Gedagtes vir elke dag
Of lees almal by Gedagtes vir elke dag
Wees nie haastig in jou gees om jou te vererg nie, want ergernis rus in die boesem van die dwase – Prediker 7:9
OM HOM TE GEHOORSAAM
Hannes Ollewagen
Heb. 10:1-18
“Daarom sê Hy, as Hy in die wêreld inkom: Slagoffer en spysoffer wou U nie hê nie, maar U het vir My ’n liggaam berei. Brandoffers en sondoffers het U nie behaag nie. Toe het Ek gesê: Kyk, Ek kom – in die boekrol is dit van My geskrywe – om u wil te doen, o God.”
Wanneer ons hierdie gedeelte lees kan ons vir ’n oomblik maklik die denkfout maak dat ons met ’n weerspreking uit God se Woord te make het. Sal God dit hier stel dat Hy geen behae in brandoffers en spysoffers het nie terwyl Hyself dit in die tyd van Moses as voorskrif gegee het? “Gee bevel aan die kinders van Israel en sê vir hulle: Julle moet daarvoor sorg om my offer, my spys vir my vuuroffers as lieflike geur vir My, op die bepaalde tyd aan My te bring.” (Núm. 28:2). Hierdie is beslis nie ’n weerspreking nie, maar eerder ’n skat wat ons help om die offerande aan God beter te verstaan. Ons het die voorbeeld van Christus se lewe wat dit vir ons uitlig. Christus het die volmaakte offer aan God gebring – Hy het homself in gehoorsaamheid aan God geoffer. “...en in gedaante gevind as 'n mens, het Hy Homself verneder deur gehoorsaam te word tot die dood toe, ja, die dood van die kruis.” (Fil. 2:8). Hy, die sondelose, het nie nodig gehad om enige offer tot versoening aan God te bring nie. Maar in gehoorsaamheid aan God het Hy Homself tot versoening van ons sondes geoffer. Hy kon met reg sê dat Hy gekom het om God se wil te doen, want Hy het Homself in absolute gehoorsaamheid aan God se wil onderwerp. En die welgevalle van God in hierdie gehoorsaamheid van sy Seun is vir ons uit die Woord baie duidelik. “Terwyl hy nog spreek, oordek 'n helderligte wolk hulle meteens en daar sê 'n stem uit die wolk: Dit is my geliefde Seun in wie Ek 'n welbehae het. Luister na Hom!” (Matt. 17:5).
Daar is ook vir ons uit die Ou Testament ’n baie mooi voorbeeld rondom hierdie saak. In die tyd van Samuel is Saul as die koning van Israel gesalf. En God het aan Saul die opdrag gegee om die Ámalekiete met die banvloek te tref. Saul was in hierdie saak aan God ongehoorsaam. “En Agag, die koning van Ámalek, het hy lewendig gevang, maar die hele volk deur die skerpte van die swaard met die banvloek getref. Maar Saul en die manskappe het Agag gespaar, en die beste van die kleinvee en beeste, en die naas-bestes en die lammers en alles wat van waarde was — dit wou hulle nie met die banvloek tref nie; maar al die goed wat veragtelik en vervalle was, dit het hulle met die banvloek getref.” (1 Sam. 15:8&9). Saul het aangevoer dat hy hierdie kleinvee en beeste nie met die banvloek getref het nie omdat hy dit gehou het om dit aan God te offer. “En Saul sê: Van die Amalekiete het hulle dit gebring, want die manskappe het die beste kleinvee en beeste gespaar om aan die Here u God te offer; maar die ander het ons met die banvloek getref.” (1 Sam. 15:15). En hoe duidelik is die antwoord van Samuel nie hierop nie. “Daarop sê Samuel: Het die Here behae in brandoffers en slagoffers soos in gehoorsaamheid aan die stem van die Here? Kyk, om gehoorsaam te wees is beter as slagoffer, om te luister beter as die vet van ramme.” (1 Sam. 15:22). God het Saul dan ook as gevolg van hierdie ongehoorsaamheid as koning van God se volk verwerp. En in Saul se plek is ’n man deur God aangewys – ’n man wat Hom in gehoorsaamheid aan God se Woord sal onderwerp. “En nadat Hy hom afgesit het, het Hy Dawid vir hulle verhef as koning, van wie Hy ook gesê en getuig het: Ek het Dawid, die seun van Ísai, gevind, 'n man na my hart, wat al my welbehae sal doen.” (Hand. 13:22). Ek wonder of die belangrikheid van gehoorsaamheid teenoor God vir ons op enige wyse meer duidelik as deur hierdie gebeure uitgebeeld kan word.
Geliefdes, gehoorsaamheid en eerbied loop hand-aan-hand. Dink maar vir uself – u sal tog nie iemand vir wie u ’n groot eerbied en respek het se wil en wense doelbewus teëgaan nie. As ons God dan as ons Vader aanbid en aanroep is ons mos aan Hom die eerbied van ’n Vader verskuldig. En ons gehoorsaamheid aan Hom lewer getuienis van ons eerbied of dan gebrek daaraan teenoor Hom. Mag ons dan ook deur gehoorsaamheid aan die waarheid van sy Heilige Woord in ons lewens gereinig en geheilig word na die beeld van die Eersgeborene, ons Verlosser. Ons sal sodoende volgens sy Voorbeeld ook ons lewens in eerbiedige vrees voor God kan leef en ons eie wil aan die wil van God onderwerp. As ons liefde vir God eg is, sal hierdie vir ons ’n ernstige strewe wees aangesien die Woord van God duidelik daaroor is dat God ’n groot welbehae in ons ootmoedige gehoorsaamheid het.
“Loof die Here, sy engele, kragtige helde wat sy woord volbring, in gehoorsaamheid aan die stem van sy woord! Loof die Here, al sy leërskare, sy dienaars wat sy welbehae doen!” (Ps. 103:20&21)