Gedagtes vir elke dag
Of lees almal by Gedagtes vir elke dag
As ons weet dat daar eintlik net twee keuses in die lewe is sal ons meer betrokke raak by die dinge wat gedoen moet word: ons kan kies om betrokke te wees en die pyn daarmee saam verwerk; of ons kan kies om onbetrokke by dinge om ons te wees en die verveling daarvan verduur.
LEIDING VAN DIE HEILIGE GEES (2)
GOD LEI DEUR TEKENS, MAAR WEES VERSIGTIG!
J.A. Loubser
" Dit het beslis nie om Gideon se eie belang gegaan nie. In hierdie opsig verskil dit baie van die tekens wat mense vandag soek."
Wanneer mense leiding soek, is hulle dikwels op die uitkyk vir tekens as aanduiding van die regte of verkeerde besluite.
God lei mense deur tekens aan hulle te gee. Dit is immers 'n integrale deel van die Ou Testament se boodskap. Die tekens word soms gegee op versoek (soos in die geval van Moses se kiere, en Gideon se wol) of God gee dit vanself (soos Noag se reënboog en die bloed op die deurkosyne met die eerste pasga). Die Goddelike tekens bevestig enersyds die woorde van die profete, maar dit maak andersyds ook die boodskap sigbaar.
Ook Gideon, van wie ons in Rigters 6 lees, het 'n teken gesoek – en gekry. Dit was te verwagte dat die varsgeskeerde wol wat hy die nag buite op die harde dorsvloer gelaat het laaste droog sou word in die sonlig. Dit het egter eerste droog geword – presies soos Gideon van God gevra het! Hy kon nie anders as om dit as 'n teken van Bo te sien nie.
Dit is nou maar so dat die moderne mens skepties is wanneer hy van tekens en wonderwerke hoor. Dit is ook verstaanbaar. Ons leef immers in 'n tyd waarin daar wetenskaplike verklarings vir alles gesoek en gegee word. Die bonatuurlike is vir mense vreemd. Verder is daar die gevaar dat mense met tekens sal "smous."
Indien mense beweer dat hulle tekens van die Here ontvang het, is dit vir buitestaanders dikwels onmoontlik om die waarheidsgehalte van sulke uitsprake te kontroleer en kry hulle dikwels die gevoel dat hulle uitgelewer word aan die manipulasie van sulke mense.
Wat vir die skeptici onder ons interessant behoort te wees, is dat Jesus self ons teen 'n sondige soeke na tekens waarsku. Oorweeg byvoorbeeld die volgende uitsprake in die Nuwe Testament:
- Matt 12:38-41: "Party van die skrifgeleerdes en die Fariseërs sê toe vir Hom (Jesus): 'Meneer, ons wil 'n wonderteken van u sien.' Maar Hy antwoord hulle: ' 'n Slegte en afvallige geslag vra 'n teken, en geen tekens sal aan hulle gegee word nie, behalwe die tekens van die profeet Jona. Soos Jona drie dae en nagte binne in die maag van die groot vis was, so sal die Seun van die mens drie dae en nagte binne in die aarde wees.' "
- Joh 4:48: "Toe mense na Jesus kom en Hom vra om 'n siek seun in Kapernaum gesond te maak, sê Hy verwytend: ' As julle nie tekens en wonders sien nie, glo julle eenvoudig.' "
- 1 Kor 1:22-24: Paulus sê hier: "Die Jode vra wondertekens en die Grieke soek wysheid, maar ons verkondig Christus wat gekruisig is. Vir die Jode is dit 'n aanstoot en vir die ander is dit onsin, maar vir dié wat deur God geroep is, Jode sowel as Grieke, is Christus die krag van God en die wysheid van God."
Miskien moet ons eerder van "wondertekens" as van "wonderwerke" praat. Soms het God die profete van die Ou Testament beveel om self sekere handelinge uit te voer as tekens vir die volk. Die Duitse Ou-Testamentikus Von Rad sê dat die profetiese tekens eenvoudig 'n versterkte vorm van profetiese verkondiging was. Soos in die geval van die profeet Hosea kon die profeet se eie lewe 'n teken wees. 'n Teken kon selfs 'n allesdaagse verskynsel wees. In die meeste gevalle was dit egter iets buitengewoons.
Uit die geskiedenis van Gideon kan hedendaagse mense 'n paar waardevolle dinge leer in verband met die leiding van die Here:
- Die omstandighede waarbinne God 'n teken aan Gideon gegee het, was uitsonderlik. Die toekoms van die verbondsvolk was op die spel. Daar was niemand om te help nie. Gideon self was huiwerig. Hy het reeds sy lewe op die spel geplaas deur die Baälbeeld te vernietig en die mense wou hom doodmaak. Nou het hy en sy mense op die vooraand van 'n groot oorlog gestaan waarin hulle maar min kans op sukses gehad het.
- Verder was Gideon se teken deur God self gegee. God self het vir Gideon geroep tot diens in sy koninkryk. So was dit deel van die heilsgeskiedenis wat sou uitloop op die koms van die Messias. Dit het beslis nie om Gideon se eie belang gegaan nie. In hierdie opsig verskil dit baie van die tekens wat mense vandag soek.
Vir gelowiges vandag is dít wat Jesus Christus self oor tekens leer, van die grootste belang. Jesus sê dat Hy self die enigste teken is wat in die bedeling van die Nuwe Testament aan sondaarmense gegee sal word. Hy self is die teken van Jona. Hy self is die vervulling van al die tekens van die Ou Testament. Dit word reeds in die Ou Testament geprofeteer in Jesaja 7:14: "Die Here sal daarom self vir julle 'n teken gee: 'n Jong vrou sal swanger word en 'n seun in die wêreld bring en sy sal hom Immanuel noem."
Van hierdie teken vertel Lukas 2:11-12: "Vandag is daar vir julle in die stad van Dawid die Verlosser gebore, Christus die Here! En dit is vir julle die teken: julle sal 'n kindjie vind wat in doeke toegedraai is en in 'n krip lê..."
Dit is ook die boodskap van Hebreërs 1: "In die verlede het God baie keer en op baie maniere met ons voorvaders gepraat deur die profete, maar nou, in hierdie laaste dae het Hy met ons gepraat deur die Seun... Uit Hom straal die heerlikheid van God..."
In die lig van wat hierbo gesê is, moet ons nou die vraag beantwoord of ons as Nuwe Testamentiese gelowiges na tekens behoort te soek. Wat hierdie vraag betref, is drie opmerkings van pas:
- Die soeke na tekens behoort nie deel van ons normale Christelike lewe te wees nie. Tekens is eerder bedoel vir die ongelowiges. Die liefde en krag van ons Christelike lewens moet so duidelik na vore kom dat die ongelowiges dit as 'n teken van God kan sien en ervaar.
- Nietemin moet ons sensitief wees vir God se handeling in die geskiedenis. Ons mag God nie aan bande lê en sê dat Hy vandag nie meer tekens kan gee nie. Sulke tekens sal egter steeds in regstreekse verband tot die verlossingswerk van Jesus Christus staan.
- Ons moet veral sensitief wees vir wat God in sy Woord leer. Die Gees lei gelowiges deur hulle aan die Woord van Jesus te herinner en na sy Beeld te hervorm.
Ons kan hierdie gedeelte afsluit deur 'n vraag aan onsself te stel: "Is my lewe en die gemeente waarin ek aanbid 'n teken van die koninkryk? " Dit is beter om 'n teken te wees as om een te soek!