Gedagtes vir elke dag
Of lees almal by Gedagtes vir elke dag
Geloof is nie die gevolg of die rede vir die uitverkiesing nie, maar die BEWYS daarvan dat ons weet God het ons uitverkies tot die ewige lewe.
OPENBARING – BOEK VAN DIE HEDE (20)
Ds Andrè van den Berg
Lees reeks by Openbaring - Boek van die hede
Die 144,000 verseëlde gelowiges
1. Die tussen-toneel
Openb.7 is ʼn tussen-toneel wat op die oopmaak van die vreesaanjaende sesde seël volg. Die oopmaak het die gelowiges beangs gelaat. Daarom die neutrale vraag in 6:17: Wie kan staande bly? Hoofstuk 7 wil die gelowiges wat volhard, verseker dat God die Eienaar en Beskikker is van almal en alles wat onder sy beheer val. Dit moet gelowiges nie paniekerig maak nie. Die oordeelsvoltrekking is immers op die goddelose gemik. Die gelowiges sal staande bly omdat hulle op die voorkop as God se kosbare eiendom gemerk is. Openb.7 moet gelowiges help om perspektief te behou. Hulle moet nooit die groot prent van God se verlossing en hul status as verlostes uit die oog verloor nie. God se hand is op die swartbord!
2. Twee tonele
Daar is twee tonele. Eerstens verse 1-8 van die gelowiges op aarde wat spartel om te midde van vervolging kop bo water te hou en wat op die voorkop as God se eiendom gemerk word. Die tweede toneel is van oorwinnende gelowiges voor die troon van God in die hemel (9-17). Voordat God se oordeel ontplooi word, word gelowiges bemoedig dat hulle God se eiendom is. Hierdie goue draad van versekering loop as ʼn rigtinggewer dwarsdeur Openbaring. Hierdie verseëling dra ʼn ewige waarborg (9:4). Die gemerkte gelowiges word geen skade berokken nie. Die verseëling is dan ook die antwoord op die smeekgebede van die martelare voor die altaar. (6:9-11).
Die 144,000 is simbolies van God se volle getal en beantwoord aan die versekering in 6:11 dat die gelowiges net ʼn klein rukkie moet wag totdat die getal van die wat vir hul geloof sou sterf voltallig is. Openbaring beklemtoon telkens die groot waarheid dat God sy eiendom van geestelike vernietiging bewaar. Wanneer die nood op sy hoogste is, is God op sy kragtigste teenwoordig,
3. Die indeling van Openb.7:1-8
Vier engele staan by die vier hoeke van die aarde (windrigtings) en hou die vier winde van die aarde vas sodat geen wind waai nie. In verse 2-3 verskyn nog ʼn engel uit die Ooste wat die vier engele by die vier uithoeke opdrag gee om nie die land, see en bome te tref nie, maar die 144,000 dienaars van God te gaan merk.
Johannes sien die vier engele by die vier hoeke staan, ʼn idioom vir elke deel van die aarde wat ingesluit word. God beheer die natuurelemente, ook die winde van die aarde. Die engele hou die winde op God se bevel vas sodat geen wind waai nie. Die hele skepping moet wag totdat God sy eiendom gemerk het. Verwoestende winde was in die ou Joodse apokaliptiek simbool van oordeel (Hos.13:15). In hierdie gesig word dit vasgehou om die natuur nie te skaad nie. Daarna verskyn ʼn ander engel met baie groot gesag omdat hy die seel van God by hom het. Hy het God se seëlring, ʼn koninklike kenteken, in sy besit. In die antieke tyd het ʼn seël eienaarskap, bevoorregting en beskerming uitgedruk. In die heiden-wêreld het aanbidders dikwels ʼn seël gedra om aan te dui watter god hulle vereer het.
In Esg.9:4-6 vereis God ʼn merkteken op die voorkop van die gelowiges om hulle as sy eiendom aan te dui. Openb.7 se verseëling is simbolies om te bevestig dat iemand aan God behoort. Dis nie letterlike kentekens op die voorkop nie. Dis ʼn simboliese identiteitsbewys wat net God kan sien ( 1 Kor.6:19.20).
In die heidenwêreld was slawe as deel van die huishouding gemerk. So n merk was die aanduiding dat hy aan iemand behoort. In Openbaring kan niemand neutraal staan nie. Jy dra of die merkteken van die Antichris of van God.
4. Die gemerkte getal
Die 144,000 is simbool van voltalligheid. ʼn Letterlike opvatting hou nie stand nie. Die volle getal geredde mense aan die einde van alle tye is aansienlik meer as net 144,000. Die simboliese 144,000 is uit 12,000 van elkeen van die 12 stamme saamgestel. Die groot menigte (7:9) kom egter uit elke stam, volk en nasie. Sommige geleerdes beskou die 144,000 as die getroue oorblyfsel van Israel – bekeerde Jode. Dit gaan nie op nie omdat die Joodse Christene en heidense Christene van die begin af saam die nuwe volk van God vorm (Hand.10:45.46; 13:16-17). Wat meer is, is dat die ou 12 stamme letterlik nie meer bestaan het toe Openbaring geskryf is nie. Hulle was in die verstrooiing (Jak.1:1) maar beslis die kerk.
Gevolglik is die 144,000 slegs die simboliese aanduiding vir die groot menigte aan die einde van die tyd. Die 12 stamme het ʼn groot geskiedkundige rol in die kerk van die OT gespeel soos die 12 apostels in die kerk van die NT. Net soos wat die sewe gemeentes in Openbaring 2-3 die hele kerk verteenwoordig het al was daar meer gemeentes so ook die 144,000 as die simboliese volle getal van die geredde siele. Hulle is simbolies gemerk om nie verlore te gaan nie. Niemand sal hulle uit God se hand ruk nie, al gaan dit ook hoe swaar op die aarde.