Gedagtes vir elke dag
Of lees almal by Gedagtes vir elke dag
Ons het almal geraamtes in die kas en verwyte oor ons verlede. Gelukkig verwyt God ons nooit oor ons verlede nie. Wanneer Hy ons vergewe, doen Hy dit volkome en dink nie weer daaraan nie – maar dan mag jy ook nie!
GAAN JÝ VANJAAR DIE LEUEN BEVEG?
Ds Andrè van den Berg
“Want die tyd is daar dat die oordeel moet begin by die huis van God” - 1 Pet.4:17 (Eseg.33:1-9)
Ons staan aan die begin van 2015; een jaar nader aan die wederkoms van Christus en die einde in sig. Die Bybel waarsku dat Satan sy aanval op die kerk teen die einde so gaan verskerp, dat bitter min mense getrou gaan bly. Die kerk sal nog steeds bestaan, maar dit sal nie meer in diens van God wees nie, maar in dié van die Antichris, die verteenwoordiger van Satan aan die einde van die tyd: “... sodat hy in die tempel van God as God sal sit en voorgee dat hy God is” (2 Thess.2:4). Dit sal die ergste misleiding van alle tye wees. “... En die hele wêreld het verwonderd agter die dier aangegaan” (Openb.13:3).
Desondanks sal Christus die ware kerk bewaar. Dit sal wel geskaad maar nie vernietig word nie. En daarvoor gebruik Hy waarheidswagters – gelowiges wat nie deur leuens mislei is of bang is om mense te waarsku nie.
In Eseg.33 vergeestelik God die taak van die OT wag. Stadswagte het ʼn baie verantwoordelike werk gehad, daarom is slegs uitgesoekte, betroubare manne gebruik. Hulle het bo op die stadsmure onverpoosd rondtes gedoen en die omliggende gebied vir gevaar dopgehou. As hulle iets verdag bemerk het, is daar alarm gemaak en kon die inwoners hul vir ʼn aanval gereed kry. Gevolglik het die inwoners se lewe van hierdie wagte afgehang.
Ten spyte van al die voorsorgmaatreëls het die vyand soms daarin geslaag om die stede binne te dring. Homeros se verhaal van die Trojaanse perd is een so ʼn klassieke verhaal. Nadat die Trojane die beeldskone Helena ontvoer het, het die Grieke haar probeer bevry en Troje, ʼn groot stad aan die Turkse kus, vir 10 jaar lank beleër sonder om dit te kon inneem.
Toe maak Odusseus, die Griekse aanvoerder, ʼn plan. Hy het sy manskappe die beleg laat verlaat en oënskynlik laat wegvaar. Al wat oorgebly het, was ʼn reuse houtperd op wiele op die strand. Die Trojane het dit as ʼn versoeningsgeskenk beskou en dit later die dag die stad ingestoot. Toe dit nag word, het Odusseus en 30 krygers wat in die perd versteek was, uitgeklim en die stadspoorte vir die terugkerende Griekse krygers geopen. Die Trojane is verslaan, Helena ontset en die stad verwoes.
Die verhaal van die Trojaanse perd het hom later ook in ʼn ander gedaante in Suid-Afrika afgespeel toe kerklui in die tagtiger jare saam met die volksvyand begin plunder het. Dit was die begin van die einde van ʼn voorspoedige, vreedsame land, ʼn droewige verhaal wat deur ʼn hoë misdaadsyfer bevestig word. Suid-Afrika het ʼn harde les geleer - alle duiwels het nie gesplete hoewe nie. Sommige skuil selfs agter ʼn kruis!
Daar is niks so verraderlik soos welsprekende leuenaars nie. Daarom lyk die kerklike toneel soos wat dit tans lyk. Niemand kan uiteraard reguit treë op krom paaie gee nie! Die effektiefste manier om mense te mislei, is om leuens in godsdienstige taal te klee en dan te sê dat dit nuwe insigte in die Woord van God is. En dit het in ons land gebeur! Die probleem is dat leke dit nie bemerk nie omdat baie van hierdie leuens so naby aan die waarheid lê, dat dit byna soos die kleure van die reënboog in mekaar vloei.
Die kerk van Jesus Christus het ʼn baie groot taak – om ʼn wag op die stadsmuur van die mensdom te wees en hulle teen dreigende gevaar waarsku. Hierdie waarskuwingstaak is haar profetiese taak en daarvoor ontvang sy ʼn profetiese roeping van God. Die OuTestamentiese profeet het met die vergesig wat hy van God ontvang het die gevaar sien nader en mense betyds gewaarsku. So moet die kerk ook waarsku.
Sulke waarskuwings moet ook baie dringend aan die adres van afvallige kerke gerig word. Afvalligheid het alreeds orkaansterkte in talle Suid-Afrikaanse kerke bereik. Elke oortreding van die waarheid is ’n dolksteek in die siel van die Boerevolk. Daarom is elke leraar wat die waarheid verdryf en die leuen verkondig ʼn vervloekte in God se oë: “Maar al sou ons of ʼn engel uit die hemel julle ʼn evangelie verkondig in stryd met die wat ons julle verkondig het, laat hom ʼn vervloeking wees!” (Gal.1:8). Ja, die pad na die hel is met die skedels van duisende valse leraars geplavei!
ʼn Kerk wat haar profetiese visie verloor, is soos ʼn horlosie sonder wysers – dit tik vir ʼn vale maar is nutteloos. Daarom moet die kerk van Jesus Christus aanhou waarsku, al maak dit mense ook kwaad. “Die hele Skrif is deur God ingegee en is nuttig tot lering, tot weerlegging, tot teregwysing, tot onderwysing in die geregtigheid” (2 Tim.3:16). ʼn Kerk wat nie waarsku nie, is soos ʼn wag wat die gevaar sien aankom, maar versuim om sy mense te waarsku. Hy is dus indirek aandadig aan hul dood!
Eertydse sterk Gereformeerde kerke het die kluts kwyt geraak en ver-Rooms of raak charismaties. Dwaling (leuens) is in ons eens pragtige land aan die orde van die dag. En hoe meer ’n kerk dwaal, hoe verder beweeg dit van God af weg. En as die dood eers in die kerklike murg beland het, bly daar spoedig net ʼn leë dop oor. Mense behou die skulp maar verloor die pêrel.
Gaan kyk maar – die meeste kerke wat hul profetiese taak versuim, is so vasgevang is in sosio-politieke sake, dat hul nie meer die leuen van die waarheid kan onderskei nie. Daarom is 1 Pet.4:17 vanoggend baie aktueel: “Want die tyd is daar dat die oordeel moet begin by die huis van God”.
Mense verrig geen boosheid so gelate as wanneer hulle dit uit godsdienstige oortuiging neem nie. Daarom bevind so baie van ons volksgenote hulle nog steeds na aan die kerk, maar ver van God. Wat gaan jy vanjaar daaraan doen?
Om te waarsku maak ʼn mens nooit gewild nie, veral nie op kerklike vlak nie. Dis egter noodsaaklik al word mense ook hoe kwaad vir die waarheid. “As julle beledig word oor die Naam van Christus, is julle gelukkig, omdat die Gees van die heerlikheid en van God op julle rus...” (vers 14).
Beskou dit as jou plig om vir die waarheid te stry want ʼn kerk wat die waarheid nie liefhet en beskerm nie, is vir sy volk ʼn gevaar en het geen bestaansreg nie. Laat ons egter nie bloot teen leuens te velde trek nie. Vervang hulle eerder met die waarheid. Ons het God se Woord en dien in ʼn kerk wat die waarheid liefhet en dien. Dit behoort nie te moeilik te wees nie.
Openb.17 en 18 teken vir ons die laaste kerk. Dis so mislei en het so ontspoor, dat dit vir God ʼn gruwel is! Hy sorg egter dat ʼn klein groepie mense nie deur hierdie afvallige kerk besoedel word nie deur hulle tot waarheidsdiens op te roep en vir die verkondiging daarvan te begeester. Jesus noem hulle: “My volk”.
Die AP Kerk bely dat Jesus aan die regterhand van God sit vanwaar Hy sy kerk bewaar en regeer. Hy laat nooit die werk van sy hande vaar nie. Daar sal altyd ʼn groepie gelowiges wees wat die waarheid te midde van ʼn wêreld van leuens verkondig. Jesus Christus, die Hoof van die kerk, sorg daarvoor!
Let maar op die geskiedenis van die Bondsvolk. Telkens as hulle ontspoor het, het God gesorg dat ʼn klein groepie getroues oorbly om sy kerk weer op te bou. Die sogenaamde res. En so gaan dit dwarsdeur die geskiedenis. Dink maar aan die Hervorming. Toe die Roomse Kerk ontspoor, het God op sy tyd vir Luther en Calvyn begeester om die waarheid voort te sit. Kyk ook na die AP Kerk se eie geskiedenis! En so sal God aanhou om sy kerk te suiwer totdat Jesus kom.
Waar staan jy? Is jy deel van hierdie res? Waarsku jy of bly jy stil al sien jy die gevaar dreig? Dan sal die oordeel waarvan die teks praat ook oor jou kom! “Vreeslik is dit om te val in die hande van die lewende God” (Heb.10:31).
Amen