Dr. Michael Greger

WAAROM DIE NUWE BOTTERGIER?

“Botter is terug”.   "Beëindig die oorlog teen botter".   "Botter: Die nuwe gesondheidskos"...   Dit is oral in die media. Wat gaan aan met botter?

Reeds aan die einde van 2008 het die wêreldwye suiwelbedryf 'n vergadering in Mexikostad gehou en planne gemaak om "die negatiewe impak van melkvet deur reguleerders en mediese professionele persone te neutraliseer". Daarna het hulle wetenskaplikes gevind wat saam met hulle sou werk en instansies wat hulle van befondsing sou voorsien om "navorsing" uit te voer wat die publiek die verband tussen versadigde vet en siekte nie sou laat glo nie. En sedert die begin van 2009 het ons artikels gesien en mediaberigte gehoor wat gebaseer is op baie wankelrige wetenskap wat die voordele van versadigde diervette bevorder.

Vroeg in 2014 het navorsers data van verskeie van die swak navorsingswerke gekombineer, en 'n referaat is gepubliseer wat berig dat geen beduidende verband tussen versadigde vet en hartsiektes gevind is nie.

Soos ons kon verwag, het die hoofstroommedia hierdie nuus gegryp en daarmee gehardloop. Dalk was hulle ook omgekoop soos onlangs met die Covid-kabaal toe hulle aanhoudend valse inligting berig het. Verskeie wetenskaplikes – en selfs sommige van die verslagskrywers self – het egter kommer uitgespreek oor die talle foute in die verslag en het gewys waar verkeerde getalle uit baie van die oorspronklike studies getrek is. Baie wetenskaplikes het gevra vir terugtrekking van die foutiewe inligtingstuk maar natuurlik het dit op dowe ore geval want die Geldmag was agter hierdie opvoering.

Verder was daar verskeie studies beskikbaar wat getoon het dat diëte laag in versadigde vette die voorkoms van hartaanvalle en beroertes verminder maar natuurlik nie by hierdie analise betrokke was nie.

Doelbewuste groot vet verwarring is geskep deurdat diëte wat ryk is aan botter dikwels vergelyk is met ongesonde laevet diëte wat uit verwerkte voedsel bestaan. Dit is soos om jou duim met 'n baksteen te slaan, teenoor om jou hele hand met 'n baksteen te slaan. Sekerlik, om net my duim te slaan, sou 'n bietjie beter wees, maar as ek 'n keuse gehad het, sou ek liewer albei scenario's vermy.

Die referaat wat hierbo genoem is, het ook nagelaat om aan te spreek wat mense wat hul inname van versadigde vette verminder, eerder dan verbruik. Dit was ‘n doelbewuste strategie want wanneer versadigde vet met gemorskos vervang word, is dit baie maklik om te sien hoe die vermindering van versadigde vetinname geen gesondheidsvoordele sal inhou nie. In die Time-artikel waarna in die begin van hierdie artikel verwys is, het die skrywer afgeroomde melk, margarien, aandeterolletjies en nie-vet slaaisous gelykgestel aan 'n laevet dieet. In vergelyking met hierdie baie patetiese voorbeeld van 'n laevet-dieet, is dit maklik om botter goed te laat lyk.

Vir jare het duisende navorsingwerke getoon dat 'n dieet gebaseer op vrugte, groente, volgraan, 'n matige hoeveelheid neute en sade, en 'n minimale hoeveelheid verwerkte voedsel, voorkomend is teen hartsiektes, kanker, diabetes, vetsug en kognitiewe agteruitgang.

Heel, plant-gebaseerde voedsel is wat die mens nodig, dis eenvoudig. Maar dit sal seker 'n taamlik vervelige storie vir Time wees.

Hier is net 'n paar voorbeelde van navorsing wat getoon het wat diervette aan jou kan doen:

Volgens 'n verslag van die Archives of Neurology benadeel oormaat cholesterol geheue, taal, oriëntasie en ander breinfunksies.

Harvard-navorsers het 'n voornemende ontleding van 90 655 premenopousale vroue van 26 tot 46 jaar gedoen en vasgestel die inname van diervet gedurende premenopousale jare word geassosieer met 'n verhoogde risiko van borskanker. ’n Verhoogde risiko is nie geassosieer met die eet van plantaardige vette nie.

International Journal of Obesity het berig oor 'n deursnit-studie wat getoon het hoe minder diereprodukte in die dieet, hoe minder gewig is oor 'n tydperk van 5 jaar opgetel.

In 2009 het die Adventiste Gesondheidstudie wat meer as 60 000 mans en vroue betrek het, bevind dat die voorkoms van diabetes by individue op 'n plantgebaseerde dieet 2,9% was, vergeleke met 7,6% by nie-vegetariërs.

In die Lifestyle Heart Trial het Ornish bevind dat 82% van pasiënte met gediagnoseerde hartsiektes wat 'n plantgebaseerde dieet gevolg het (wat 10% van kalorieë van vet, 15% tot 20% van proteïen en 70% tot 75% van koolhidrate toelaat, en minder as 5 mg cholesterol per dag) het 'n beduidende afname van arteriosklerose na een jaar gehad. Drie-en-vyftig persent van die kontrolegroep het progressie van arteriosklerose getoon.

Na 5 jaar het stenose in die plant-gebaseerde groep afgeneem. Die kontrolegroep het 'n progressie van stenose ervaar.

Plant-gebaseerde dieet het verminderde risiko van kardiovaskulêre siekte en totale sterfte by volwassenes bewys.

Die Advieskomitee vir Dieetriglyne het bevind dat plant-gebaseerde diëte geassosieer word met 'n verminderde risiko van kardiovaskulêre siektes en sterftes in vergelyking met nie-plant-gebaseerde diëte.

Die koue feite:

Maak nie saak wat jy op TV, die internet, in boeke of in tydskrifte sien nie, studie na studie het getoon dat dierlike vette – insluitend botter – skadelik vir die gesondheid is. Sommige navorsing toon dat die vervanging van dierlike vette met plantolies ryk aan poli-onversadigde en mono-onversadigde vette die risiko van baie siektes verlaag, maar die beste opsie is om soveel olie as moontlik uit die dieet uit te skakel. ALLE olies is 'n verfynde/verwerkte produk en veroorsaak verskillende mates van inflammasie.

Wat moet ek eet!?!

Ons sal goed doen om oor te leun na 'n dieet wat gebaseer is op heel, plantvoedsel. Dit is belangrik om plantvette te eet, gebruik daarom avokado of hummus op brood (om ten minste die botter of margarien te vervang). Of eet sommer skoon avokado enige tyd! Alle heel groente en vrugte wat olieryk is soos olywe en avokado asook neute en sade veroorsaak nie die inflammasie wat die uitgeparste olies doen nie. So werk dit ook met vrugte en groente: moenie die sappe uitdruk nie, dit is waar die sure is. Eet die heel vrug of groente want die vesel is die alkaliese deel wat in volmaakte harmonie met die suur is net soos God dit bedoel het in Genesis 1:

11 En God het gesê: Laat die aarde voortbring grasspruitjies, plante wat saad gee en bome wat, volgens hulle soorte, vrugte dra, waarin hulle saad is, op die aarde. En dit was so.

12 Die aarde het voortgebring grasspruitjies, plante wat saad gee volgens hulle soorte en bome wat vrugte dra, waarin hulle saad is, volgens hulle soorte. Toe sien God dat dit goed was.

29 Verder het God gesê: Ek gee nou aan julle al die plante wat saad gee, wat op die hele aarde is, en al die bome waar boomvrugte aan is, wat saad dra. Dit sal julle *voedsel wees.

Dit is dus die groente EN die vrugte, neute en sade, wat God aan die mens as voedsel gegee het. As die mens dit nie ten dode toe verwerk het nie en heel bly gebruik het, sou daar moontlik geen siektes ontstaan het nie.

Ter afsluiting, onthou wat die boek Daniël beskryf oor Daniël en sy drie vriende wat ná hulle ontvoering na ‘n vreemde land, geweier het om die koning se ryk maaltye te aanvaar:

5 En die koning het vir hulle *’n daaglikse porsie bestem uit die spys van die koning en van die wyn wat hy gedrink het; om hulle so drie jaar lank op te voed, sodat hulle aan die einde daarvan *voor die koning kan dien.

6 En onder hulle was uit die kinders van Juda: Daniël, *Hanánja, Mísael en Asárja.

8 En Daniël het hom voorgeneem om hom nie te verontreinig met *die spys van die koning of met die wyn wat hy gedrink het nie; daarom het hy die owerste van die hofdienaars vergunning gevra dat hy hom nie hoef te verontreinig nie.

9 En God het aan Daniël guns en barmhartigheid verleen by die owerste van die hofdienaars.

10 En die owerste van die hofdienaars het aan Daniël gesê: Ek vrees my heer die koning, wat julle voedsel en julle drank vasgestel het; want waarom moet hy sien dat julle aangesigte meer vervalle is as dié van die jong seuns wat van julle leeftyd is, sodat julle my hoof by die koning met skuld sou belaai?

11 Maar Daniël het aan die bediende gesê wat die owerste van die hofdienaars oor Daniël, Hanánja, Mísael en Asárja aangestel het:

12 Stel tog u dienaars tien dae lank op die proef, en laat hulle ons van die groente gee om te eet en water om te drink;

13 laat daarna ons voorkoms en die voorkoms van die jong seuns wat die spys van die koning eet, deur u besigtig word; handel dan met u dienaars soos u bevinding sal wees.

14 Hy het toe na hulle geluister in hierdie saak en hulle tien dae lank op die proef gestel.

15 En aan die einde van tien dae het hulle voorkoms beter en hulle voller van vlees gelyk as al die jong seuns wat die spys van die koning geëet het.

16 So het dan die bediende hulle spys en die wyn wat hulle moes drink, weggeneem en aan hulle groente gegee.

En die Woord sê Daniël was mooi van aangesig.

Daar het u dit!