Gedagtes vir elke dag
Of lees almal by Gedagtes vir elke dag
Ons moenie dink dat ons kinders outomaties in ons geloofspore trap nie – gelowige ouers het 'n groot verantwoordelikheid om hulle kinders met opoffering in die HERE se weë op te voed. Dit laat mens wonder hoeveel moeite die geliefde Koningskind, Dawid, met sy seun Agas gedoen het – Agas het die hele volk gelei om afgode te aanbid en is bitterlik swaar deur God gestraf.
MAAK GEREED VIR DIÉ REIS!
LEWE NA DIE DOOD
Ds AE van den Berg
“Want ons moet almal voor die regterstoel van Christus verskyn, sodat elkeen kan ontvang wat hy deur die liggaam verrig het, volgens wat hy gedoen het, of dit goed is of kwaad” - 2 Kor.5:10
Een van die grootste leuens van alle tye is dat alle mense gelyk is. Ons is slegs in een opsig gelyk – ons lewe en sterwe almal. Ja, die dood klop aan elkeen se deur. Of ons oud of jonk is, ons is almal op ons laaste vaart.
Ons weet almal wat voor die dood gebeur want dis die lewe, maar wat gebeur daarna? Is daar nog ’n lewe of gaan ons soos diere dood? Die Bybel sê dat daar ’n lewe na die dood is en dat ’n mens daarvoor moet voorberei. Niemand pak ’n reis sonder voorbereiding aan nie; allermins nie die een na die dood nie!
Christene is egter nie die enigstes wat aan ’n lewe na die dood glo nie; ook talle heidene. Die ou Egiptenare is ’n voorbeeld hiervan, heidene wat vir meer as 3000 jaar in ’n lewe na die dood geglo het asook ’n oordeel! Die Egiptenare het geglo dat sodra ’n mens sterf, hy ’n baie groot saal betree het waar Horus en sy sekretaris Toet, die harte van gestorwenes geweeg en daarvoor ’n veer gebruik het. Booshede het ’n hart swaar gemaak en as dit swaarder as die veer geweeg het, is die gestorwene na die siele-vreter gestuur, ’n mitologiese gedrog met die kop van ’n krokodil, wat hulle dan verslind het. As die hart reg was, is ’n persoon na die Velde van Geluk gestuur waar Osiris, die mitologiese god van die onderwêreld, persoonlik teenwoordig was.
Gevolglik het alle Egiptenare in ’n lewe na die dood geglo en hulle daarvoor voorberei. Daarom het die farao’s indrukwekkende grafte/piramiedes laat bou, dit gemeubileer en hul liggame laat balsem. Ongeag hul welstand, het almal ’n lewe na die dood verwag en daarvoor voorberei. So het die argeoloog Howard Carter in 1922 die graf van Toetankamon ontdek, vir meer as 3000 jaar volledig bewaar, die gemummifiseerde liggaam asook kosbare skatte in kluis. Die groot les wat ons hieruit leer, is dat selfs die heiden ’n lewe na die dood verwag.
Die Bybel leer die mens om hom vir die dag van die dood voor te berei. Dis die belangrikste voorbereiding van alle voorbereidings! Selfs die heidene doen dit al is dit sonder Christus tevergeefs! Desondanks sterf duisende kerkgangers jaarliks sterf sonder om voor te berei!
Paulus skryf aan die gelowiges in Korinte oor die dood in ’n tyd toe die mens se gemiddelde lewensverwagting baie laag was. Baie het weens gebrekkige mediese sorg en primitiewe medisyne vroeg en dikwels ook onverwags gesterf. Paulus vergelyk die dood met wind wat ’n tent wegwaai. “Want ons weet dat as ons aardse tentwoning afgebreek word….” (:1). Wie egter reg voorberei is, ontvang ’n gebou van God. Die klem is egter nie op die tentwoning of vaste gebou van God nie, maar op die voorbereiding. “Want ons moet almal voor die regterstoel van Christus verskyn, sodat elkeen kan ontvang wat hy deur die liggaam verrig het, volgens wat hy gedoen het, of dit goed is of kwaad”.
Voorbereiding is baie belangrik. Alles wat in die lewe belangrik is, verg voorbereiding - eksamens, werksbeplanning, sport, kunste en ook prediking. As ’n leraar nie voorbereid op ’n kansel kom nie, kom sy gemeente dit gou agter! As ’n prokureur nie vir ’n saak voorberei nie, verloor hy dit en ook kliënte. Voorbereiding is so eie aan die mens as kos en klere.
Die belangrikste voorbereiding is dié vir die hiernamaals. Ons is tydelik hier, maar vir ewig daar. Hierdie voorbereiding vereis ’n wedergeboorte; ’n oorgawe en nuutword in die Here. “Daarom, as iemand in Christus is, is hy ’n nuwe skepsel; die ou dinge het verbygegaan, kyk, dit het alles nuut geword” (:17). Dis ’n persoonlike verhouding waarsonder niemand die hemel ingaan nie, maar die hel sal beêrwe.
Gevolglik het die kerk van ons Here Jesus een baie belangrike boodskap: Bekeer jou persoonlik tot Jesus Christus. Dis al manier hoe jy vir die hiernamaals voorbereid is. As iemand jou anders leer, is hy van Satan. En daar is sulke mense; selfs kerke!
Die Roomse Kerk (RK) leer dat die kerk jou die hemel indra. As jy gedoop is, lidmaat geword het, die sakramente gebruik en gereeld kerktoe gaan, sorg die kerk vir die res. Jy kan die hemel sonder voorbereiding (sonder ’n persoonlike verhouding met Jesus) ingaan. Hoe klink dit vir u? Bybels of duiwels? Die gevolg van hierdie misleiding is dat Roomse siele al vir meer as 1,800 jaar soos die vyf dwase maagde aan die deure van die hemel hamer: “ Meneer, meneer, maak vir ons oop!” En al wat hulle hoor, is: “Voorwaar ek sê vir julle, ek ken julle nie” (Mt.25:11,12).
Dank God dat u in ’n kerk is wat die waarheid leer – jy moet ’n persoonlike verhouding met Jesus hê om hemeltoe te gaan. Ongelukkig is daar ’n Roomse streek in baie Protestantse lidmate te bespeur; mense met geen persoonlike verhouding met Christus nie, maar wat nogtans glo dat deur gereeld kerktoe te gaan, mooi te leef en vir ander goed te wees, die deure na die hemel vir hulle outomaties sal oopgaan. Dis nie Protestants nie, maar Rooms! Geen kerk dra jou die hemel in nie; slegs ’n persoonlike verhouding met jou Saligmaker!
Let op die teksvers. “Want ons moet almal voor die regterstoel van Christus verskyn, sodat elkeen kan ontvang wat hy deur die liggaam verrig het, volgens wat hy gedoen het, of dit goed is of kwaad” . Hoe spreek dit nie van persoonlike verantwoordelikheid nie! Wie reg leef, sterf ook reg.
Waar staan jou naam vandag opgeskryf? As jy ’n persoonlike verhouding met Jesus het (voorbereid is), staan dit in die boek van die lewe. As jy nie so ’n verhouding het nie, staan dit in die boeke van die oordeel. Is dit wat jy wil hê? By geleentheid het dit vir Jesaja gelyk asof die Bondsvolk hulle name in die boeke van die oordeel verkies het en roep hulle op: “Soek die Here terwyl Hy nog te vinde is; roep Hom aan terwyl Hy naby is” (Jes.55:6).
Om dood te gaan, is geen kuns nie. Almal, selfs die slegstes, kry dit reg. Om reg voorbereid te wees, is ’n ander saak! Die Bybel leer ons nie net om reg te leef nie, maar ook om reg dood te gaan. Om te sterf is vir gelowiges ʼn ongelooflike avontuur maar vir ongelowiges ʼn ongekende verskrikking!
Baie van ons volksgenote kry baie swaar in die lewe – gesondheid, geldtekorte, swak verhoudings ens. Weet een ding: As jy nie goed kan leef nie, sterf dan ten minste reg! Dis salig om voorbereid te sterf! Wie die dood verwag, behoort elke dag voluit vir Jesus te leef.
Onthou, jou lewe is soos ’n tent. Die storm van die dood waai dit in ’n oogwink weg. Is jy reg vir die reis? Om nie betyds vir die dood gereed te maak nie, is soos om tydens ‘n beleg op jou pos te slaap. Jy kan dit nie bekostig nie! Word wakker en kry jouself gereed vir die reis van alle reise!