Gedagtes vir elke dag
Of lees almal by Gedagtes vir elke dag
Baie mense leef onverskillig en bring hulle lewens deur asof hulle nog een in die bank het. Die Woord van God sê dat die mens slegs een lewe het. Ons gaan net eenmaal op die aarde leef en nooit weer nie. Maar as ons dit reg doen, is een maal genoeg!
VOLKSVERRAAD (42)
Adv PJ Pretorius
Lees volledig by Volksverraad - die boek
DIE AANLOOP TOT DIE STIGTING VAN DIE VRYHEIDSFRONT
Op 15 November 1993 het die lede van die AVU, FAK en akademici (waaronder Marinus Wiechers van Unisa en Lawrence Schlemmer van die RGN) in die Sinodale Sentrum in Pretoria ontmoet. Schlemmer het getoon hoe die NP tydens die onderhandelinge in duie gestort het, en hy en prof. Johan Heyns van die FAK het 'n nuwe politieke party om Afrikanerbelange te bevorder, aanbeveel. Heyns het hom sterk uitgespreek ten gunste van die beleid van die AVU en vermeld dat Mandela dieselfde sentiment deel. Daar is besluit dat Viljoen genader moes word word vir die skep van 'n slenterparty. Viljoen het op 16 November 1993 saam met Heyns, Attie van Niekerk en Gerdus Kruger by Kruger se huis bymekaar gekom. Daar is groot gewag gemaak van Heyns en Viljoen se gemeenskaplike bande met die NG kerk en hulle bande met die Broederbond. Toe Viljoen die noodsaak van 'n slenterparty opper, het Heyns en Kruger hom daarop gewys dat dit die rol is wat van hom verwag word.
Viljoen was op daardie stadium gebonde aan sy onderneming met die staat om voor April 1994 'n tuisland van die ANC vir die Afrikaner te beding.HARTZENBERG DEMONSTREER DIE ERNS VAN SY VERSETPOLITIEK, GROENEWALD PRAAT OORLOGPRAA TJIES DOOD EN PRAAT POLITIEKE INTEGRASIE VOOR
Intussen het Hartzenberg met die sogenaamde 'tien plae' gedreig wat op 9 Desember 1993 sou begin indien die AVF nie hul sin by die onderhandelingstafel kry nie. Dit het onder meer die weiering om TV lisensie te betaal ingesluit. Luidens die 9 Desember 1993- uitgawe van die Vrye Weekblad van Max du Preez (agent van die Nasionale Intelligensiediens) praat Groenewald enige moontlikheid van 'n gewapende oorname dood.
Hy het gesê: "Dit sal net gebeur wanneer daar 'n toestand van totale onregeerbaarheid heers en wanneer alle staatsgesag in duie stort. Op die oomblik konsentreer ons al ons energie op onderhandeling. Mense praat baie, maar die totaliteit van ons energie is gerig op onderhandeling. As daardie deure toegemaak word moet ons weer dink. Maar ons wil nooit ‘n situasie sien waar besluit word op optrede waar ons die eerste skoot moet skiet nie. Nooit nie. Nooit nie. "
Groenewald het tydens sy onderhoud met die blad ook aangevoer: "Ons het daarin geslaag om die Afrikanervolk wakker te maak. Die volk was verslae, het op die ashoop gaan sit soos na die Tweede Vryheidsoorlog. Ons het vir mense nuwe hoop gegee. "
Die blad berig dat Groenewald daarop aanspraak maak dat die AVF deur middel van dissiplinêre stappe 'n einde gebring het aan baie van die gewelddadige optredes van groepe en enkelinge. "As ons vandag kyk na sogenaamde regse geweld, is dit 'n fraksie van wat dit ses maande gelede was. Daar het orde gekom . Ons het beweeg van 'n vennootskap van Afrikaners na 'n alliansie van wat nie-rassisties gebonde is nie, maar gevestig is op die beginsel van etnisiteit ... Ons het besef ons kan net as volk selfbeskikking opeis indien ons voldoen aan internasionale maatstawwe oor menseregte. Ons is in ‘n evolusionêre fase en sal met verloop van tyd 'n kultuur-etniese groep, 'n volk word. Dit sal mense van alle tale en selfs kleure insluit en absorbeer. Maar dit sal eers kom wanneer die persepsie dat die Afrikaner bedreig word, verdwyn. Dit sal eers kom met ekonomiese groei en voorspoed. Dan eers raak 'n groep meer liberaal in denke en baie meer toegeeflik.
DIE WEERMAG WAARSKU DIE AFRIKANER VOLKSFRONT TEEN SY PLANNE VAN GEWELDDADIGE AFSTIGTING
Viljoen poog as regeringsagent om die Afrikanervolksfront om te praat om deel te neem aan die algemene verkiesing van April 1994:
Die plan van die AVF om 'n Volkstaat gewelddadig af te stig, het 'n gevorderde stadium bereik. Die Hoof van die Suid-Afrikaanse Weermag, genl. Kat Liebenberg, waarsku in Januarie 1994 die leier van die Afrikanervolksfront dat die regering bewus is van die Afrikanervolksfront se afstigtingsplanne. Hy het die Afrikanervolksfront aangeraai om daarvan af te sien. Genl. Viljoen het op 29 Januarie 1994 tydens 'n massa-volksvergadering by die Pretoriase Skouterrein voorgestel dat die Afrikanervolksfront aan die verkiesing in April 1994 moet deelneem. Viljoen lees 'n toespraak voor wat weereens deur Groenewald geskryf is. Die voorstel word deur die massa verwerp. Die Afrikanervolksfront se Volksraad is by hierdie geleentheid beëdig met die leier van die Konserwatiewe Party, dr. Ferdi Hartzenberg, as president van die Volkstaat. Hy stel onder meer genl. Viljoen aan as Minister van Verdediging.
OPERATION SUNRISE WORD GEAKTIVEER EN DIE TVBC-STATE WORD DEEL VAN UNITêRE SUID AFRIKA
Die Bophuthatswana-slagting moes regse oorlogspraatjies stilmaak.
Afdeling Militêre Inligting en die Generaals het in Maart 1994 in sameweking met die Suid-Afrikaanse Weermag, die Suid-Afrikaanse Polisie en die ANC/SAKP toegesien dat die Vryheidsalliansie se magsbasis verbrokkel en dat die Vryheidsfront gestig word. Die Vryheidsfront (VF) is op 4 Maart 1994 as 'n staatsveiligheidsnoodplan geregistreer toe die AVF steeds volhou om nie aan die Algemene Verkiesing van April 1994 deel te neem nie. Dit dien as 'n 'steppingstone' vir moontlike regse deelname aan die verkiesing. In Maart 1994 word Operation Sunrise uitgevoer. Ná die uitvoering van hierdie operasie is die TBVC-state weer onder die Republiek se heerskappy gebring, wat ook ooreenstem met die woorde 'undivided South Africa' soos vervat in die Deklarasie van Voorneme wat in Desember 1991 tydens die opening van Kodesa goedgekeur is. Vier regse blanke mans is koelbloedig in Bophuthatswana vermoor, wat deel uitgemaak het van 'n sielkundige aanslag teen regses se sogenaamde oorlogpraatjies.
DIE VRYHEIDSFRONT REGISTREER VIR DEELNAME AAN DIE ALGEMENE VERKIESING VAN APRIL 1994
Pieter Groenewald het namens Constand Viljoen in Maart 1994 die Vryheidsfront gaan registreer om aan die Algemene Verkiesing van April 1994 deel te neem. Die kombinasie van gebeure in Bophuthatswana (verwysende na die sterftes van Blanke mans) en die Vryheidsfront se registrasie vir deelname het skokkend ingewerk op die Afrikaner en het hom met 'n gevoel van totale wanhoop en magteloosheid gelaat. Slegs sowat 300 000 het toe met die Vryheidsfront saambeweeg. Op 20 April 1994 het Viljoen van die Vryheidsfront 'n ooreenkoms met die ANC in IDASA se kantoor gesluit. Met die ondertekening van die ooreenkoms het die regering die Vryheidsfront ingebind met die skrywe van die Volkstaatsraad van 20 lede in die grondwet. Dr. Ferdie Hartzenberg het net voor die Algemene Verkiesing van April 1994 alle versetopsies gestaak en ook Radio Pretoria se uitsendings in April 1994. Hartzenberg het korrespondensie met Viljoen gehandhaaf selfs ná die Algemene Verkiesing van April 1994. Hartzenberg se reg kraglose Volkstaat het net soos sy politieke party 'n kraglose mondstuk geword. Intussen het die Afrikaner-volksunie ontbind en Andries Beyers sluit toe by die Nasionale Party aan. Koos van der Merwe word deur die Nasionale Intelligensiediens voorgesê om die Inkatha Vryheidsparty te penetreer.
Vervolg...