Gedagtes vir elke dag
Of lees almal by Gedagtes vir elke dag
'n Mens se kruis hier op aarde is nie 'n las nie, dis 'n skat aan jou gegee sodat jy daaruit kan leer en groei – moet dit dus nie sleep nie, dra dit!
OM GOD SE LOF TE BESING
Ds A.E. van den Berg
“Loof die Here, want dit is goed om onse God te besing, ja lieflik; ’n loflied is gepas!” (Ps.147:1).
“Laat alles wat asem het, die Here loof! Halleluja!” (Ps 150:6)
Die Psalmbundel sluit met Ps.150:6 af: “Laat alles wat asem het, die Here loof! Halleluja!” Om God te loof, is die belangrikste ding wat gelowiges op die aarde kan doen. Waarom? Omdat dit die vernaamste deel van 'n gelowige se dankbaarheid vir verlossing is. Daarom is die sing van geestelike liedere vir gelowiges onmisbaar.
Met geestelike sang, nie net woorde nie, betuig gelowiges hul dankbaarheid vir die verlossing van siele. Geestelike sang het drie diepgaande geestelike waardes; 'n waarde na bo, 'n waarde na buite en 'n waarde na binne.
Met die waarde na bo sing ons om God te loof. Die Engelse “hymn” kom van die Griekse humnos en beteken ’n lied ter ere van. Verskeie Psalm-digters roep gelowiges op om God met sang te loof. Dawid skryf: “Psalmsing tot eer van die Here, o sy gunsgenote en loof sy heilige gedenknaam” (Ps.30:5). In Ps.47 kry die kinders van Korag 'n opdrag: “Psalmsing tot eer van God, spalmsing tot eer van onse Koning, psalmsing!” (:7). Almal met uitroep-tekens. Ps.95:1 lui: “Kom, laat ons jubel tot eer van die Here, laat ons juig ter ere van die rots van ons heil!”
Wie sy dankbaarheid nie na God weerkaats nie, ken Hom waarskynlik nie. Vir gelowiges is dit so natuurlik om God te loof. In Ps.28:6,7 skryf Dawid: ”Geloof sy die Here, want Hy het die stem van my smekinge gehoor. Die Here is my sterkte en my skild; op Hom het my hart vertrou en ek is gehelp; daarom jubel my hart en sal ek Hom loof met my gesang” .
Paulus en Silas het selfs in 'n tronk onder moeilike omstandighede God se lof besing: “En omtrent middernag het Paulus en Silas gebid en lofliedere tot eer van God gesing; en die gevangenes het na hulle geluister” (Hand.16:25).
Geestelike sang het ook na buite waarde nl. om mede gelowiges mee te versterk. Paulus skryf aan die Kolossense: “Laat die woord van Christus ryklik in julle woon in alle wysheid. Leer en vermaan mekaar met psalms en lofsange en geestelike liedere en sing in julle hart met dankbaarheid tot eer van die Here” (Kol.3:16). Let op ons eie Sangbundel se Ges.298: “Soek in God jou sterkte; kry by Hom jou krag; met sy wapenrusting klee Hy ons met krag…” (Ges.298).
Talle geestelike liedere is geskryf om mense te vermaan om die lewenspad reguit te loop en daarmee die seën van die geloofslewe te ervaar. Moet nooit vergeet nie dat medegelowiges ook geestelike bemoediging voortspruitend uit gemeente-sang nodig het. Dit kweek eensgesindheid. Paulus gee aan gelowiges opdrag: “ En mag die God van lydsaamheid en bemoediging aan julle gee om eensgesind onder mekaar te wees ooreenkomstig die wil van Christus Jesus, sodat julle die God en Vader van onse Here Jesus Christus eendragtiglik uit een mond kan verheerlik” (Rom 15:5,6).
Opgesom het geestelike sang waardes na bo, na mekaar en ook na onsself. Iemand wat dit goed verstaan het, was Dawid. “My lippe sal jubel as ek psalmsing tot u eer en my siel, wat U verlos het” (Ps.71:23). “Loof die Here, want dit is goed om onse God te besing, ja lieflik; ’n loflied is gepas!” (Ps.147:1).
Opregte, hartlike sang getuig van ’n vervulling met die Heilige Gees. Paulus vermaan die Efesiërs: “Moenie dronk word van wyn nie – daarin is losbandigheid; maar word met die Gees vervul” (Efes.5:18). Vir ’n Gees-vervulde lewe is sang onontbeerlik en 'n verdere geestelike oefening wat God verheerlik, medegelowiges bemoedig en onsself geestelik sterker maak.
Ons moet egter goed verstaan wat ons sing en dit bedoel. Paulus skryf: “Hoe staan die saak dan? Ek sal met die gees bid, maar ek sal ook met die verstand bid. Ek sal met die gees psalmsing, maar ek sal ook met die verstand psalmsing” (1 Kor.14:15).
Ons moet met ons harte sing: “Spreek onder mekaar met psalms en lofsange en geestelike liedere; en sing en psalm-sing in julle hart tot eer van die Here” (Efes.5:19). “Laat die woord van Christus ryklik in julle woon in alle wysheid. Leer en vermaan mekaar met psalms en lofsange en geestelike liedere en sing in julle hart met dankbaarheid tot eer van die Here” (Kol.3:16).
Om onbedag en sonder dankbaarheid te sing, is geestelike oëverblindery. Jesus sê van Israel: “Hierdie volk nader My met hulle mond en eer My met hulle lippe, maar hulle hart is vêr van My af” (Mat.15:8). Salomo skryf: “’n Vrolike hart maak die aangesig bly, maar by verdriet van die hart is die gees neerslagtig....Al die dae van die bedrukte is sleg, maar die vrolike van hart het gedurig fees” (Spr 15:13,15).
Maak ’n punt daarvan om meer te sing. Moenie dat jou geestelike sang net tot eredienste beperk wees nie. Sing waar jy is – tuis of op pad. Sang is soos gebed – dit moet spontaan wees of dit met jou goed of sleg gaan. By geleentheid het Paulus en Silas weens hul Evangelie-verkondiging in 'n donker tronk in Filippi beland maar nie bang gewees nie. Hulle geloof het hulle geestelike nagsig besorg.: “En omtrent middernag het Paulus en Silas gebid en lofliedere tot eer van God gesing; en die gevangenes het na hulle geluister” (Hand.16:25). Geestelike nagsig en lofsang verlig gelowiges se gemoed.
Nog 'n persoon wat dikwels baie swaar gekry en deur geestelike sang opgebeur is, was Dawid. “Maar ek – op u goedertierenheid vertrou ek; my hart sal juig oor u heil. Ek wil sing tot eer van die Here, omdat Hy aan my goedgedoen het” (Ps.13:6).
Geestelike sang het wonderlike berusting in Dawid se lewe gebring: “My hart is gerus, o God, my hart is gerus; ek wil sing en psalmsing. Waak op, my eer! Waak op, harp en siter! Ek wil die dageraad wakker maak! Ek wil U loof onder die volke, o Here, psalmsing tot u eer onder die nasies” (Ps.57:8-10).
Dawid het die Onsigbare aanskou om die onmoontlike te vermag. Daarom was lofsang vir hom een van die belangrikste uitinge van sy geloof: “Ek wil sing tot eer van die Here solank as ek lewe, ek wil psalmsing tot eer van my God solank as ek daar is” (Ps.104:33).
In Ps.149 leer hy ons om in die openbaar sowel as tuis te sing: “Halleluja! Sing tot eer van die Here ’n nuwe lied, sy lof op die vergadering van die gunsgenote!” (:1). “Laat die gunsgenote juig in heerlikheid; laat hulle jubel op hul bedde” (:5).
Geestelike sang gaan oor dankbaarheid teenoor Jesus wat ons sondeskuld aan die kruis gedelg het. Ges.75 begin met die woorde: ”Ek wat vergifnis, Heer, ontvang het, sing dankbaar my verlossingslied” . Dis 'n skuld wat ons self nooit sou kon vereffen nie. Omsoom daarom jou dankbaarheid vir verlossing met sang, dan sal jou geloof nooit uitrafel nie! .