Gedagtes vir elke dag
Of lees almal by Gedagtes vir elke dag
Beleef jy baie fisiese pyn, teleurstellings, of verlies in jou gemoed? Onthou wat God vir jou sê: "Voordat ek jou in die moederskoot gevorm het, het Ek jou geken; en voordat jy uit die liggaam voortgekom het, het Ek jou geheilig..." Jeremia 1:5
DIENSBAAR AAN HOM
Hannes Ollewagen
Markus 8:34-38
“EN toe Hy die skare saam met sy dissipels na Hom geroep het, sê Hy vir hulle: Wie agter My aan wil kom, moet homself verloën en sy kruis opneem en My volg.” (:34)
Die voorspoedgodsdiens is geen onbekende term in ons samelewing en tyd nie. Dit is iets wat oor die afgelope vier-tot-vyf dekades geweldige oplewing gesien het. En namate hierdie dwaling saam met die siening van humanisme na bo geskiet het, het mense se geloofslewe afwaarts getuimel. Die mens het a.g.v. hierdie wanopvattings die persepsie ontwikkel dat God in die mens se diens moet staan om hom uit nood te red (al is dit deur sy eie sondige en wederstrewige optrede veroorsaak) en gedurig met voorspoed en gemak moet seën. Die mens is hiervolgens “geregtig” op ’n lewe waar alles na sy wil geskik moet word en moet gebeur en waar God op sy aandrang moet handel om sy begeertes te bevredig. Hier is verder geen verantwoordelikheid wat die mens moet nakom nie – nie teenoor God of sy medemens nie. Die woorde van Christus uit Markus 8:34 onderstreep egter vir ons die verkeerdheid van die humanistiese lewensbeskouing sowel as die teologiese wanopvatting van die voorspoedsteologie en natuurlik die denkrigting wat oor die afgelope paar dekades by mense posgevat het.
Die woorde van Christus uit Markus 8:34 herinner ons opnuut aan ons verantwoordelikheid teenoor God sowel as die posisie waarin ons teenoor Hom staan. Ons beklee nie die koningskap in ons eie lewe met God as ons onderdaan nie. Hy is die Koning en ons die diensknegte wat beklee is met die voorreg om só ’n wonderlike Meester te mag dien. ’n Meester wat medelye met ons swakhede het. ’n Meester wat ons nie vermoei en verniel tot sy selfsugtige voordeel nie. ’n Meester wat eintlik niks van ons nodig het nie. “Ek hoef uit jou huis geen stier te neem of bokke uit jou krale nie; want al die wilde diere van die bos is myne, die vee op berge by duisende. Ek ken al die voëls van die berge, en wat roer op die veld, is van My. As Ek honger het, sal Ek jou dit nie sê nie; want die wêreld is myne en sy volheid.” (Ps. 50:9-12). ’n Meester wat ons barmhartig en genadig is en ons in ’n sagte juk laat trek. “Kom na My toe, almal wat vermoeid en belas is, en Ek sal julle rus gee. Neem my juk op julle en leer van My, want Ek is sagmoedig en nederig van hart, en julle sal rus vind vir julle siele; want my juk is sag en my las is lig.” (Matt. 11:28-30).
Dit is verder duidelik uit Markus 8:34 dat die persepsie dat ons God moet dien omdat dit tot ons aardse voordeel, voorspoed en gemak sal wees, ’n baie groot wanopvatting in die Godsdiens is. Ek sê nie daarmee dat diensbaarheid aan God impliseer ons altyd moet swaarkry en leed verduur nie. God is tog nie onbarmhartig teenoor sy diensknegte nie. Dit is vir ons op verskeie plekke uit sy Woord duidelik. “En Hy sê vir hulle: Kom julle self in die eensaamheid na 'n verlate plek en rus 'n bietjie. Want daar was baie wat kom en gaan, en hulle het selfs geen geskikte tyd gehad om te eet nie.” (Mark. 6:31). En Paulus getuig ook self hiervan in sy brief aan die Filippense. “Ek weet om verneder te word, ek weet ook om oorvloed te hê; in elke opsig en in alle dinge is ek onderrig: om versadig te word sowel as om honger te ly, om oorvloed te hê sowel as om gebrek te ly.” (Fil. 4:12). ’n Persepsie dat diensbaarheid aan Hom wel vir ons altyd net voorspoed, gemak en vreugde sal inhou is egter ’n aanduiding dat ons nie opreg teenoor Hom is nie. So ’n “diensbaarheid” word nie deur ’n opregte liefde vir Hom aangevuur nie, maar eerder deur ’n liefde vir onsself en ons eie voorspoed en gemak. En dit is nie vir Hom aanvaarbaar nie. Hy eis opregtheid van ons. “Opreg moet jy wees met die Here jou God.” (Deut. 18:13).
Geliefdes, dit is duidelik uit ons Skrifgedeelte dat ons in opregte diensbaarheid aan Hom verseker kan wees dat ons diensbaarheid aan Hom van ons opoffering sal vra en dat ons uit liefde vir Hom daartoe bereid moet wees. Ons moet elke dag bereid wees om die opofferings te maak wat Hy van ons vra as ons Hom wil volg. En dit sal elke dag van ons vra om Hom bo ons eie begeertes en ons eie wil te stel – m.a.w. dat ons Hom elke dag hoër as onsself sal stel. Ja, kosbaar is dit in sy oë wanneer ons ons lewe neerlê en onsself afsterf sodat ons ons lewe in Hom kan opneem. “Kosbaar is in die oë van die Here die dood van sy gunsgenote. Ag, Here, sekerlik, ek is u kneg, ek is u kneg, die seun van u diensmaagd; U het my bande losgemaak.” (Ps. 116:15&16). Ons sien ook God se behae in hierdie selfopofferende en onselfsugtige gesindheid in die lewe van Salomo. Salomo slaag hierdie toets met lof wanneer hierdie deugde van hom deur God op die proef gestel word. “Toe verskyn die Here in Gíbeon in 'n nagtelike droom aan Salomo; en God het gesê: Begeer wat Ek jou moet gee. En Salomo sê: U het aan u kneg, my vader Dawid, 'n groot guns bewys, net soos hy voor u aangesig gewandel het in trou en in geregtigheid en in opregtheid van hart met U; en U het vir hom hierdie groot guns bewaar, dat U hom 'n seun gegee het wat op sy troon sit, soos dit vandag is. Nou dan, Here my God, U het u kneg koning gemaak in my vader Dawid se plek; maar ek is 'n jong seun; ek weet nie om uit of in te gaan nie. En u kneg is midde onder u volk wat U verkies het, 'n groot volk wat nie getel of bereken kan word weens die menigte nie. Gee dus aan u kneg 'n opmerksame hart om reg te spreek oor u volk, om tussen goed en kwaad te onderskei, want wie sou hierdie talryke volk van U kan regeer? En dit was goed in die oë van die Here dat Salomo dit begeer het. En God het vir hom gesê: Omdat jy hierdie versoek gedoen het en nie vir jou 'n lang lewe begeer het en nie vir jou rykdom begeer het en nie die lewe van jou vyande begeer het nie, maar vir jou verstand begeer het om regsake te verhoor, so doen Ek dan volgens jou woord: Kyk, Ek gee jou 'n wyse en verstandige hart, sodat een soos jy vóór jou nie gewees het en een soos jy ná jou nie sal opstaan nie. Ja, selfs wat jy nie begeer het nie, sal Ek jou gee, rykdom sowel as eer, sodat onder die konings niemand soos jy sal wees al jou dae nie.” (1 Kon. 3:5-13).
Mag hierdie vermaning en voorbeelde uit God se Woord ons help om weer perspektief in ons lewe te kry midde ’n donker samelewing. Ja, mag dit ons help om die verkeerheid daarvan raak te sien om iets alleen te doen vir die geld wat ons daaruit kan maak, die voordeel of eer wat ons vir onsself daaruit kan trek en dergelike verkeerde motiverings. En mag dit ons herinner dat ons as ware gelowige kinders van Hom tot selfopoffering bereid moet wees en ons hele lewe in diensbaarheid aan Hom moet wy. “As ons dan saam met Christus gesterf het, glo ons dat ons ook saam met Hom sal lewe,omdat ons weet dat Christus, nadat Hy opgewek is uit die dode, nie meer sterf nie. Die dood heers oor Hom nie meer nie. Want die dood wat Hy gesterf het, het Hy vir die sonde eens en vir altyd gesterwe; maar die lewe wat Hy leef, leef Hy vir God. So moet julle ook reken dat julle wel vir die sonde dood is, maar lewend is vir God in Christus Jesus, onse Here. Laat die sonde dan in julle sterflike liggaam nie heers dat julle aan sy begeerlikhede gehoorsaam sou wees nie. En moenie julle lede stel tot beskikking van die sonde as werktuie van ongeregtigheid nie, maar stel julleself tot beskikking van God as mense wat uit die dode lewend geword het, en julle lede as werktuie van geregtigheid in die diens van God.” (Rom. 6:8-13).