Gedagtes vir elke dag
Of lees almal by Gedagtes vir elke dag
Die meeste mense wonder wat die geheim van gelukkig wees is, in die allesdaagse rondom hom. Jy kan nie die vreugde wat jy aan iemand anders gee deur iets mooi aan hom te sê of te doen, beleef sonder om self daardie gelukkige gevoel te ervaar nie – vandaar die spreekwoord dat dit saliger is om te gee as om te ontvang!
SATANISME – 'N REALITEIT (10)
Kobus Jonker
Lees reeks by Satanisme
Satanisme – die ontstaan en groei (2)
Die vyf grade van lidmaatskap in die Kerk van Satan lyk soos volg:
- Satanis (geregistreerde lid van die Kerk)
- Warlock (manlik) Heks (vroulik)
- Priester of Priesteres van Mendes
- Magister (manlik) Magistra (vroulik)
- Magus (titel beklee deur La Vey)
La Vey se filosofie is in die sataniese bybel saamgevat waarin hy baie stellings maak. Hier is 'n paar daarvan:
- Die mens is volgens sy instinkte 'n roofdier, aangedryf deur sy luste en seksuele begeertes.
- Liefde is sinloos – dit sal jou aan die genade van ander uitlewer.
- Satanisme verteenwoordig 'n vorm van beheerde selfsugtigheid.
- Seksuele vryheid is die vryheid om getrou aan een mens te wees, of jou seksuele drange uit te leef met so veel ander as wat jy meen nodig is om jou behoeftes te bevredig.
La Vey ontken dat die hemel en die hel bestaan en sê openlik dat die kerkleer aangaan die hel en die duiwel vals is. Hy verwerp ook die Christelike opvatting dat daar lewe na die dood is.
La Vey het die sataniese bybel in 1969 voltooi. In 1973 is hierdie 'bybel' saamgevat in nege sataniese stellings:
- Satan verteenwoordig bevrediging in plaas van weerhouding.
- Satan verteenwoordig 'n lewenskragtige bestaan in plaas van spirituele droombeelde (pipe dreams).
- Satan verteenwoordig 'n onbesoelde wysheid in plaas van huigelagtige selfbedrog.
- Satan verteenwoordig goedheid aan diegene wat dit verdien in plaas van liefde wat op ondankbares gemors word.
- Satan verteenwoordig wraak in plaas van om die ander wang te draai.
- Satan verteenwoordig verantwoordelikheid aan die verantwoordelikes in plaas van besorgdheid oor psigiese vampiere.
- Satan verteenwoordig die mens as net nog 'n dier, soms beter, maar dikwels slegter as daardie diere wat op al vier pote loop, wat omrede sy heilige spirituele en intellektuele ontwikkeling die wreedaardigste dier van almal geword het.
- Satan verteenwoordig al die sogenaamde oorspronklike sondes aangesien dit lei tot fisiese, geestelike of emosionele bevrediging van alles.
- Satan was die beste vriend wat die Kerk ooit gehad het omdat hy die Kerk deur al die jare aan die gang gehou het.
Vir die Christen is dit onverstaanbaar waarom Kalifornië die Kerk van Satan as 'n godsdienstige organisasie erken. Lidmate wie aansluit moet 'n lang vraelys beantwoord en moet ook aan die streng standaarde voldoen. Daar was alreeds in 1981 talle van die aansoekvorms in Suid-Afrika versprei. La Vey verseker alle aanbidders dat die geheimsinnigheid van die beweging behoue sal bly. Daar word gebruik gemaak van drie soorte rituele, elk in ooreenstemming met 'n basiese menslike emosie.
- Die seksritueel is bo-aan die lys. Dis 'n liefdespel waar jy 'n begeerte by die persoon skep wie jy begeer of jy roep 'n seksmaat nader om jou begeertes te bevredig.
- Ritueel twee sentreer om mededoë. Hier gaan dit om sentiment om dus jouself of ander te help.
- Vernietiging is ritueel nommer drie. Woede, minagting, ergerlikheid of haat moet deur die persoon gemotiveer word.
Die drie rituele word almal met 'n involkasie, 'n gebed aan Satan en die voorlees van helse name deur 'n priester begin. Die ritueel behels 13 stappe. By die 9e stap doen die priester 'n geskikte gebed om die lus, mededoë, of vernietiging te bewerkstellig.
Die kleredrag en apparaat in die sataniese kerk:
- Swart klere – swart is die krag van duisternis.
- Alle vroulike lede moet seksueel-prikkelende klere dra om die mans se emosies te stimuleer en sodoende tot die uitvloei van adrenalien en bio-elektriese energie by te dra.
- Die altaar moet 'n naakte vrou wees – satanisme is die godsdiens van die vleeslike.
- Die simbool van Baphomet verskyn bokant die altaar. Dit is 'n onderstebo vyfpuntige ster wat die kop van die bok voorstel met sy horings wat uittartend boontoe steek, terwyl die ander drie punte na onder ontkenning van die Drie-eenheid simboliseer.
- Swart kerse – soveel as nodig om die kamer te verlig.
- 'n Klok met 'n harde deurdringende klank.
- Silwer bekers waaruit die "elikser van die lewe" gedrink word. Goud mag nie gebruik word nie, dit herinner aan die hemel.
- Swaard.
- Mes.
- Rottang of staf as simbool van die aggressiewe mag van satanisme.
- Die fallus – word in die 8e stap van die rituele gebruik.
La Vey sê: "Geseënd is die sterkes want hulle sal die juk beêrwe." Deur hierdie stelling word die mens in die Kerk van Satan verhoog tot 'n supermens en lateraan self god. Afsluitend loop satanisme en humanisme hand aan hand.
In 1968 verskyn Charles Manson op die toneel waar hy vriende meedeel dat hy Satan sowel as Christus is. Manson en sy aanhangers stig kort na hierdie mededeling die "Final Church" waar hulle hulself voorbereid vir die oordeelsdag. Manson het sy eie sataniese filosofie ontwerp wat ook uit 'n anarchistiese leer bestaan het. Hy wou die negers, die "ryk varke", die staat en dan ook die filmsterre soos Richard Burton uitwis. Hy het gesmag na 'n gemeenskap waar besittings gedeel en vrye 'liefde' gegeld het. Manson se kerk het die mees perverse rituele gehad.
By geleentheid het hy homself aan 'n kruis laat vasbind, gesteun en geskreeu asof hy werklik gekruisig word. Daar was selfs vrouens by die kruis wie by sy voete gekniel en geween het. Manson-hulle het psigideliese dwelmmiddels vryelik tydens rituele gebruik. By die aanbreek van nuwe- en volmaan is diere geoffer waarna die bloed oor pare uitgegiet is wie besig was met geslagtelike gemeenskap. Van die bloed is gedrink om die pare nog verder seksueel te stimuleer. Manson het sy onderdane tot waansinnige bloeddorstigheid opgesweep.
Manson het ook almal voorberei op rituele moorde. Vir hierdie doel het hy 'n moordwerktuig ontwerp: 'n stel van ses messe wat in 'n koeëlvormige bal vasgesweis is. 'n Slagoffer word op 'n houttafel gelê waarna die messe hom in die hart en maag steek. Die hart word uitgehaal en geëet.
Skielik breek daardie nag in Augustus 1969 aan. Manson het sy volgelinge opdrag gegee "om vrees by die 'establishment' in te boesem". Hulle moes Sharon Tate, 26 jarige aktrise en blonde skoonheid in Hollywood, gaan vermoor. Op daardie tydstip was Sharon Tate swanger met Poolse regisseur Roman Polankski as toekomstige vader. Die geboorte was enkele dae weg toe Tex Watson en sy volgelinge by haar huis ingaan. Sharon het besoekers by haar gehad en aanvanklik nie onraad vermoed toe die swart geklede figure die huis inkom nie. Maar Watson het toe gesê: "I am the devil; here to do the devil's work."
Sharon en twee verskrikte gaste is met toue om die nek in die sitkamer aanmekaar vasgebind. Die derde gas is verskeie kere met 'n dolk gesteek. Hy het losgeruk, na buite gestrompel, geskreeu en toe gesterf. 'n Vierde gas is in sy motor met 'n vuurwapen doodgeskiet. Die swartgeklede monsters het daarna Sharon se oorblywende vriende aanhoudend met dolke gesteek tot dat daar nie meer lewe in hulle was nie. Sharon het in haar toestand van skok om haar eie lewe en dié van haar ongebore baba gepleit maar geen genade is betoon nie; die toue om haar nek was stewig vasgemaak en sy is 16 keer met 'n dolk gesteek, waarna hulle haar aan 'n balk teen die plafon opgehang het terwyl sy besig was om te sterf.
Volgens Manson het hy sy teorie ontleen van Openbaring in die Bybel en die Beatle-lied "Helter Skelter" : dat die moorde 'n rasse-oorlog sou ontketen. Daar het niks van sy verwagtinge gekom nie. Manson en sy volgelinge het die volgende nag toeslaan op die huis van Leno Labianca, 'n welgestelde kettingwinkeleienaar en sy vrou Rosemary. Manson het hulle vasgebind terwyl die ander hulle doodgesteek het met messe.
Na dekades het Manson destyds nog geen berou oor die moorde getoon waar hy in die San Quentin-gevangenis in Kalifornië aangehou is nie en is lank deur talle sataniste aanbid. Pakkies en briewe het weekliks ingestroom tronk toe van aanhangers wat geglo het dat Manson die lewende duiwel is. (Is maar 'n magtelose duiwel as hy tussen tronkmure vasgekeer kon word...)
In 'n gegoede voorstad van Los Angeles het Sharon se moeder, Gwen Tate, daagliks nagmerries beleef en bly veg dat die monster Manson nooit op parool vrygelaat moes word nie. Haar siening was dat hierdie monsters erger as diere is want diere maak dood om te leef, maar hierdie duiwels het geleef om dood te maak.
Aleister Crowley, Anton Szandor La Vey en Charles Manson kan beslis as die grondleggers van die moderne satanisme beskou word.
Volgende keer meer oor moderne satanisme...