Gedagtes vir elke dag
Of lees almal by Gedagtes vir elke dag
Waarom wil ons gedurig ander beïndruk met allerhande ingewikkeldhede? Probeer 'n keer eenvoudig leef, praat, lag, doen, en jy sal vind hoe bevrydend dit is, hoeveel vreugde en balans dit vir jou bring.
Pinkster 2016: DIE BRUIDEGOM IS OP PAD (1)
Dit is weer Pinkstertyd en ons plaas hierdie week elke middag om vieruur hierdie uitstekende reeks opgestel deur ds Andrè van den Berg.
1. Hy kom beslis
Mt.25:1-13; Hand.1:1-14
“Hierdie Jesus wat van julle opgeneem is in die hemel, sal net so kom soos julle Hom na die hemel sien wegvaar het” (Hand.1:14)
Paulus skryf in Gal.4:4 dat God sy Seun in die volheid van die tyd na die aarde gestuur het. Hierdie uitdrukking volheid van die tyd is veelseggend. God het nie sommer op ʼn dag besluit om Jesus aarde toe te stuur nie. Hierdie spesifieke dag is van die grondlegging van die wêreld af in sy raadsplan opgeneem. Jesus kom op God se bestemde uur met een hoofdoel aarde toe - om deur sy kruisdood siele van die ewige dood te red. Hy was slegs 33 jaar op die aarde waarna Hy terug is vanwaar Hy gekom het - hemel toe.
Die vraag is: Gaan Hy weer aarde toe kom? Toe Hy op aarde was, het Hy soveel vernedering en leed verdra, dat ʼn mens Hom nie sou verkwalik indien Hy nie weer sou kom nie. Ek sou nie!
Die Bybel sê egter dat Hy weer kom. God belowe in sy Woord dat Jesus nie net eenmaal na die aarde gekom het nie, maar vir ʼn tweede keer weer gaan kom. Hierdie keer finaal. Hoor wat sê die twee engele vir die dissipels na afloop van Jesus se hemelvaart: “Hierdie Jesus wat van julle opgeneem is in die hemel, sal net so kom soos julle Hom na die hemel sien wegvaar het” .
Dis een van die groot beloftes in die Bybel en vir gelowiges ʼn wonderlike vooruitsig; iets waarna ons soos ʼn Paulus moet verlang: “Want om hierdie rede sug ons ook en verlang om met ons woning uit die hemel oorklee te word” (2 Kor.5:2). Die Bybelse boodskap is helder en duidelik: Jesus het nie net eenmaal na die aarde gekom nie, maar kom weer.
Die groot vraag wat gevra word, is: Wanneer kom Jesus? Dis ʼn vraag wat al eeue lank gevra word waarop daar geen klinkklare antwoord bestaan nie. Trouens, van die eerste gelowiges, soos dié in Thessalonika, het alreeds so vroeg as 50nC ʼn wederkoms verwag! Uit Paulus se brief aan hulle, kan ons aflei dat hulle selfs hulle werk gelos en iewers op ʼn heuwel in die stad vir die wederkoms gaan sit en wag het. Daarom moes Paulus baie dringend aan hulle skryf om die saak reg te stel en hulle te vermaan om Christus se wederkoms nie ydel of passief af te wag nie. Gelowiges moet aanhou hulle dagtaak verrig totdat Jesus op die wolke kom.
Die Tessalonisense was nie al mense met ʼn lewendige wederkomsveragting nie. Mense was maar van meet af aan baie nuuskierig oor die tyd van die wederkoms. Sommige mense het selfs datums vir die wederkoms voorspel en in sommige gevalle dit selfs geniet om die rol van oordeelsaankondiger te speel. Een van die eerste oortreders was ʼn dwaalleraar, Montanus. Hy het in die 2de eeu nC ʼn klomp mense saamgetrek en wyd en syd verkondig dat die wederkoms spoedig sou plaasvind. Die Montaniste het met hul dwaallerings die vroeë Christenkerk skade aandoen. Die Charismate is ʼn herlewing van hierdie dwaalgroep.
Eeue later het William Miller, stigter van die Sewedaagse Adventiste, nie net die jaar van die wederkoms voorspel nie, maar selfs die dag en datum - 21 Maart 1843! Toe die wederkoms nie op daardie dag plaasvind nie, het hy dit na 22 Oktober 1844 verskuif en daarna geen verdere voorspellings gewaag nie.
Charles Russel, stigter van die Jehovasgetuies, was die volgende met ʼn wederkoms voorspelling – 1874. Toe daar niks gebeur nie, het hy dit as ʼn berekeningsfout afgemaak en die datum na 1914 verskuif. 1914 sou die jaar wees waarin God se vrederyk oral op die aarde sigbaar sou word. Ironies genoeg het geen vrederyk aangebreek nie, maar die Eerste Wêreldoorlog uitgebreek!
Sedertdien het sulke voorspellings en/of bespiegelings nooit opgehou nie ten spyte van wat Jesus baie duidelik sê: “Maar van die dag en die uur weet niemand nie, ook die engele van die hemel nie, maar net my Vader alleen” (Mt.24:36). Wederkoms voorspellings is een van die sektes se gunsteling disse!
Alle voorspellings onderstreep egter een groot waarheid - mense glo dat daar op ʼn dag ʼn einde aan die wêreld gaan kom. Met ander woorde, die aarde sal nie vir ewig bestaan nie. Daar kom ʼn dag dat alles op hierdie aardbodem tot niet sal gaan. Maar wanneer dit sal wees, weet niemand nie. Jesus sê in Mt.24 dat selfs nie eens die engele in die hemel die werklike datum weet nie. Laat staan nog ʼn mens!
Die gedagte dat daar ʼn einde aan die aarde gaan kom en Jesus as Regter terugkeer, gryp sommige skrywers so aan, dat daar al etlike duisende boeke en artikels oor hierdie onderwerp geskryf is. Net die boeke wat al die afgelope eeu oor die wederkoms geskryf is, sal al ʼn hele biblioteek kan vol maak.
Neem jy van hierdie boeke onder oë neem, staan jy soms verstom en geskok oor hoe verkeerd mense die Bybel gebruik. Baie van die eindtyd-skrywers ontspoor sommer vanuit die staanspoor omdat hulle die basiese heilsfeite van die Skrif nie verstaan nie. Jesus waarsku die Skrifgeleerdes van sy tyd: “... Julle dwaal omdat julle die Skrifte nie ken nie en ook nie die kragte van God nie” (Mt.22:29).
Dwaalleraars verdraai die Bybel om hul dwaling te pas. Gevolglik laat hulle nie toe dat die Bybel spreek nie. Dit buikspreek eerder. En so word die Bybel ʼn tipe van kapstok waaraan hulle hul eie fantasieë hang. Neem as voorbeeld die Amerikaner Hal Lindsay wat met sy boek The Late Great Planet Earth miljoene dollar gemaak en bekendheid verwerf het. Sy hantering van die Bybel skreeu te hemel. Hy sien dit as ʼn boek vol profesieë wat vandag voor mense se oë in vervulling gaan, veral Openbaring. Dis allermins die geval!
Behalwe vir die stortvloed van boeke oor die eindtyd, snak ʼn mens gereeld na jou asem oor sommige predikers se verstommende verdraaiing van Bybelse waarhede. Charismate maak hulle veral gereeld hieraan skuldig.
Ons leef in ʼn tyd van verstommende tegnologiese ontwikkeling, veral op die gebied van die mikrorekenaartegnologie. Dit gryp etlike van hierdie eindtyd-skrywers so aan, dat hulle selfs elektroniese betaalmiddels as ʼn bedreiging vir die geloof beskou nie eens van die moontlike inplanting van mikrorekenaar skyfies onder die vel te praat nie! Hulle sien dit as die merk van die dier in Openb.13. Nee, hierdie merk gaan baie groter en veel omvattender as ʼn rekenaarskyfie wees!
Gelowiges moet versigtig wees vir boeke wat oor die eindtyd handel. Vir die man op straat skep hierdie sensasionele boeke ʼn groot probleem. Wie is reg? Wie kan geglo word? Die Babelse verwarring op kerklike terrein neem in omvang toe!
Daar is maar net een uitweg - die beproefde Calvinistiese pad van alleenlik die Skrif (soli Scriptura). Die meeste van die eindtyd-skrywers en predikers verstaan nie die Bybel nie. En as jy dit nie reg lees nie, kan jy dit ook nie reg verklaar nie. Niemand durf ʼn klomp tekste aanmekaarflans en sê: “So sê die Bybel nie”. Dis in baie gevalle alles behalwe wat die Bybel sê!
Ons moet in hierdie tyd wat oploop na Jesus se wederkoms ernstiger na die stem van God in die Bybel luister. En daarvoor het ons die leiding van die Heilige Gees baie nodig. As ons dit nie doen nie, kan ons so maklik in die slagyster van die Satan trap en ons ore aan dwaalleraars uitleen wat iets anders as die Bybel se waarhede verkondig: “Maar al sou ons of n engel uit die hemel julle n evangelie verkondig in stryd met wat ons julle verkondig het, laat hom n vervloeking wees!” (Gal.1:8).
Baie eindtyd-skrywers glo dat die Bybel vir mense van die 21ste eeu geskryf is. Nee, alhoewel die Bybel vir alle gelowiges deur die eeue bedoel is, is dit in die eerste plek vir die mense 2000 jaar gelede geskryf. Gevolglik moet ons altyd in gedagte hou dat hulle ander tale, gebruike en gewoontes as ons s’n gehad het. As ons nie daarmee rekening hou nie, sal ons die Bybel nooit werklik verstaan nie.
Die eerste ding wat vir ons wat in die eindtyd leef belangrik is, is dat Jesus beslis weer kom. Ons het hierdie belofte in die Woord. Dit staan vas en waar. Laat ons soos die vyf verstandige maagde gereed wees as die hemelse Bruidegom opdaag.