberg sou mnr Marais na bewering só geskryf het: "In 'n ongedateerde verslag (in Afrikaans) wat waarskynlik deur Abraham Viljoen opgestel is vir 'n Afrikaanse instansie... word met betrekking tot die AVF/ANC/SAKP-onderhandelings verklaar:
"Thabo Mbeki het by Mandela oorgeneem, en sy span het bestaan uit die vredemaker Jacob Zuma, Joe Modise, Joe Nhlankhla, Tomazile Botha en Penuel Maduna (drie van die vyf kommuniste)... Iniseel het die Volksfront bestaan uit drie generaals. En die strategiese besprekings het in streng geheimhouding plaasgevind. Later het die landbouleiers bygekom. Die groep het bestaan uit die Muller-broers, Pieter en Corné; Tom Langley; die kaarttekenaar Koos Reynecke; die boere van die Transvaalse en Vrystaatse landbou-unies; Piet Gous en Dries Bruwer; en teen die einde, dr Willie Snyman."
Mnr Marais skryf hy verwerp dr Hartzenberg se ontkenning in die voormalige KP-lyfblad, Patriot, dat die KP by die CDP betrokke was. Dr Hartzenberg sou gesê het dit is "net sulke snert soos Piet Pretorius se boek".