Gedagtes vir elke dag
Of lees almal by Gedagtes vir elke dag
GOD PRAAT DEUR SIEKTE MET JOU
LUISTER NA SY STEM!
Siekte is 'n manier waarop God met sy kinders praat, sê Job in hoofstuk 33:19: "Hy spreek die mens aan met ernstige siekte."
Dit is nie 'n teken van God se onmag as iemand nie gesond word nie, maar die middel tot God se almagswerke, sodat ons vir Hom getuies kan wees; sodat ons weer kan besef, al word ek elke dag afgetakel, daar is niks wat my van God se liefde vir my kan skei nie.
Daar op jou siekbed kyk jy met nuwe oë na jou eie lewe, veral na die dinge wat jy nog so graag wil bereik; na die mense wat jy liefhet en geen waarborg het dat hulle môre nog by jou sal wees of jy by hulle nie. Dan besef jy elke minuut wat jy nog krag en tyd oorhet, moet maksimaal benut word omdat elke oomblik genadetyd is.
Jy besef ook weer dat jou lewe hier op aarde net 'n klein deeltjie van God se plan is, dat jou eintlike lewe nog voorlê, dié lewe wat vir jou by God wag. En dan word jy dankbaar om te lewe al sien jy uit om na Hom te vertrek.
Hierdie verhoog waar jy tydens siekte verkeer is meermale die podium van waar ons geloof aan die wêreld sigbaar word. Hierdie dinge werk soos die swart fluweel-agtergrond waarteen juweliers so graag hulle goud en diamante juweliersware uitstal – ons geloof behoort só te blink teen die donker agtergrond van siekte. God praat met jou deur jou siekte – luister na sy Stem!
MULTI- INTER- NASIONALE MILITÊRE OEFENING - VERBORGE AGENDA
ONS HOEF SEKER NIE TE WONDER WAT HIERAGTER SIT NIE...
Erika Gibson
"... sodat die twee lande se soldate mekaar en mekaar se toerusting beter kan leer ken..." En dan ewe liefies daaroor kan korrespondeer? Ons kan maar daarop wed dis met die oog op versekerde sukses met daardie "humanitêre geleentheid" wat in die pyplyn is... Wees verseker hierdie soort ding gebeur, in ‘n rewolusionêre klimaat soos SA tans verkeer, nie om dowe neute nie! Daarom is SA die verkose terrein vir die “oefening.” Dit is suiwer voorbereiding vir die finale fase van die kommunistiese rewolusie in SA.
Pretoria - Die grootste inval van Amerikaanse soldate nóg vind van vroeg volgende week aan die ooskus van Suid-Afrika plaas.
Dit is weliswaar ’n “vriendelike” inval deurdat dit gaan uitloop op die grootste gesamentlike militêre oefening van sy soort in die geskiedenis tussen die weermagte van die VSA en Suid-Afrika.
Die heersende gespanne verhouding tussen Suid-Afrika en die VSA het na verneem word gedreig om die oefening onlangs te laat sneuwel. Die beplanning was egter te ver gevorderd om dit te kanselleer.
Oefening Shared Accord is ’n multinasionale vredesoefening waartydens alle komponente van die weermag, naamlik die leër, lugmag, vloot en SA Militêre Gesondheidsdiens (SAMGD), saam met honderde Amerikaanse seesoldate en mediese personeel gaan oefen.
Wanneer ’n geleentheid hom in die toekoms voordoen, sal die magte dan gemaklik kan saamwerk – hetsy dit humanitêr van aard is of ’n natuurramp.
Die oefening begin wanneer die Amerikaanse skepe in die hawe van Port Elizabeth aankom. ’n Aantal konvensionele “aanvalle” saam met 6 SA Infanteriebataljon (6 SAI) in Grahamstad sal daarna plaasvind. 6 SAI is die Suid-Afrikaanse weermag se bataljon wat vir alle seegedrewe en landwaartse operasies verantwoordelik is.
Dit sal die eerste keer wees dat hulle saam met die Amerikaanse mariniers oefen.
Terwyl die “skerp kant” van die soldate hul militêre vaardighede in die omgewing van Grahamstad beproef, sal die “sagte kant” hom in verskeie plakkersbuurte laat geld.
Lede van die SAMGD en dié van die Amerikaanse mediese span sal dagklinieke oprig en basiese tandheelkundige sorg en oogtoetse doen.
Die veeartsenykundige beamptes van albei lande sal in samewerking met die Dierebeskermingsvereniging (DBV) na dié gemeenskappe se vee en troeteldiere omsien.
Terselfdertyd sal die ingenieurs saamwerk om die DBV op Uitenhage se geriewe en dreineringstelsel op te knap.
Die oefening duur tot die einde van die maand.