Ds AE van den Berg

“…laat dit u dan bekend wees, o koning, dat ons u gode nie sal dien nie en die goue beeld wat u opgerig het, nie sal aanbid nie”  - Dan 3:18                         

Die Bybel is vol verhale van gelowiges wat in moeilike omstandighede beland en deur die ingrype van God behoue daaruit gekom het.  Dis alles lesse vir die lewe.  Die verhaal van Daniel se drie vriende is een van die aangrypendste; drie jongelinge wie se beproewing en onwrikbare geloof in God van hulle geestelike oorwinnaars gemaak het.

God waarborg gelowiges geen maklike lewe en ’n vrywaring van die vuuroonde van die lewe nie.   “….In die wêreld sal julle verdrukking hê; maar hou goeie moed, Ek het die wêreld oorwin” (Joh.16:33).   In tye van beproewing vra ons dikwels:  Ek is dan God se kind, waarom gebeur sulke dinge met my? Geloof in Christus is nie ’n ongeluk-vrywaringspolis nie.   Paulus het sy lewe lank ’n doring in die vlees gehad wat God nie verwyder het nie!

God beloon ’n skoon en rein lewe nie met ’n sorgelose bestaan nie.

   As dit so was, was die Christelike geloof ’n gelukbringer – asof  as ek goed lewe, sal niks sleg met my gebeur nie, nee.   Die geloofslewe is ’n stryd.   Let op Job; ’n man vroom en opreg, desondanks ervaar hy ’n bo-menslike beproewing wanneer hy alles wat hy besit op een dag verloor.

God plaas dikwels die heiligste, reinste en beste wat Hy het in die vuur van beproewing, nie om hulle te skaad nie, maar om hulle tot sy verheerliking te gebruik en aan ongelowiges soos Nebukadnesar, te wys dat Hy die ware God is!

Nebukadnesar was baie kwaad vir die drie jongelinge wat nie voor sy beeld wou buig nie en fel ’n doodsvonnis oor hulle.   Hy het niks van hulle standaarde gehou nie.  Hulle geloof het hulle nie toegelaat om tot dieselfde vlak as die heidene te daal en die beeld te aanbid nie.  Hulle geloof in God het hul anders  as die ongelowiges gemaak want gelowiges het ander standaarde! “Daarom, gaan onder hulle uit en sonder julle af, spreek die Here en raak nie aan wat onrein is nie en Ek sal julle aanneem” (2 Kor.6:17).

Nebukadnesar wou hulle geloofstandaarde verander en gee hulle ’n tweede kans in die hoop dat hulle, in die aangesig van die dood, hul eerder voor hom as voor die wil van God sou buig.   Dit het nie geslaag nie omdat dié jongmense ’n volle oorgawe aan God gemaak  het (In Engels: totally sold out).  “En wie sy kruis nie neem en nie agter My volg nie, is My nie waardig nie” (Mt.10:38).

Iets wat Nebukadnesar ook baie kwaad gemaak het was hulle standvastigheid.  Selfs in die aangesig van ’n wrede dood het hulle nie gebuig nie. “Daarom, my geliefde broeders, wees standvastig, onbeweeglik, altyd oorvloedig in die werk van die Here…” (1 Kor.15:58).

Om vir Jesus te leef, bring gelowiges dikwels voor vuuroonde in die lewe te staan; dié van kritiek, intimidasie, haat, versoeking, valse beskuldigings, hofsake en selfs die dood!   Gelowiges weet en ervaar dat die wêreld Christene nie verstaan nie.   Ons is vir hulle ’n raaisel; die manier hoe ons leef, dinge doen en mense liefhet.   Hulle vind ons lewenswandel hinderlik soos Nebukadnesar die jongmense se lewens hinderlik gevind het.  Hulle natuurlike reaksie is om gelowiges te vervolg in ’n poging om hul te dwing om soos ongelowiges op te tree.   Die wêreld hou nie van mense wat anders optree nie.    Kyk maar wat die wêreld met ons Here Jesus gedoen het!   Adapt or die, soos die Engelse sê.

Toe die drie jongmanne voor die vuuroond staan, het hulle geweet dat hulle nie op hul eie daaraan sou kon ontsnap nie.   Daarom het hulle hul lewe in die hand van God geplaas en geweet dat Hy hulle deur die beproewing sou lê.   In Ps.23 skryf Dawid van ’n dal van dood-skaduwees wat hy nie vrees nie: “…want U is met my” (:4).

God was inderdaad met die jongmense in Babel.   In plaas van onmiddellik te sterf, het God hulle in die vuur losgemaak van dit wat hulle gebind het sodat hulle los in die oond rondgeloop het.   Hulle was nie alleen nie, die Here was met hulle.   Nebukadnesar sien vier persone in die oond.   God hou sy beloftes selfs tydens ’n Babiloniese teregstelling: “….as jy deur vuur gaan, sal jy jou nie skroei nie en die vlam sal jou nie brand nie” (Jes.43:2).

Wanneer jou wêreld brand, is Jesus met jou.   God ontmoet die jongelinge binne-in die oond.  Hulle is vry.   Die vuur het al die dinge wat hulle gebind het, weggebrand.   Ja, in die vlamme van vervolging bevry God sy kinders van dinge wat ons vashou.    God het die jongmense toegelaat om deur die vuur te gaan, maar die vuur nie toegelaat om deur hulle te gaan nie.

Wat was die jongmense se geheim?  Hulle het in ’n persoonlike verhouding met God gestaan!   Luister hoe antwoord hulle Nebukadnesar in vers 17: “As onse God wat ons dien…” Hoe spreek dit nie van ’n persoonlike verhouding met God nie!   Dis wat jou deur beproewing dra!   Ons is die kinders van ’n almagtige Koning wat alles beheer, selfs elemente!   Hy laat sy kinders nooit in die steek nie.  “…Wees tevrede met wat julle het….Ek sal jou nooit begewe en jou nooit verlaat nie” (Heb.13:5).

Die jongelinge sê vir Nebukadnesar dat hulle God in staat is om hulle te verlos.   Hulle het dit geglo soos wat die son daar buite skyn!   Hulle het geweet dat daar menslik geen ontsnapping aan die oond moontlik was nie, maar desondanks  oortuig dat God hulle sou red.

Aanbid ons miskien ’n ander God as Daniel se drie vriende?   Nee, God het nog nooit verander nie.   “En aan Hom wat mag het om te doen vêr boweal wat ons bid of dink… (Efes.3:20).   As jy in die vuur van die lewe beland, moet jy weet dat God die termostaat van die natuur in sy Hande het.    Elke vuur in ’n kind van Hom se lewe gaan deur die filter van sy genade.  “En ons weet dat vir hulle wat God liefhet, alles ten goede meewerk, vir hulle wat na sy voorneme geroep is” (Rom.8:28).

In Dan.1 neem Daniel en sy drie vriende duidelik standpunt vir God in – hulle weier om afgodsoffers te eet, leef net van groente en water en lyk beter as die ander.   Hierdie ernstige toewyding aan God het hulle lewe in die oond gespaar!

God laat nie toe dat sy kinders bo hul vermoë beproef word nie: “Geen versoe-king het julle aangegryp behalwe ’n menslike een nie; maar God is getrou, wat nie sal toelaat dat julle bo julle kragte versoek word nie; maar Hy sal saam met die versoeking ook die uitkoms gee, sodat julle dit kan verdra” (1 Kor.10:13) .

God sal nooit jou siel red om jou daarna in ’n vuuroond te laat omkom nie!  Daarbenewens brand die vuuroonde in ons lewe nooit vir altyd nie. “Want ons ligte verdrukking wat vir ’n oomblik is, bewerk vir ons ’n alles oortreffende ewige gewig van heerlikheid” (2 Kor.4:17).

God het dikwels ook ’n doel met die vuuroond in jou lewe.   Josef het in die tronk beland net om later onderkoning van Egipte te word.   Dawid het teen Goliat te staan gekom en die tweede koning van Israel geword.   God het ’n groter plan met hulle gehad en ’n paar heidene anders oor God laat dink!    In beproewing wys Hy aan ’n verlore wêreld dat Hy die enigste God is.

God beskik vuuroonde in ons lewe om ons rein en bruikbaar vir Hom te maak.  Vuur het die merkwaardige eienskap dat dit onsuiwerhede wegbrand.   Eers smelt God ons, daarna gebruik Hy ons.  (First He melts, then He molds).  In die OT lees ons van Jakob wat maar ’n rowwe kêrel was totdat God hom een nag by die Jabbokrivier gesmelt het om daarna bruikbaar vir God te wees.    In die NT is Simon Petrus ’n goeie voorbeeld van ’n gelowige wat vir die koninkryk van God nie veel werd was nie totdat die Here sy trots weggebrand het en ’n kragtige werktuig van hom gemaak het.

Die jongelinge in Babel het nie geweet wat God se plan met hulle was nie, maar, omdat hulle in ’n persoonlike verhouding met God was, Hom onwrikbaar vertrou het.   Hulle geloof het selfs die hart van ’n heiden geraak toe hy sien wat God vir sy kinders doen.    Moenie kla oor die vuuroond in jou lewe nie.  Miskien wil die Here jou vir iets groots gebruik.  Vertrou Hom tot die dood toe!