Gedagtes vir elke dag
Of lees almal by Gedagtes vir elke dag
Die voordeel van pyn en lyding is dat dit ons leer om meegevoel met ander lydendes te hê. Wie al pyn en lyding ervaar het, kan nooit ongevoelig teenoor ander se pyn en lyding staan nie.
VOLKSVERRAAD (4)
Koos Bester
Lees reeks by Volksverraad
AFRIKANER-POLITIEK "STINK"
"Op die graf van De Klerk moet 'n goeie vaderlander die volgende grafskrif aanbring: 'Hier lê De Klerk. Hy het regs gewys en links gedraai.' ... By die Afrikaner se grafskrif sal dan staan: 'Hier is die enigste volk ter wêreld wat so min van homself gedink het dat hy selfmoord gepleeg het!'."
Terwyl dan nou hier 'n woord gespreek word oor wantroue, is dit dalk gepas om 'n gewese Vryheidsfront-wetgewerlid, dr Christo Landman, aan die woord te stel soos hy hom oor die saak uitgelaat het in die AEB lyfblad, Impak, van 10 November 2000. Hy raak die netelige saak van die IDASA-komplot en verbandhoudende optrede in die relaas aan, en daarom is dit te meer uiters gepas om van hierdie standpunt kennis te neem. Hy skryf onder die opskrifte 'Herstel vertroue só in die politiek', en, 'Politici moet "stink naam" regstel' :
"Die politiek het vir homself die naam verwerf van 'dit stink'. As die politiek stink, dan is politici self daarvoor verantwoordelik. Van die vernaamste argumente wat ons hoor is:
- politici misbruik die 'volk' deur oor volksbelang maar alleen te praat;
- eenmaal verkies is 'eie belang' en by politici deurslaggewend;
- jy kan politici nie op hul woord neem nie vanweë geheime agendas;
- in kort: politici het 'n onverdiende geloofwaardigheidskrisis 'verwerf'. Voorbeelde is daar legio.
"Die Nasionale Party het die kiesers oor die jare heen mislei deur kort voor 'n verkiesing een ding te sê en daarna 'n ander ding te doen. Kom ons neem die nuwe grondwetlike bedeling as voorbeeld. Voor die 1994-verkiesing is ons verseker dat daar genoeg beskermende maatreëls in die grondwet verskans sou wees.
"In hierdie blad is afdoende bewyse aangevoer dat dit 'n plein liegstorie was. Op die graf van De Klerk moet 'n goeie vaderlander die volgende grafskrif aanbring: 'Hier lê De Klerk. Hy het regs gewys en links gedraai.'
"Nog 'n voorbeeld: 'n bekende regse politikus wat al lankal deur die Wet op Kwelsugtige Gedinge van 1956 verhinder moes gewees het om ander Afrikaners te beswadder, versprei 'n liegbrief oor 'n ander politikus ('n bekende generaal wat van tyd tot tyd as verraaier afgemaak word). Hierdie liegbrief sou 'n afskrif wees van 'n 'ware dokument' met al die geheime kodes, die lot, wat uit Washington aan De Klerk sou gestuur gewees het.
"Volgens hierdie boodskap van die ambassadeur in Washington aan De Klerk in 1992 moes laasgenoemde nie bang wees vir 'n Boere-opstand nie, want die generaal sou al die leiers van die opstandbeweging vooraf aan De Klerk laat toekom. So kon die opstandelinge dan geneutraliseer word.
"As oud-buitelandse sake-amptenaar, in beheer van die Geheime Projekte van Buitelandse Sake voor 1994, word ek gevra om ondersoek in te stel.
Ek bevind:
- datg die betrokke generaal nog nooit in Washington was nie (waarom sou hy dus 'n dokument deur die ambassadeur in Washington aan De Klerk stuur terwyl dieselfde generaal redelike toegang tot De Klerk geniet het;
- Dat daar nooit 'n geheime boodskap aan De Klerk gestuur is nie;
- Dat die betrokke nommer van die vermeende geheime kommunikasie eintlik die personeelverslag van 'n junior amptenaar uit Washington aan Pretoria was;
- Dat die dokument 'n vervalsing was, met disinformasie, daarop bedag om die eer van die generaal te skaad.
"Ek het die betrokke politikus met 'die feite' gekonfronteer en hom daarop gewys dat 'n mens 'geen valse getuienis teen jou naaste opper nie.' Hy met my later in 'n smeertydskrif gedaag om saam met hom op die openbare verhoog oor die saak te verskyn. Ek het die uitnodiging onder net twee voorwaardes aanvaar en dit is dat die vergadering onder 'n onafhanklike voorsitter sal plaasvind en dat ons gelyke tyd sal kry om ons saak te stel. In kort: die uitnodiging is van die hand gewys en ek is met 'n hofaksie gedreig. Vandaar die verwysing na die Wet op Kwelsugtige Vervolginge.
"Dan is daar die misbruik van die politieke masjinerie vir persoonlike gewin. Hier is 'n goeie voorbeeld: Met die samestelling van die proporsionele lyste van 'n sekere party wie se naam ter wille van etiket nie genoem sal word nie, daag daar by die verkiesingsvergadering twee families op, wat, volgens die getuienis van 'n besondere persoon wat betrokke was, in alliansie met mekaar gegaan het en vooraf presies belsuit het wie waar op die proporsionele lys sou wees:
- Familie 1 kom met drie broers, die vrou van een van die broers en die swaer en dié se vrou daar aan;
- Familie 2 word verteenwoordig deur die pa, sy vrou en hul seun.
"In kort: Van die demokrasie is 'n bespotting gemaak...
"Wat wil hierdie voorbeelde vir ons sê? Eenvoudig dat die Afrikaner se saak nie met sulke skelmstreke, knoeiery en ondemokratiese prosesse gedien kan word nie. Ons sal die politiek moet skoonmaak van die skelms en die boewe wat die prosesse vir eie gewin wil uitbuit. Wie soos die vyand word, is in wese een van die vyand en het geen morele gronde om die vyand te bestry nie, Ons kan dit doen deur:
- bewese werksprestasie en kundigheid in te bou in die aanwysing van openbare persone. Hiermee bedoel ek dat elke kandidaat sy kaarte op die tafel moet sit oor wat hy vir die volksaak gedoen het. 'n Kieskollege sal die prestasie en vermoëns van die kandidate moet verifieer en hulle in rangorde moet plaas. Slegs dan kan daar gestem word oor wie watter posisie moet kry. Die tref-en-trap politiek van die verlede het ons waar ons vandag is;
- openbare ampsbekleërs te verbind aan 'n ondertekende gedragskode wat, by oortreding daarvan, so 'n kandidaat diskwalifiseer om vir 'n openbare amp vir 'n gerespekteerde party te staan;
- 'n ander metode is om alle nominasies en stemmery self, deur geheime prosesse te laat geskied;
- 'n leier moet weet wanneer om te gaan...
"Die Afrikanerpolitiek is verrot en ruik sleg. As ons die Afrikaner wil red sal ons ons politieke huis in orde moet kry en die machiavelli-figure uitsmyt en vergeet en oorbegin. Doen ons dit nie, dan kan ons maar die swanesang van die Afrikaner sing. By die Afrikaner se grafskrif sal dan staan: 'Hier is die enigste volk ter wêreld wat so min van homself gedink het dat hy selfmoord gepleeg het!'. "