Gedagtes vir elke dag
Of lees almal by Gedagtes vir elke dag
Ons maak so maklik geloftes teenoor die HERE. Soms is daardie geloftes onverskillig soos Jefta in Rigters 11. Hy het groot hartseer veroorsaak omdat hy nie deeglik gedink het wat hy die HERE belowe het nie. 'n Gelofte is so 'n ernstige saak dat ons baie seker moet wees hoe God daaroor oordeel sodat ons in ons gewete verseker is dat ons niks onbesonne aanpak nie – die breek van 'n gelofte teenoor God bring ernstige gevolge.
HOOP VIR DIE NGK?
Professor Niemandt,
I/S: Berig in die Volksblad van 19 Maart 2015
Ek kan nie help om te wonder hoe anders die NGK asook Suid-Afrika in sy geheel sou lyk as die evangelie van Jesus Christus soveel aandag gekry het as menslike leerstellings soos die Belharbelydenis nie.
Volgens die berig in die Volksblad blyk daar amper ‘n obsessiwiteit by u om hierdie belydenis in die NGK aanvaar te kry. Dié tipe gedrag van ‘n akademikus kan die vraag laat ontstaan oor wie se opdragte, voorskrifte en bevele eintlik deurgevoer moet word? In die eerste paragraaf van die onderhoud word die eintlike boodskap alreeds aan die leser gegee, naamlik dat die versuim om die weg van die moderator te volg, rampspoedige gevolge sal inhou. Dit blyk dat u van mening is dat die NGK irrelevant sal raak, sou die belydenis van Belhar nie aanvaar word nie? Dít impliseer dat u die evangelie van Jesus Christus verkleineer tot minder relevant as die belydenis van Belhar! Moet ons as mensedan glo dat u Jesus Christus en sy kerk werklik liefhet en in u amp dien?
Ek is van mening dat daar nog ‘n moontlikheid sou wees om die NGK van sy dwaling en ondergang te bekeer, as u maar dieselfde ywer vir die evangelie van Christus sou toon as wat u klaarblyklik vir die Belharbelydenis, die VGKSA en vir die WRK het.
Dit is maklik om mense met woorde wat sag op die oor val te mislei, maar uiteindelik is dit optrede en ywer wat die ware bedoelinge van die hart aan die lig bring. Gemeet aan die woorde van die ware Hoof van die kerk, Jesus Christus, wil ek die werk van u hande op ‘n weegskaal plaas vir beoordeling in die lig van Matt. 12:30: "Hy wat nie met My is nie, is teen My; en Hy wat nie saam met My versamel nie, verstrooi.” Ek durf nie ‘n oordeel uitspreek nie, want dit kom my nie toe nie. Ek glo egter dat u indringend uself die vraag sal moet afvra of u besig is om met u ywer in u amp besig is om te versamel of te verstrooi? Die enigste eenheid waarvan melding gemaak word in hierdie berig, is die kerkeenheid met die VGKSA (“die mense wat geboorte geskenk het aan Belhar”, aldus u eie woorde). Die eenheid van Jesus Christus met sy gemeente word nie eers genoem nie. Inteendeel, in die hele berig word nie eers ‘n enkele keer melding gemaak van God in sy Drie-eenheid nie en dus sal ek glo dat u begrip sal hê waarom die vraag aan u gestel word : Wie is u werklik besig om te dien?
Die feit dat Jesus Christus duidelik nie die sentrale rol in u strewes vertolk nie, is dan ook die presiese rede waarom u sukkel met “belydenisvorming.” Die kerk hoef geen nuwe belydenis te vorm nie, Jesus Christus het dit alreeds gedoen en die kerk se verantwoordelikheid is om dit te beskerm en te verkondig. Wanneer die hoof van die kerk, Jesus Christus (die Seun van God Drie-enig), nie meer erken en bely word nie, is die kerk nie besig om irrelevant te raak nie maar is die kerk eerder besig om te dwaal in die verkondiging van losse teorieë terwyl die Weg, die Waarheid en die Lewe misken word. Johannes 14:6: "Jesus antwoord hom: Ek is die weg en die waarheid en die lewe; niemand kom na die Vader behalwe deur My nie.”
Sal u dié vraag met eerlikheid kan beantwoord: Wie dien u werklik in u amp, professor? Of sou hierdie vraag ook na u mening irrelevant wees?
Die uwe,
J.F. Ollewagen