Gedagtes vir elke dag
Of lees almal by Gedagtes vir elke dag
Daarom gaan ons met die oë gevestig op God die donker toekoms sonder vrees tegemoet. Al weet ons nie wat die toekoms inhou nie, weet ons vir seker in Wie se hand dit is. Die toekoms is so helder soos God se beloftes want die toekoms behoort aan Hom. En waar ons gaan, is Hy by sy kinders: “En kyk, Ek is met julle al die dae tot aan die voleinding van die wêreld”.
STUDIE VAN DIE OU TESTAMENT (22)
DIE AFRIKAANSE PROTESTANTSE BYBELSKOOL
Studieleier: ds. Andrè van den Berg (Sr)
Lees reeks by Studie van die Ou Testament
JOSUA
LES 1
ISRAEL TREK KANAäN BINNE
Jos 1-5
1. Voorwaarts mars!
Ná die dood van Moses is Josua beveel om die beloofde land binne te trek. Hy het van God ʼn waarskuwing sowel as ʼn belofte ontvang. Hulle sou van God elke plek waarop hulle trap as woongebied ontvang (Deut.11:24). Op daardie tydstip was dit die grootste ryksgebied wat Israel ooit gehad het. Salomo s’n sou egter ʼn bietjie groter wees (1 Kon 4:21). So ook die ryksgebied van ʼn latere Makkabeërvors in die intertestamentêre tyd (die tydperk tussen Malèagi en Mattheűs).
Daarna het Josua die opmarsbevel aan die volksopsigters oorgelaat wat stiptelike gehoorsaamheid beloof het. God het egter ook ʼn waarskuwing aan die Israeliete gerig - elke wederstrewige sou gedood word. Daarna het ʼn gees van opgewondenheid in die laer geheers. Israel was gereed om sy erfenis in besit te neem!
2. Die twee verkenners
Josua het twee verkenners na Jerigo gestuur om dit te verken. Toe die koning van Jerigo van hulle verneem, is hulle deur Ragab, die eienares van die herberg waar hulle tuis was, versteek. Hierdie herberg het maar ʼn slegte naam gehad en was heelwaarskynlik ook as ʼn bordeel bedryf. Dit was egter in die stadsmuur ingebou sodat ongewensdes vinnige kon pad gee as dit nodig was.
Ragab het die verkenners weggesteek sodat die koning se wagte hulle nie kon kry nie. Sy was strenggesproke ʼn volksverraaier wat deur God se beskikking tot Israel se redding gekom het. Ragab het heelwaarskynlik van Israel se trek deur die Skelfsee en die vernietiging van die twee konings gehoor en die verkenners uit vrees vir haar en haar geliefdes se veiligheid gehelp. God het dit egter so beskik (Hebr.11:31; Jak.2:25). Sy word later selfs in die geslagsregister van Christus opgeneem! (Mt.1:5).
Die verkenners het haar plegtig beloof om haar en haar geliefdes se lewens te spaar. Al wat sy moes doen, was om die rooi tou waarmee sy hulle teen die muur laat afsak het as uitkenteken aan die venster te bind. Daarna het die verkenners Jerigo verlaat en Josua oor die paniekstemming in die stad ingelig.
3. ʼn Wonderwerk by die Jordaanrivier
Toe Josua by die Jordaan aankom, was dit ʼn bruisende watermassa. Die sneeu wat op die Hermon gebergte gesmelt het, het die water sterk laat afkom. God het dit egter laat terugtrek sodat Israel, net soos by die Skelfsee, op droë grond kon deurtrek (Ps.114:3). God het by die uittog uit Egipte sowel as die intog in Kanaän dieselfde wonder gedoen. Hy het ʼn watermassa teruggehou. Die hoofstuk wat dit beskryf, stem ʼn mens tot onrus. Dis vol spanning en opdragte.
Nadat die laaste priesters met die verbondsark deur die Jordaan is, het die water weer voortgevloei. Daarna het die Israeliete twee klipstapels van 12 groot klippe elk ter herdenking van die wonder op die oewer opgerig. Hulle eerste rusplek was Gilgal op die oostelike grens van Jerigo. Daar het hulle ʼn tweede hoop klippe as ʼn gedenkteken opgestapel.
4. Die groot besnydenis en pasga
Die Amoriete en Kanaäniete het van die wonderwerk verneem en besluit om die Israeliete liefs met rus te laat. Dit het laasgenoemdes die kans gegee om twee groot plegtighede af te handel - die besnydenis en die viering van die pasga. Dit was die twee sakramente van die Ou Testament.
Feitlik alle mans is by die besnydenis betrek omdat diegene wat oor die Jordaan getrek het, feitlik almal in die woestyn gebore is en derhalwe nooit die voorgeskrewe verbondsteken ontvang het nie. God wou met Israel ʼn nuwe begin maak. Deur die besnydenis is die verbond wat deur die ongehoorsames geskend is, herstel. Daarom het Josua messe van klip laat maak en die besnydenis laat uitvoer. Daarna het die volk in die laer gebly totdat almal genees was.
Daarna is die tweede groot plegtigheid afgehandel - die pasga. Israel het die voorgeskrewe ongesuurde brode geëet (Ex.12:18-20) asook gebraaide koring. Dit was die eerste opbrengs van die land Kanaän. Daarna het die manna ophou val.
5. Josua maak hom gereed
Net voordat Josua die beloofde land in besit geneem het, het God by geleentheid baie ernstig met hom gepraat. Hy moes vir geen oomblik dink dat die verowering van die beloofde land deur sy eie toedoen of krygsvernuf sou geskied nie. Die volk sou sien en weet dat God kragtig optree.
Toe Josua later by Jerigo kom om die situasie uit ʼn militêre oog te bekyk, was die stadspoorte juis uit vrees vir ʼn vyandige aanval gesluit (Jos.6:1). Terwyl hy nog daaroor gewonder het, het ʼn onbekende man met ʼn ontblote swaard skielik by hom gestaan en hom as die engel en leërowerste van God bekend gestel (Mt.26:53). Wat ʼn wonderlike troos was dit nie vir Josua om die hemelse opperbevelhebber wat vir Israel teen die vyand sou optree, persoonlik te kon ontmoet nie!
Daarna het Josua dieselfde bevel as ʼn Moses van ouds onvang om sy skoene uit te trek (Ex.3:5). Toe hy in eerbied voor God neerval, het hy van God bevele ontvang hoe om Jerigo te laat val. Dit sou nie deur wapengeweld wees soos wat hy gedink het nie. Josua moes die verbondsark rondom die stad dra en ramshorings op ʼn gegewe tyd blaas.
Vervolg...