Gedagtes vir elke dag
Of lees almal by Gedagtes vir elke dag
Eerbaarheid is ‘n vuur wat aangesteek is en maklik aan die gang gehou word. As dit egter eers geblus is, kry ‘n mens dit moeilik weer aan die gang. Dis soos fyn porselein wat maklik breek en nooit weer na wense heg nie.
HERVORMING 500 (1)
Ds Andrè van den Berg
“Want niemand kan ʼn ander fondament lê as wat daar gelê is nie, dit is Jesus Christus” (I Kor. 3:11).
Die Bybel noem die kerk die liggaam van Christus. Paulus skryf: “Maar julle is die liggaam van Christus en lede afsonderlik” (1 Kor.12:27). Omdat die kerk Jesus se liggaam is, haat die Satan dit en probeer hy om dit vanaf die ontstaan met bose strategieë te vernietig. Hy het dit eers met fisiese vervolging probeer vernietig. Toe dit nie werk nie, het hy in die midde van die kerk met dwaalleer opgeduik. Dit het spoedig ʼn bres in die kerkmuur veroorsaak waardeur talle heiden-elemente die kerk binnegespoel en van die waarheid vervreem het.
Baie van hierdie heiden-gebruike het so ingebed geraak, dat mense leuens nie meer van die waarheid kon onderskei nie - alles aan die kerk se nalatigheid te wyte. In plaas daarvan dat die kerk die wêreld binnedring en lig in die duisternis bring, het die wêreld die kerk binnegedring en die lig van die Evangelie verdof.
Dit het o.a. tot ʼn herlewing van die ou Babiloniese afgodsdiens gelei wat die begin van die Roomse Kerk (RK), die grootste dwaalleer van alle tye,was. Dit het in die derde eeu nC in Pergamus, ʼn Romeinse stad in Klein Asië (Turkye), begin. Die stadspolitiek was destyds met keiserverering verweef en mense soos marionette aan ʼn lyntjie beheer. Die RK sou spoedig dieselfde resep volg en mense met pousverering beheer!
Die RK is nie maar net nog ʼn Christelike kerk wat so ʼn bietjie anders as die ander kerke te werk gaan nie. Dis nie ʼn kerk in die ware sin van die woord nie, maar eerder ʼn reuse sisteem van verbloemde afgodery wat sondaars ver verby die reddende genade van die Here Jesus Christus voer. Die kerklike duisternis wat destyds op die kerklike wêreld toegesak het, staan in die geskiedenis as die Donker Eeue bekend. Waarom? Omdat die RK met al haar heiden-gebruike nie die lig van Jesus in ʼn donker wêreld kon laat skyn nie.
Die Bybel leer dat Jesus met sy hemelvaart aan die regterhand van God gaan sit het vanwaar Hy sy kerk regeer en bewaar. En Hy doen dit. Ten spyte van die reuse heiden-aanslag deur die RK het Christus sy kerk eeue lank met groepies Skrifgetroue gelowiges bewaar wat 500 jaar gelede tot ʼn hervorming gelei het.
Protestantisme was ʼn vars bries in ʼn bedompige kamer en ʼn terugkeer na die ware kerk met haar vaste geloof en geseënde eenvoud. Christus het verhoed dat die waarheid in die stortvloed van Roomse afgodery wegspoel. Daarom vier ons jaarliks in Oktober hierdie terug-na-die-Bybelomkeer met vreugde!
Protestantisme is egter nie ʼn nuwe godsdiens nie, maar eerder ʼn geseënde terugkeer na die eerste kerk wat haar geloof op die Bybel alleen gegrond het. ʼn Kerk is alleenlik suiwer indien haar fondament reg is. “Want niemand kan ʼn ander fondament lê as wat daar gelê is nie, dit is Jesus Christus” (I Kor. 3:11).
Toe Protestantisme die Bybel as die hoogste kenbron in ere herstel het, het duisende mense met die RK gebreek. Kort daarna is die Bybel,wat slegs in Latyn beskikbaar was, in Duits vertaal sodat die man op straat dit ook kon lees. Want op daardie stadium was lidmate van die RK al eeue lank verbied om die Bybel te lees. Dis in 1229 selfs op ʼn lys van verbode boeke geplaas!
Al wat mense destyds van die Bybel geweet het, was dit wat priesters vir hulle vertel het. Dit was basies ʼn verseëlde boek. Deur priesters die alleenverklaarders daarvan te maak, het die RK, soos in ou Babilon mense met godsdiens beheer. Mense se gedagtegang word maklik met godsdiens beheer. So het die RK mense gebreinspoel om alles wat die priesters sê, te glo en as die enigste pad na die hemel te aanvaar. Daarom was Protestantisme ʼn geseënde, noodsaaklike omwentelingwat die Bybel vir gewone mense toeganklik gemaak en die kerk van heiden-gebruike gesuiwer het.
Protestantisme en Rooms Katolisisme het bitter min raakpunte. Een van die grootste verskille is die verlossingsleer – hoe kom ʼn sondaar in die hemel. Die RK leer dat sondaars hulle nie tot Christus hoef te bekeer nie omdat hulle as lidmate van die RK outomaties hemel toe gaan. Jesus is daar nie die middelaar tussen God en sondaars nie, maar die RK. Daarom verkondig sy dat daar geen redding buite haar te vinde is nie. Wie nie aan haar behoort nie, gaan hel toe!
Dis ʼn leuen en skreeu teen die teksvers “Want niemand kan ʼn ander fondament lê as wat daar gelê is nie, dit is Jesus Christus”. Waarom verkondig die RK so ʼn gruwelike leuen? Omdat sy in diens van Satan is en Satan mense wil verhoed om hemel toe gaan.
Die RK leer dat Jesus se sterwe aan die kruis nie voldoende vereffening vir sondeskuld is nie en die uitstaande balans deur die gebruik van sakramente gedelg moet word. Kerklidmaatskap en die sakramente dra sondaars die hemel in. Daarom leer die RK geen persoonlike verhouding tussen sondaar en Jesus Christus nie. Die kerk sal die nodige verlossing doen.
Die RK hamer op die doen van goeie werke en omskryf dan ook wat sy met goeie werke bedoel. Heel bo aan die lys staan die gebruik van sakramente. As jy jou kind laat doop, is dit ʼn goeie werk. As jy die misoffer bywoon, is dit ʼn goeie werk. As jy bieg, is dit ʼn goeie werk. Alles draai om die as van goeie werke– verdienste en nie genade nie.
Vir die RK is die gebruik van sakramente belangrik. Die Bybel leer dat daar twee sakramente is - die doop en die nagmaal. Die RK huldig sewe! Om alles te bekroon, dwaal sy met die twee egte sakramente. Die RK glo dat die doop die wedergeboorte is en erfsonde vergewe. Alle sonde wat daarna gepleeg word, kan net deur boetedoening en deelname aan die misoffer vergewe word.
Vir die RK is liturgie belangrik. Sy beskou dit as die fontein waaruit God se genade na sondaars vloei. Die grootste deel van haar liturgie draai om die as van die misoffer, iets wat asseblief nie met die Bybelse nagmaal verwar moet word nie. Dis ʼn weersinswekkende, onbloedige wederkruisiging van Christus. Die Bybel leer dat die nagmaal ʼn gedagtenis maaltyd is. Jesus sê: “Doen dit tot My gedagtenis”.
Die Bybel leer dat Jesus se offer aan die kruis eenmalig genoegsaam vir redding is. Want die dood wat Hy gesterf het, het Hy vir die sonde eens en vir altyd gesterwe...” (Rom.6:10). Dit kan dus nooit herhaal word nie. Jesus kan nie weer aan ʼn kruis sterf en sy liggaam weer geoffer word nie.
Alles in ag genome, verkondig die RK ʼn ander Jesus as die Bybelse Jesus. Paulus waarsku teen valse profete wat ʼn ander Jesus as dié Een van die Bybel gaan verkondig: “Maar ek vrees dat, net soos die slang Eva deur sy listigheid bedrieg het, julle sinne miskien so bedorwe kan raak, vervreemd van die opregtheid teenoor Christus. Want as iemand kom en ʼn ander Jesus verkondig.... laat julle jul dit goed geval” (2 Kor.11:3,4).
Die Jesus van die RK is ʼn ander Jesus. Hierdie Jesus staan in die skadu van Maria, die eintlike redder wat in die RK hartstogtelik aanbid en verheerlik word. Dink maar aan Schubert se klassieke werk Ave Maria – die mooiste melodie met die weersinwekkendste lasterlike woorde denkbaar!
Die RK het ʼn bedenklike geskiedenis. Die geskiedenis vertel die lelike verhaal van miljoene mense wat nie met die RK se dwaalleer genoeë geneem het nie en gefolter en wreed om die lewe gebring is. Getalle word op minstens 80 miljoen geskat. Die RK is ʼn duif met roofvoël instinkte!
In Openb.13:11 lees ons van die valse profeet: “.... en hy het twee horings gehad soos ʼn lam en het gepraat soos ʼn draak”. Die RK lyk op die oog af goed, maar praat soos ʼn draak. Baie van haar gruwels het aan die lig gekom nadat van haar kerklui tot bekering gekom en begin praat het. Dr. Malachi Martin, ʼn emeritus professor, was een van hulle. Toe hy die RK verlaat het, het hy ʼn skokkende boek A Windswept House(1996) geskryf waarin hy die gordyn oor Satansaanbidding in die Vatikaan gelig het. Alhoewel dit as ʼn roman geskryf is, het dr. Martin gesê dat dit 95% op ʼn werklike Satans-ritueel gegrond is wat tydens die ampstermyn van pous Johannes Paulus 2 in die Vatikaan plaasgevind het.
Tydens ʼn Internasionale Kongres oor Wêreldvrede in 2000 het aartsbiskop Emmanuel Milingo, skrywer van Face to Face with the Devil, getuig dat Roomse kerklui in die geheim by formele Satansaanbidding betrokke is en deur hoë kerklui beskerm word.
Dis egter niks nuuts nie. In 1976 het pous Paulus VI erken dat die rook van Satan die heiligdom van die Petruskerk binnegedring het. Hy was van die Satan-nagmaal (Black Mass) bewus wat telkens in die middernagtelike ure op dieselfde altaar gevier is as waarop hy die misoffer bedien het!
Alles in ag genome kan ons God nie genoeg dank vir die egtheid en eenvoud van Protestantisme nie. Ons dank Hom vir ʼn Maarten Luther wat teen die Satan se leer opgestaan het en Protestantisme op die regte fondament begin bou het. Dis ʼn vaste fondament omdat Jesus Christus die fondament is!