Gedagtes vir elke dag
Of lees almal by Gedagtes vir elke dag
As jy jou lewe lank sonder pyn wil lewe, moet òf 'n lyk, òf 'n god wees. Weet dus dat jy in jou lewe sal ly. Maar daar is 'n troos: troos jy ander teen hulle lyding, dit help.
KRY WEER HOOP…
…EN VERSTERK JOU GELOOF
Daar kom tye ook in die lewe van ’n opreg-gelowige dat dit werklik ellendig gaan. Alles loop skeef, alle hoop vervaag... die ergste is dat ek glo die Here se hand teen my is. Hierdie skrywer was in so ’n posisie: “Ek is die man wat ellende belewe het. Die Here het my met sy toorn geslaan”. (Klaagliedere 3:1). Hy het lyding in die uiterste vorm ervaar. Hierdie swaarkry was so erg dat dit geblyk het dat bid nie eers meer help nie! “Al roep ek en al smeek ek om hulp, Hy weier om my gebed te verhoor.” (3:8) Daar was net geen uitkomkans nie. Het jy al só vasgekeer gevoel in ellende met geen uitsig op verlossing nie?
As mens in ellende verkeer, as mens benoud is, dan kom daar allerhande gedagtes of herinneringe by jou op. Die terugdink aan foute, sonde, verlore kanse, dinge wat nooit weer reggemaak of gewens kan word nie. Hoe meer ek dink, hoe meer ondraaglik raak my situasie. “Ek het gedink dit is klaar met my en met my hoop op die Here. Die gedagte aan my ellende en my vreemdelingskap is gal en gif vir my; as ek daaroor nadink, draai my gedagtes vas.”(Vers 18-20).
Gelukkig het die digter nie op hierdie punt ophou dink nie. Hy het verder gedink en dit het ’n verandering gebring. VERS 21! Hier kom ‘n heerlike draaipunt! “Maar dit sal ek ter harte neem en om dié rede bly ek hoop:” Nadenke en herinnering kan ’n stok wees waarmee die reus ‘Wanhoop’ mens stukkend kan slaan, maar die bepeinsing van Bybelse beloftes en waarhede is juis ’n vuurhoutjie waarmee ek weer die lamp van hoop aan die brand kan steek. Dit is ’n lig wat al die duisternis van wanhoop en moedeloosheid kan verdryf.
Watter gedagtes aan Goddelike waarhede het die vlam van hoop weer vir hierdie man in sy ellende aangesteek? Kom kyk saam in Klaagliedere:
Sien raak dat jy deur God se genade nog nie vergaan het nie. “…deur die liefde van die Here het ons nie vergaan nie;” (22) Maak oop jou oë vir God se getrouheid in jou lewe ten spyte van jou baie moeilike omstandighede, wankelende geloof of depressie. “Tel jou seëninge” bly na al die jare steeds goeie raad vir elkeen van ons (as jy sukkel, vat ‘n stuk papier en skryf dit neer, jy kan dalk verbaas wees hoe lank die lys raak). God het nie verander nie, sy getrouheid is ‘n gegewe. “God bly getrou, by Hom is daar onbeperkte ontferming, daar is geen einde aan sy ontferming nie, dit is elke môre nuut. U trou is groot.” (22/23) Besef : God is nog steeds my God! “Ek sê vir myself: Die Here is my lewe, daarom hoop ek op Hom." (24) Miskien het jy alles op aarde verloor... maar kind van God, jy het nie jou Here verloor nie. Hy is mos meer as alles en almal. Daar bestaan nog steeds iets soos gebed en God se Woord. "Die Here is goed vir die wat op Hom bly hoop, vir die mens wat na sy wil vra: dit is goed om geduldig te wag op die hulp van die Here" (25,26) Hierdie man in ellende herinner homself aan ’n vaste uitkoms. Gebed en vertroue op God. Ja, ten spyte van sy negatiewe belewenis oor gebed (vers 8) dring die besef maar weer tot hom deur: Daar is nog steeds iets soos gebed, daar is nog steeds God se beloftes! Wanneer alle mense en middele my teleurgestel het, kan ek in my angs en nood nog steeds na my Vader roep, Hom aan sy beloftes herinner. Ja, daar kom tye dat dit voel of ons gebede nie help nie, asof God sy ore sluit. Dan moet ons weer sy beloftes oor gebed opnuut glo. “Roep my aan in die dag van benoudheid... bid en vir julle sal gegee word…” Die troon van God is ’n genadetroon en deur gebed in Jesus se naam kry ons toegang tot daardie troon.
Dink daaroor en besef dat God ‘n plan met jou lewe het. Ook hierdie ellende wat ek nou beleef is nie maar net ‘n wrede toevalligheid nie. Dis God wat dit oor my pad laat kom het… Daar is sin en rede in alles, al is dit vir my menslike logika ontoeganklik. “…dit is goed vir ‘n mens om sy las in sy jeug te dra. Laat hy in sy eensaamheid geduldig bly as God hom die las opgelê het, laat hy hom diep verootmoedig—miskien is daar hoop— laat hy sy wang draai vir wie hom slaan, laat hy maar oorvloedig smaad ondervind.”(27-30) Laat ons ons onderwerp aan God se tugtiging. Hy het ‘n heerlike doel daarmee. Hebreërs 12:10,11 sê dat God se doel daarmee is om ons in sy heiligheid te laat deel. Hierdie swaarkry (en dis uiters pynlik en voel beslis soos iets om oor te huil) is dus deel van God se goedheid oor jou! Regtig? Ja! Psalm 119:71 maak hierdie onbegryplik heerlike stelling : “Dit is vir my goed dat ek swaargekry het, want daardeur het ek U voorskrifte geleer.” En kyk wat sê vers 75: “Ek weet, Here, dat u bepalings regverdig is. Dat U my laat swaarkry, is ‘n teken van u trou.” Spurgeon sê dit so mooi : “Baie van God se beloftes is in onsigbare ink geskryf, wat jy nie kan lees voordat die vuur van beproewing nie die letters sigbaar maak nie. (Soos daardie geheime briefies wat mens met uiesap of suurlemoen geskryf het toe ons kinders was.)
Hierdie swaarkry, hoe erg ook al is net tydelik. Kind van God, jou ellende, gaan nie vir ewig duur nie. “Die Here verstoot ‘n mens nie vir altyd nie; as Hy beproewing oor ‘n mens gebring het, ontferm Hy Hom weer, want sy liefde is groot: dit is teen sy sin dat Hy mense in ellende en beproewing bring.”(31-33)
Die bittere swaar waardeur Jesus aan die kruis moes gaan, het nie die einde van sy Vader se liefde vir Hom beteken nie. Die lyding, ellende en verwerping waaronder God se kinders gebuk gaan, mag ons nooit die afleiding laat maak dat Hy nie meer vir ons lief is nie.
Daar is ’n vaste waarheid in God se Woord wat ook vir jou kan hoop bring. 1 Timoteus 1:15 lees : “Dit is ‘n betroubare woord en kan sonder voorbehoud aanvaar word: Christus Jesus het in die wêreld gekom om sondaars te verlos. Van hulle is ek die grootste.” Hy bring hoop vir sondaars, hoor dit : “sondaars”! Selfs regte, werklike, aaklige sondaars is welkom by Jesus! Hoeveel te meer nie jy, kind van God, vir wie Hy elke dag sorg nie?