Gedagtes vir elke dag
Of lees almal by Gedagtes vir elke dag
Laat ons nooit vergeet dat alles en almal aan God se mag onderworpe is nie. Hy gebruik selfs booswigte as instrumente in sy hand - ’n karwats om stout kinders ’n loesing mee te gee. God het by geleentheid selfs ’n bose gees gebruik om die afvallige koning Saul te teister. Weet dat God alle mag ook oor Suid-Afrika het.
SOLRANIA: TYD VIR STILBLY, WAG EN KYK IS VERBY
VAN ‘N ORANIËR
Geagte mede-Oraniërs en almal wat indirek betrokke is by Orania asook diegene wat bloot net belangstel in die gebeure in en om Orania.
Dit is duidelik dat Orania nou toenemend en meer as ooit tevore die teiken is van beide die EFF en die ANC. Onthou maar die beginsel van "jou vriende se vyande word outomaties ook jou vyande". (As jou vriende baie vyande het gaan jy ook baie vyande hê). Onthou gerus ook dat die kleine Orania 'n brose en uiters kwesbare spikkeltjie in donker Afrika is en nie in Europa of die VSA gesetel is nie. In Afrika werk dinge bietjie anders as elders in die wêreld.
Van julle sal weet dat ek en andere hierbinne baie gekant is teen die groot voetspoor en die groot betrokkenheid van SoliForum (Solidariteit en AfriForum) in die piepkleine Orania. Die plaaslike bestuur hier en SoliForum is so hand-om-die-blaas dat lg selfs ruim bydra tot die plaaslike dorpsraad se salarisse. (Aan wie maak dit die dorpsraad dus lojaal?) Salarisse wat totaal uit lyn is met wat hierdie dorpie self kan bekostig. Die plaaslike bestuur verwys graag na die "strategiese vennootskap" tussen Orania en Solidariteit /AfriForum. By verre die grootste ontwikkelaar en rolspeler in Orania vir die afgelope 6 jaar is Solidariteit en sy filiale. Ek sien dit as 'n oorname en 'n baie ongesonde monopolie wat hier heers. Die plekkie kan eintlik maar herdoop word na Solrania.
Vir etlike jare reeds het ek en andere gewaarsku teen die grootgattige, arrogante en uitdagende gespog van die Orania bestuur en hulle strategiese vennote in Pta mbt Orania. Ek het gewaarsku dat daardie vennootskap en die gepaardgaande uitdagende gespog ("Ons bou die Stad"-baniere, stadsbou-konferensies ens) 'n groot rooi teiken op hierdie dorpie en sy inwoners verf. Dit verf 'n groot rooi teiken op die rug van elke inwoner, insluitende elke bejaarde, vrou, kind en baba in Orania. Dit verf ook 'n groot rooi teiken op almal hierbinne se beleggings en eiendom en spesifiek die waardes van Oraniërs se eiendomme hier.
Onthou, hier is reeds meer as 'n 100 eiendomme te koop in hierdie piepklein plekkie.
As dit so goed gaan hier soos wat die amptelike Orania bemarking en reklame instrumente, (en die Orania Beweging se toerbussie se bestuurders), en die amptenare van SOLIDARITEIT SE ONTWIKKELINGSMAATSKAPPY IN ORANIA (OOM), die wêreld wil laat glo, waarom wil so baie Oraniërs hulle eiendomme hier verkoop en padgee? As dit so goed gaan hier, waarom staan daardie Te Koop bordjies selfs jare lank voor eiendomme met in die meeste gevalle weinig tot geen belangstelling van kopers nie? Wat is 'n eiendom / aandeel werklik werd as niemand dit wil koop nie? Dit herinner nogal aan Louis Liebenberg se tipe bemarking en reklame net voor hy tronk toe is. Het hy nie ook tot op die laaste nog nuwe beleggers (slagoffers) probeer lok met stories van hoe wonderlik en suksesvol sy onderneming is nie?
Waarom wil so baie goeie Oraniërs hier padgee? Waarom is daar reeds meer ‘Orania expats’ as Oraniërs? Die antwoord is eenvoudig. Die plaaslike bestuur/direksie en sy strategiese vennote in Pta (Solidariteit en AfriForum) het hierdie plekkie se unieke karakter en visie, asook die vraag na Orania, totaal en al in die grond in bestuur. Ek vermoed daar is moontlike gronde vir siviele eise teen die plaaslike bestuur (gesamentlik en individueel) vir hulle swak strategiese besluitneming en hulle onbevoegde bestuur en hantering van Oraniërs se belange/aandele en hulle eiendomme se waardes hier. Groot en klein plaaslike besighede maak toenemend hulle deure hier finaal toe. Ironies vir 'n plekkie waarmee dit kwansuis so wonderlik goed gaan.
Toerisme en spesifiek vakansie besoekers hierheen is 'n fraksie van wat dit 6 jaar gelede was. Want wie wil in 'n Solidariteit "stadsprojek" kom vakansie hou? Wie wil nog belê in 'n plekkie wat toenemend op risiko geplaas word deur sy bestuur en dié se hand-om-die-blaas verhouding met 'n "strategiese vennoot" soos SoliForum wat soos 'n lomp bul in 'n delikate porseleinwinkeltjie hier instorm en kom maak en breek asof Orania sy eiendom is. Dit, terwyl hulle al hoe meer uitdagende en polities gedrewe uitsprake maak oor alles en nog wat. Dirk Hermann en ander SoliForum amptenare maak links en regs aankondigings oor Orania, met geen mandaat van die meerderheid Oraniërs nie.
Die ANC en die EFF is nie onnosel nie. Hulle sien en lees ook daardie aankondigings en FB plasings waarin Solidariteit en AfriForum se amptenare spog oor hulle skouperdjie se ontwikkeling in die Noordkaap nl Orania. Dieselfde Solidariteit en AfriForum amptenare wat met groot fanfare en luide trompetgeskal Amerika toe hardloop om by die Trump administrasie te gaan kla oor die ANC se rasmalheid. Dis nie baie slim nie want daardie einste SoliForum amptenare is baie intiem betrokke by die leliewit Orania. Van hulle het selfs eiendom in Orania. So lei hulle die vyand se aandag en fokus tot by Orania se voordeur. So verf hulle die rooi teikens op ons en ons kinders se rue.
Intussen het ‘Orania’ ook 'n drieman-afvaardiging Amerika toe gestuur, met geen mandaat van die meerderheid Oraniërs nie, om kwansuis met die Trump administrasie te gaan gesels. Oor wat? Orania is nie 'n demokrasie nie. Die meerderheid Oraniërs het nie eers stemreg nie. Amerika is 'n demokrasie en Trump 'n demokraties verkose president. Trump gaan hom nie steur aan 'n on-demokratiese Solidariteit projek met 3000 inwoners in die middel van nêrens in die Noordkaap nie. Julle mors net ander mense se geld met daai "joyride" Amerika toe.
Wanneer die spreekwoordelike papaja die waaier hier tref gaan Oraniërs stoksiel alleen gelaat word om die SoliForum kastaiings uit die vuur te krap. Net soos wat derduisende goedgelowige mense en naasbestaandes nou alleen gelaat word met die tragiese gevolge van die dodelike C*v*d inspuitings wat Solidariteit se amptenare destyds so fluks aanbeveel het. Dis maar hulle manier. Hulle beweeg net weer aan na 'n volgende "projek".
Terloops, moenie vir die boodskapper kwaad wees nie. Wees kwaad vir die onbevoegde plaaslike bestuur wat toegelaat het dat die plekkie oorgeneem word deur hulle strategiese vennote (lees maatjies) in Pta. Daardie maatjies se vyande gaan nou soos honger wolwe om die brose Orania stelling inneem.
Oraniërs gaan toenemend verstaan waarom ek en andere vir jare reeds 'n klein en onder-die-radar Orania bepleit het. Waarom ons eerder 30 klein Oranias as een arrogante, uitdagende Solrania bepleit het. Niemand het Orania ooit werklik bedreig voordat Solidariteit en AfriForum hier kom oorneem het nie. Hulle vyande is nou ook die kleine en eens vreedsame Orania se vyande. Vir meer as 20 jaar het die ANC die kleine en vreedsame Orania met rus gelaat. Danksy Solidariteit en sy arrogante betrokkenheid by en sy uitdagende gespog oor hulle sg "stad in wording" (Solrania), is daardie vreedsaamheid nou vernietig.
Ek verag SoliForum vir wat hulle aan ons hartsplek gedoen het en steeds doen en ek sal my kind beskerm met alles wat ek het. (En moenie my met 'n toeter "summons" na AfriForum se gebou in Orania nie. Julle het van Orania 'n politieke speelbal en 'n teiken gemaak!