Gedagtes vir elke dag
Of lees almal by Gedagtes vir elke dag
Niemand word oud deur bloot ‘n sekere aantal jare te leef nie. Ons word eers oud as ons ons ideale en drome prysgee, en wanneer spyt die plek van ons drome inneem.
DIE IDASA-KOMPLOT IN ‘N NEUTEDOP
Boeta Erasmus, Dagbestuurslid van die Afrikaner Nasionalistiese Beweging (ANB), gee in die hieropvolgende artikel ’n briljante opsomming van die IDASA-komplot wat aanleiding gegee het tot die verknegting van die Afrikanervolk in 1994. Daarbenewens gee hy ook ’n blik op die toekoms van die Afrikaner. Hy wys op die dure plig van die Afrikaner om nou pal te staan en te veg vir dit wat regmatig sy eiendom is, maar deur die slinksheid van Afrikaner-(mis)leiers wat saamgewerk het met die magte van die Duisternis, van ons ontneem is.
Lees ook by hierdie skakel: https://www.anbsa.co.za/die-waarheid-van-ons-geskiedenis/
Die deursnee Konserwatiewe Party- en Afrikaner Volksfront-ondersteuner (bykans een miljoen Afrikaners) sou tussen 1990 en 1994 nie kon droom dat hulle deur hul eie “leiers”, wat hulle volkome vertrou het, verraai en uitverkoop sou word nie.
So-iets mág nooit weer met die Afrikaner- / Boerevolk van Suid-Afrika gebeur nie!
Dáárom: NEEM KENNIS van wat vóór 1994 gebeur het.
Moet op “prinse” NIE vertrou nie.Die HERE sál op sy tyd aan ons weer wáre nasionalistiese volksleiers skenk, soos ‘n Malan, Strijdom en Verwoerd.
Maar húlle wat wéét wat gebeur het en nogtans die 1994-verraad probeer ontken of doelbewus verswyg, IS NIE TE VERTROU NIE!!!
“Selfbeskikking” en ‘n “Volkstaat” was die retoriek wat Afrikanervolksverraaiers reeds vóór 1994 gebruik het.
Deur regse Afrikaners se gedagtes in die rigting van ‘n “volkstaat” te stuur (waarin die Afrikanervolk sogenaamd homself sou kon wees onder ‘n eie onafhanklike “Afrikaner-owerheid”) is sy vasbeslotenheid om De Klerk se oorgawe langs die konstitusionele weg by die stembus te stuit, verydel.
‘n “Volkstaat, wat selfs “militêr afgedwing sou word”, (as geelwortel en troosprys) moes die Afrikanervolk daartoe beweeg om van sy politieke mag/seggenskap oor sy Godgegewe Vaderland – die Republiek van Suid-Afrika – afstand te doen.
In die hoogste geheimhouding het “regse” Afrikanerleiers by etlike geleenthede op verraderlike wyse met die vyande van ons volk, die ANC-SAKP-NP-regering, reeds agt maande vóór die April’94-verkiesing, onderhandelinge gevoer.
Tydens een van dié “onderhandelinge” (18 en 19 November 1993 by Farm Inn buite Pretoria) sou hulle namens Die Afrikaner Volksfront aan die ANC-SAKP onderneem:
(a) om die oorgawe-verkiesing in April ’94 nié omver te werp nie
(b) en boonop hul lede aan te spoor om aan die “demokratiese verkiesing” (die weggee van ons land aan Kommuniste) deel te neem.
Die veragtelike “Afrikaner Akkoord” was die vrug van dié geheime gekonkel en geknoei deur verraderlike “leiers” agter die rug van die Afrikanervolk.
Terselfdertyd het hierdie sélfde “Afrikanerleiers” die Boere-krisis-aksie (BKA), wat basies bestaan het uit die Blanke burger-kommando’s verspreid oor ons hele land, op ‘n gereedheidsgrondslag geplaas “om enige dag tot aksie oor te gaan”, want die April oorgawe-verkiesing gaan verséker (deur “Operasie Jakkals”) militêr verhoed word!
Daarvoor kon ook op die samewerking van die Afrikaner Weerstandsbeweging (AWB) en, sogenaamd, die ondersteuning van ‘n aansienlike deel (44 generaals) van die Suid-Afrikaanse Weermag (SAW) gereken word.
Verder is deur hierdie selfde verraderlike “Afrikanerleiers” van verskeie verhoë af aan ons volk dié bedrieglike gerusstelling gegee
(a) dat die oorgawe-verkiesing beslis nié sal plaasvind nie
(b) en dat ‘n “Boere-Afrikaner Volksrepubliek” (‘n Volkstaat!) vir die Afrikanervolk uitgeroep gaan word, waarvoor op 29 Januarie 1994 selfs n “Oorgangs -Volksraad” in die lewe geroep is... natuurlik net om die skyn van erns aan die volk voor te hou.
Die Bophuthatswanna-operasie (11 Maart 1994) was ‘n Nasionale Intelligensie (NI) projek wat, in noue samewerking met dié verraderlike “Afrikanerleiers”, haarfyn beplan en deurgevoer is, ten einde die BKA en AWB as regse “bedreiginge” vir ‘n vreedsame magsoordrag aan die ANC-SAKP, effektief uit te skakel.
Bogenoemde word bevestig deur ‘n geheime skakeldokument van Nasionale Intelligensie op 19 Julie 1993 waarin genl. Tienie Groenewald via die buitelandse ambassade-kantore die vrese vir ‘n regse magsoorname besweer.
Dit lui: “REGSE OPSTANDE SAL NIE PLAASVIND NIE. BKA NAME SAL BEKEND GEMAAK WORD. MOONTLIKE OPSTAND SAL GEPAARD GAAN MET VERNEDERENDE RESULTAAT”.
Dat genl. Constand Viljoen eers die dag ná die Bophuthatswanna-debakel sy “Vryheidsfront” finaal gaan registreer het om aan die April-verkiesing deel te neem “omdat hy toe gesien het dat oorlog nie gaan werk nie” is ‘n leuen.
Genl. Viljoen het geweet wat in Bophuthatswanna gáán gebeur. Hy was deel van die beplanning. Daarom het hy rééds teen die Woensdag (9 Maart), volgens die regulasie vir alle partye, sy kandidatelys by die OVK in Kempton Park ingehandig en dus die Vryheidsfront finaal geregistreer.
Dat soveel as moontlik Blankes en veral Afrikaners aan die oorgawe verkiesing van April-‘94 moes déélneem, OM LEGITIMITEIT AAN DIE “NUWE POLITIEKE BESTEL” TE GEE, was die essensie van die IDASA-komplot.
‘n Oproep tot die Afrikanervolk in 2025:
Mag ons volk homself losmaak van hierdie verraderlike “politieke bestel” wat wederegtelik beheer oor ons Vaderland vanaf 1994 verkry het.
Laat ons weer VERENIG op die grondslag van ware Afrikanernasionalisme (dit is Vaderlandsliefde) om so ‘n eenheidsmag BUITE die bestel te wees, wat soos ons voorgeslagte in geloof in die Drie-enige God van die Bybel ons volkstryd voortsit, met as vertrekpunt, Suid-Afrika is ons Godgegewe erfenis.
Hiér is ons volk gebore, deur die HERE gewil, en hiér lê ons Godgegewe roeping in diens van Sy koninkryk.
Waar laat bogenoemde ons?
Die Afrikanervolk is in 1994 op verraderlike wyse deur “leiers” wat hy vertrou het uit sy regmatige politieke seggenskap oor sy Vaderland – die Republiek van Suid-Afrika – gekul. Hy het NIE sy toestemming gegee dat mag aan Kommuniste oor sy Vaderland oorgedra mag word nie.
Vandag besit die Afrikanervolk, na 30 jaar, alleen deur die genade van ons hemelse Vader, ten spyte van ‘n gestadigde “oorlog” wat teen hom gevoer word waarvan derduidende plaasaanvalle getuig, stééds verreweg die grootste deel van die ekonomies-aktiewe landbougrond in Suid-Afrika.
Hoewel baie gedwing was om teen hul sin te immigreer, het vele wat hul werk verloor of op “vroeë pensioen” geplaas is ná 1994, deur entrepreneurskap nuwe besighede in ons dorpe en stede landwyd gevestig en opgebou.
Om ons grond en eiendom, ons erfgoed, prys te gee om ons in die buiteland of in ‘n “Volkstaat” te gaan vestig, is om aan die ou verraadsplanne uitvoering te gee en die HERE se bewaring oor ons in ons Vaderland te misken.
As dit vir ons net om ons materialistiese voortbestaan gegaan het, sou ons inderdaad ons wortels hier kon uittrek en elders heen vlug, maar dan versaak ons die geloof van ons voorgeslag, hou ons op om Afrikaner- en Boerevolk te wees en kies ons vir die tydelike materialisme en individualisme van die ongeloof.
Al is soveel duisende boere en hul dierbares die afgelope 40 jaar op die grusaamste wyses op plase en elders vermoor of vermink is hul offers (soos die 27 000 Boervroue en –kinders in die konsentrasiekampe) nié tevergeefs nie.
Ons is deur die HERE se bewaring nóg in ons Vaderland. Hóm kom die wraak toe.
Maar om te vlug is om die “boodskap” uit te stuur dat die druk dividende lewer. Dán word die druk op húlle wat nog vasstaan net gróter.
Plaasaanvalle leer ons Boerevolk weer om saam te staan. Elke aanval wat afgeweer word bring mense nader aan mekaar en ons vyande verloor moed.
Maar waar Boere-gemeenskappe weens druk uitmekaar spat (verkoop en wegtrek) bied ons ons grond op ‘n skinkbord aan. So bereik die Kommuniste hul doel.
By al die mooi dinge wat in Orania gebeur mág ons nie vergeet dat die HERE hierdie héle land as erfdeel aan ons toevertrou het nie.
Diegene wat ywer vir ‘n “Volkstaat” aan die hand van die “Afrikaner Akkoord” of op welke wyse ookal wil afstand doen van die Vaderland (wat aan die nageslag behoort), ons Godgegewe erfenis. As ons “tevrede” is met ‘n Volkstaat gee ons aan die ANC-SAKP “toestemming” om met hul plundering van die afgelope 30 jaar voort te gaan. En wat sal uiteindelik van ons “Volkstaat” oorbly wanneer die hele land in chaos en anargie en stamgevegte ten gronde gaan?
Ons erfenis, ons Nabotswingerd, die vólle deel van ons Vaderland bekend as Blank Suid-Afrika, wat deur ons voorgeslag van die wildernis ontworstel is, mág ons nie van ons nageslag vervreem nie!
Deur hoë en dure offers is ons Vaderland deur ‘n Godvresende voorgeslag as erfenis aan ons toevertrou. Hoe sal ons dan nie ook bereid wees om ook ten bloede toe te stry om hierdie land ook weer vir ons nageslag te kan nalaat nie?
Mag ons aanvaar dat in 30 jaar afgebreek is wat God in 300 jaar deur die nasate van Geus en Hugenoot tot stand geroep het?
Nie meer lank nie... Vasbyt! Die HERE hét die onreg en verraad gesien... en sien vandag steeds. Hý sál op die regte tyd ons wéér in ons land herstel, as dit in sy Raad so beskik is.
Laat ons op ons knieë voor Hóm buig en Hom om genade smeek. Ons behoud is, soos by Bloedrivier, alléén in sy welbehae geleë.
Soos ons voorgeslagte, soos blyk uit ons geskiedenis, in hul standvastigheid en geloofskrag volhard het deur die aller omstuimigste tye, só moet ons óók doen.
Laat dié onder ons wat van die ware geloof afvallig geword het tot Hóm terugkeer. Ons heil lê NIE in die raadsale van die wêreld of om die onderhandelingstafel met Kommuniste nie.
Mag die HERE ons Afrikanervolk genadig wees en ons in ons Vaderland op sy tyd herstel om Hom vry te kan dien, soos die Woord ons leer.