Gedagtes vir elke dag
Of lees almal by Gedagtes vir elke dag
Kundigheid vloei soos ‘n sterk stroom deur ‘n eerbare volksleier se lewe sonder dat hy daarmee te koop loop. Hy dra dit soos ‘n sakhorlosie uit die oog en haal dit net uit as iemand daarna vra.
WAAR STAAN JY?
Ds Andrè van den Berg
“Want daar is een God en Middelaar tussen God en die mens, die mens Christus Jesus” - 1 Tim.2:5
Die wêreld het al talle mense opgelewer wat groot naam in die geskiedenis gemaak het. Sommige van hulle was beroemd terwyl ander weer berug was. In sekere gevalle beide beroemd en berug! Napoleon was een van hulle. Hy is in 1821 op 52 jarige ouderdom as krygsgevangene op St. Helena oorlede. Ek het in April 2001 die huis waar hy sy laaste dae op die eiland geslyt het besoek.
Napoleon was sterk oppad om die algehele heerser van Europa te word. Alles het gevlot totdat hy in 1812 ʼn reuse fout begaan het. Hy het Rusland met ʼn groot troepemag in die laat herfs binnegeval waarna die strawwe winter hulle oorval het. Toe hy sy fout agterkom en terugval, het hy tot sy skok gevind dat die Russe die enigste brug oor die Njeperrivier vernietig en hul roete huiswaarts afgesny het.
Meer as 100,000 soldate het van koue omgekom alvorens ʼn tydelike brug in werking gestel is. Dit word vertel van soldate wat so koud gekry het, dat hulle perde oopgeslag en binne-in die karkasse geklim het net om warmte te kry! Die vernietiging van hierdie lewensnoodsaaklike brug het baie lewens geëis.
Die Bybel praat ook in geestelike sin van ʼn brug wat vernietig is en miljoene lewens geëis het – die brug tussen God en mens. Ja, 1812 is ʼn treurige verhaal. Gen.3 is veel erger! 1812 se lewensverlies was eenmalig. Gen.3 s’n gaan nog steeds onverpoosd voort; duisende per dag!
Soos wat die Russe die brug oor daardie rivier vernietig het, het sonde die brug tussen God en mens vernietig. Niemand kon dit herstel soos wat die Franse die Russiese brug na ʼn tyd kon herstel nie. Dit was onoorbrugbaar met die mens en sy gewisse dood aan die een kant en God met die lewe aan die ander kant.
Na Gen. 3 het God ʼn tydelike brug daar kom stel. Dit was egter wankelbaar en is min gebruik. Dis die Tien Gebooie genoem. Om by God aan die ander kant te kom, moes mense oor die brug van die onderhouding van die Tien Gebooie loop. Nou kan u dink hoeveel mense op hierdie wyse by God uitgekom het. As dit vandag nog die enigste brug tussen God en mens was, wonder ek hoeveel van ons gered sou word? Beslis nie ek nie!
God het egter in die volheid van die tyd ingegryp en hierdie brug gesluit. Dit was te wankelrig en in die plek daarvan ʼn nuwe brug gebou. Die opening van hierdie brug is een nag deur ʼn engel aan skaapwagters aangekondig: " Moenie vrees nie, want kyk, ek bring julle ʼn goeie tyding van groot blydskap wat vir die hele volk sal wees ...” (Luk.2). Met volk word die hele mensdom bedoel.
Jesus Christus is die nuwe, onwankelbare brug tussen God en mens. “Ek is die weg en die waarheid en die lewe; niemand kom na die Vader behalwe deur My nie” (Joh.14:6). En soos brûe het hierdie brug ook ʼn naam – MIDDELAAR.
Soos wat daardie Russiese brug tussen die Franse soldate en die lewe gestaan het, staan hierdie goddelike brug tussen ons en die ewige lewe. As ons nie oor hierdie brug loop nie, sterf ons vir ewig. As ons wel daaroor gaan, leef ons vir ewig.
Die ware kerk van Christus bely deur die eeue die middelaarskap van Christus. Hy is die enigste brug. Dis een van die kardinale leerstukke van die Bybel. Daarsonder is die Christendom soos ʼn rugbywedstryd sonder ʼn bal! Nogtans is daar wel ʼn kerk wat die wedstryd sonder ʼn bal speel – die Roomse Kerk (RK).
Hierdie kerk bely nie die middelaarskap van Christus nie. Hulle het ʼn mens as middelaar – Maria, Jesus se aardse moeder. Die Heidelbergse Kategismus (HK) leer ons dat een sondaar nie ʼn ander sondaar kan verlos nie. Sondag 15 vra die vraag hoe ʼn verlosser moet wees? Die Kategismus antwoord dat dit een moet wees wat waarlik God en waarlik mens is. Net Christus voldoen hieraan!
Die Christendom verskil van afgodsdiens wat leer dat ʼn mens homself kan red. Enige godsdiens wat leer dat jy jouself kan red of dat ʼn ander mens jou kan red, is uit die bose! “Maar al sou ons of ʼn engel uit die hemel julle ʼn evangelie verkondig in stryd met wat ons julle verkondig het, laat hom ʼn vervloeking wees” (Gal.1:8). Dis presies waarmee die RK haar eeue lank besig hou; ʼn vreemde evangelie – afgodery wat as Christendom verdoesel word. En dis waarteen die groot Hervormers soos Luther en Calvyn in opstand gekom het!
Satan het meesterlik daarin geslaag om die vroeë Christelike kerk binne te dring en die hart van die Evangelie, dat Jesus as die enigste Verlosser is, uit te ruk en met Maria te vervang. In die Roomse gebedekrale word daar 52 keer tot Maria gebid sonder om Jesus se Naam eenmaal te noem!
Een van die grootste lasteraars van alle tye was ʼn Roomse kardinaal Alphonso Liguori. In een van sy boeke bid hy as volg tot Maria:
“ O, vlekkelose maagd, ons wat onder u beskerming staan, het vrymoedigheid om u te versoek om u Seun, Jesus Christus, te verhoed dat Hy, geïrriteerd deur ons sondes, ons verlaat en aan die duiwel oorgee. U, heilige Maria, is ons enigste hoop, Moeder in die hemel, en ons het maar net een voorspraak en dis uself. U alleen is liefdevol en bekommerd oor ons saligheid. U is ons koningin en middelaar tesame met u Seun, tot wie ons nie durf nader nie”.
Dis onbeskaamde menseverering en laster! Wat dit erger maak, is dat hy nie van dwaalleer aangekla is nie, maar jare later selfs gekanoniseer is d.w.s. tot ʼn heilige verklaar is!
Die RK trek ʼn baie duidelike streep deur Christus se middelaarskap. Hoe kan iemand wat die middelaarskap van Christus ontken in die hemel kom? So ʼn persoon wil dan van ʼn ander brug na die hemel gebruik maak wat nie bestaan nie. Wat ʼn oordeel wag daar nie op hom nie - die ewige hel met al sy verskrikkinge.
Die eerste Christelike kerk het geen rol aan Maria toegeken nie. Soos wat Satan die kerk binnegedring het, het die leer van die middelaarskap van Maria al hoe meer veld gewen. In die vierde eeu het die Melekiete-sekte Maria as een van die Drie-eenheid geleer – Vader, Seun en Maria.
Soos wat die leer van die RK gegroei het, was daar altyd van ware gelowiges teenstand. Sommige is uit die kerk geban terwyl ander hul lewens op grusame wyses verloor het. Geen kerk het meer bloed aan sy hande as die RK nie.
Die teenstand teen die RK se dwaalleer het op Sondag 31 Okt.1517 ʼn klimaks bereik toe ʼn jong Martin Luther sy opspraakwekkende 95 stellings teen sy kerkdeur in die Duitse stad Wittenberg vasgespyker het. God het hierdie waarheidsbeweging ryklik geseën en in getal laat toeneem. En so het die een protestantse kerk na die ander tot stand gekom. Ons eie kerk deel in hierdie ryke geestelike erfenis; Afrikaanse Protestantse Kerk.
In ons teksvers bemoedig Paulus ʼn jong Timotheüs wat die wind baie sterk van voor gekry het. En nie van heidene nie, maar van mense wat onder die vaandel van Christenwees gevaar, maar gedwaal het deur te leer dat goeie werke jou ook kan red soos die RK leer. Dis die verkeerde brug!
Soos wat Napoleon se soldate bly was toe die brug oor die rivier herstel is en hulle huis toe kon gaan, is ons ook bly dat die brug tussen God en mens deur Christus se sterwe vir ons herstel is en as ons aardse stryd verby is, ons ook eendag huis toe kan gaan. Jesus belowe in Joh.14 dat Hy vir ons plek gaan berei het.
Brûe word gebou om te gebruik. Het jy die een van God al gebruik? Baie mense stap tot by die oewer en hoop dat God hulle raaksien en vir hul godsdienstige moeite beloon. Maar hulle loop nie oor nie. Of jy een meter of ʼn kilometer van ʼn brug is, jy is nog nie oor nie! As jy nie oorloop nie, staan jy nog aan die ander kant van God. En wie aan die ander kant staan, gaan hel toe! Dink maar hier aan die vyf dwase maagde wat aan die deur van die feesmaal klop en soebat om ingelaat te word. Dan sê die bruidegom vir hulle om weg te gaan want hy ken hulle nie!
Waar staan jy op– op die oewer of het jy al oor die brug tot by God geloop? Onthou; dis ʼn geval van lewe of dood .... en dit vir ewig!
Amen!