Gedagtes vir elke dag
Of lees almal by Gedagtes vir elke dag
Mense is soos wyn. Sommige verander met die jare in asyn terwyl ander weer verbeter.
AS ONS MET HOM STERF
Hannes Ollewagen
2 Tim. 2:1-13
“…want as ons met Hom gesterf het, sal ons ook met Hom lewe.” (:11).
Geliefdes, is daar vir ‘n gelowige, opregte kind van God enige groter voorreg of vreugde as om mét Hom te kan lewe? Ons moet tog nie die denkfout maak dat hierdie voorreg eers vir ons ná ons aardse dood wag nie. Nee, hierdie voorreg, en ook die verantwoordelikheid van ‘n lewe saam met Christus is reeds hier op aarde ons deel. Dit sal natuurlik na volmaking oorgaan nadat ons aardse tentwoning afgebreek en ons met ‘n verheerlikte liggaam oorklee is. Maar dit beteken nie dat ons reeds op aarde geen deel hieraan het nie, geliefdes. “Nie dat ek dit al verkry het of al volmaak is nie, maar ek jaag daarna of ek dit ook kan gryp, omdat ek ook deur Christus Jesus gegryp is.” (Fil. 3:12).
Ons lees ook oor hierdie saak in Paulus se brief aan die Fillipense. In Fil. 3:10 lees ons van hierdie opdrag aan gelowiges om aan die dood van Christus gelykvorming te raak. “...sodat ek Hom kan ken en die krag van sy opstanding en die gemeenskap aan sy lyde terwyl ek aan sy dood gelykvorming word,”. En hierdie is geen maklike opdrag nie. Ons is mos as mense net te lief vir onsself, vir ons eie wil en ook om na ons eie begeerlikhede en wil te handel. En om in waarheid met die HERE te leef, moet ons hierdie “eie-ek” kruisig ten einde ons eie wil volkome aan die wil van die HERE te onderwerp. Ons moet ophou om ten alle koste ons eie toekoms te probeer bepaal, maar Hom gelowig met ons toekoms vertrou. Ja, ons moet daagliks ons eie lewe afsterf sodat ons elke dag meer en meer in Christus sal leef. En sodoende sal ons ook toenemend aan die Beeld van onse HERE gelykvormig kan word. Paulus getuig ook hiervan in 1 Kor. 15:31:”Ek sterf dag vir dag, broeders, so waar as ek op julle roem in Christus Jesus, onse Here.” Hierdie woorde bevestig vir ons dat ons lewe saam met Christus nie eers ná ons liggaamlike dood hier op aarde begin nie, want ons weet dat hierdie liggaamlike dood net een maal kan plaasvind. Dit kan nie daagliks herhaal word nie.
Paulus was ook nie die eerste persoon om oor hierdie dood van ‘n gelowige melding te maak nie, hierdie dood wat nodig is om ons lewe volkome in diensbaarheid aan die wil van die HERE te onderwerp. Ons lees in Psalm 116:15 waar die Psalmdigter verklaar dat hierdie dood van ‘n kind van die HERE in sy oë kosbaar is. “Kosbaar is in die oë van die HERE die dood van sy gunsgenote.” Kosbaar is dit vir die HERE om te sien wanneer ‘n mens,sy gunsgenote, sy kinders, die punt bereik waar hulle begeer om hul eie lewens, volgens die voorbeeld van Christus, af te lê sodat hulle ‘n lewe kan nastreef waarin hulle Hom bo alles stel en daarna streef om Hom bo alles te behaag en te gehoorsaam. Kosbaar is dit vir die HERE om sy geliefde kinders te sien in ‘n lewe waar hulself nie die belangrikste plek in hul lewens wil inneem nie, maar Hom op die eretroon van hul lewens wil plaas.
Hierdie waarheid uit die Woord van die HERE onderstreep vir ons vandag dan ook weer die sataniese aard van die humanisme. Hierdie dwaling wat lynreg staan met dit wat ons vandag uit die woord van die HERE leer. ‘n Dwaling wat aan die mens verkondig dat God nie die ereplek in ‘n mens se lewe het nie, maar dat elke mens op die troon van sy eie lewe moet sit. Hierdie dwaling wat die verheffing van die mens en die kruisiging van Christus eerder voorstaan as die kruisiging van die mens en die verheffing van Christus! Wat ‘n walglike, siek, verwaande dwaling. En die vrug van hierdie leuen van die satan en sy dienaars is wêreldwyd sigbaar waar onmin, agterdog, liefdeloosheid, selfsug, vyandskap en dergelike dinge oraloor sigbaar is en chaos veroorsaak.
Geliefdes, mag onse HERE Jesus Christus ons daartoe help om die dwalinge en versoekinge hier op aarde te weerstaan. En mag Hy ons die innerlike krag verleen om onsself in die dood oor te lewer sodat sy lewe ook in ons sterflike vlees openbaar kan word. “Want altyd word ons wat lewe, oorgelewer in die dood om Jesus wil, sodat ook die lewe van Jesus in ons sterflike vlees openbaar kan word.” (2 Kor. 4:11).