Gedagtes vir elke dag
Of lees almal by Gedagtes vir elke dag
Die meeste mense dink liefde is om besitlik te wees en iemand anders as joune te bestempel, maar liefde beteken juis dat 'n mens iets prysgee; jou voorkeure, gemak, doelwitte, sekuriteit, geld, energie en tyd, tot voordeel van daardie ander persoon. Ware liefde beteken nie 'n ekstatiese euforie nie maar die opoffering van baie dinge tot voordeel van die ander persoon.
KERK EN BLINDE LOJALITEIT
ʼn Doodsakker
Ds. A.E van den Berg
Inleiding
Omdat leraars deur God geroep is en met sy gesag optree, ontvang hulle van mense agting:
“Gedenk julle voorgangers wat die woord van God aan julle verkondig het; aanskou die uiteinde van hulle lewenswandel en volg hulle geloof na(Hebr.13:7).
Desondanks bly hulle sondaars wat ook mislei kan word om, net soos Eva, die kwaad vir goed aan te sien. Daarom kan leraars/kerke wat nie waaksaam genoeg is nie, van die waarheid afdwaal en blind-lojale mense soos ʼn geestelik vuurvaste muur om hul bou. Met hul voortgesette lidmaatskap betuig hulle hul instemming met die dwalings en maak die deur vir verdere dwaling wawyd oop.
1. Boodskap en boodskapper
Lojaliteit maak egter nie altyd van mense beter mense nie. Dit het ook ʼn donker sy en laat mense slegte besluite neem. Sulke mense weet bv. voor hul siel dat hul kerk dwaal, maar beëindig nie hul lidmaatskap nie. En so seëvier die leuen bo die waarheid.
Blinde lojaliste hanteer kerke soos wat baie mense mediese praktyke hanteer. Hulle aanvaar dokters se kundigheid sondermeer en bevraagteken nie hul werk nie. So ook met leraars – hulle skei nie die boodskapper van die boodskap nie, met die gevolg dat dit tot ontsporing en dwaalleer kan lei.
Gelowiges moet, soos die gelowiges in Berea, altyd die boodskap aan die waarheid van die Skrif toets:
“En hierdie mense was edelmoediger as dié in Thessalonika; hulle het die woord met alle welwillendheid ontvang en elke dag die Skrifte ondersoek of hierdie dinge so was”(Hand.17:11).
Paulus skryf ook aan die Romeine:
“Want wat maak dit as sommige ontrou geword het? Sal hulle ontrou miskien die getrouheid van God vernietig? Nee, stellig nie! Maar God moet waaragtig wees en elke mens leuenagtig....” (Rom.3:2,3).
Jakobus waarsku ook:
“Moenie baie leermeesters wees nie, my broeders, omdat julle weet dat ons ’n groter oordeel sal ondergaan” (Jak.3:1).
Daarom moet kerke noukeurig toesien dat hulle leraars die volle waarheid van God se Woord verkondig en oor die nodige geestelike spierkrag beskik. Hulle hoef nie noodwendig die dwarslat te lig nie, maar wel toesien dat leraars telkens daaroor kan spring.
“Ek vermaan die ouderlinge onder julle, ek wat ’n mede-ouderling en getuie van die lyde van Christus is, wat ook ’n deelgenoot is van die heerlikheid wat geopenbaar sal word: Hou as herders toesig oor die kudde van God wat onder julle is, nie uit dwang nie, maar gewillig; nie om vuil gewin nie, maar met bereidwilligheid; ook nie as heersers oor die erfdeel nie, maar as voorbeelde vir die kudde. En wanneer die Opperherder verskyn, sal julle die onverwelklike kroon van heerlikheid ontvang” (1 Pet.5:1-4).
Paulus skryf dat ʼn leraar se amp aan sy persoon verbind is en dat die beeld van God in hom kan skitter:
“Julle is getuies, en God, hoe heilig en regverdig en onberispelik ons ons gedra het teenoor julle wat glo” (1 Thess.2:10).
“...hulle moet niks ontvreemd nie, maar alle goeie trou betoon, sodat hulle die leer van God, ons Verlosser, in alles kan versier” (Tit.2:10).
2. Valse vreugde
Al kom die woord lojaal nêrens in die Bybel voor nie, is dit ʼn Christen-deug wat in ander woorde in die Bybel uitdrukking vind. Dit kan egter ʼn deug of ʼn ondeug wees. Dis alleenlik ʼn deug as ʼn lojalis sy vertroue in iemand wat die waarheid liefhet en voorstaan, plaas. Dit laat mense nie alleen in ʼn onseker wêreld voel nie.
Blinde lojaliteit kan mense egter slegte besluite laat neem. Baie daarvan kom van lidmate van kerke wat aanvanklik die waarheid verkondig en toe deur die wêreldstroom van vrysinnigheid verspoel en van die waarheid afgedwaal het. Hulle maak verkeerde keuses, draai net soos hul kerk ʼn blinde oog vir sondes en verdedig hulself met swak verskonings. Dis die vloek van misplaaste lojaliteit!
3. Gevaarlik
Niks laat dwaalleer soos blinde lojaliteit gedy nie. Dit hou kerke wat tot niet moes gaan, aan die lewe. Hierdie kerke trek voordeel uit blinde lojaliteit want dit verseker getalle en fondse al kom lidmate se geestesgesondheid in die gedrang. En as dinge handuit ruk, veroorsaak dit selfs die dood soos met die selfmoord van meer as 900 mense in 1978 onder die kultusleier Jim Jones.
Dit bewys dat blinde lojaliteit onafhanklike meningsvorming belemmer. Hoe groter die omvang, hoe gevaarliker kan dit word. Diktators en dwaalleraars teer daarop.
4. Verraad
Blinde lojaliteit huisves ʼn element van verraad. Wanneer ʼn volk homself teen die aanslae van ʼn volksvyand moetverweer en ʼn beduidende deel van sy eie mense is blind-lojaal teenoor kerke of instansies wat die vyand gedienstig is, kom dit op verraad neer. Suid-Afrika is ʼn sprekende voorbeeld hiervan!
Lojaliteit moet beperkings hê. Gelowiges durf nie lojaal teenoor kerke en/of leraars wees wat dwaal nie. Paulus was by geen saak wat nié die Evangelie bevorder het, betrokke nie.
“Wees my navolgers, soos ek dit ook van Christus is” (1 Kor.11:1).
Paulus het baie lojale aanhangers gehad. Hy skryf aan hulle en sê dat hulle lojaliteit aan hom uitsluitlik van die lojaliteit aan Christus moet afhang. As hy dwaal, durf hulle hom nie langer volg nie. Dis ʼn baie groot waarheid. Lojaliteit moet Skriftuurlik begrond wees en nie uit ʼn misleide pligsgevoel ontwikkel nie omdat dit tot skadelike opdragte kan lei!
5. ʼn Fyn lyn
Die lyn tussen reg of verkeerd is dikwels baie fyn. Daarom moet gelowiges alleenlik leraars wat die waarheid liefhet en in God se weë wandel, vertrou. Alle lering wat nie met die gesonde leer van die Skrif ooreenstem nie, moet summier verwerp word ongeag wie dit verkondig
“En ek vermaan julle, broeders, hou hulle in die oog wat tweedrag en aanstoot veroorsaak teen die leer wat julle geleer het, en vermy hulle” (Rom.16:17).
“Maar ons vra julle, broeders, erken die wat onder julle arbei en julle voorgangers in die Here is en julle vermaan; en bewys hulle in liefde die hoogste agting ter wille van hulle werk. Hou vrede onder mekaar” (1 Thes.5:12.13).
6.Groepsdruk
Blinde lojaliste maak dikwels groot foute omdat hulle nie nugter oor ernstige sake dink nie en alles wat gesê word vir soetkoek opeet. Dis die vloek van groepsdruk met blinde lojaliteit as onderbou. Mense kies soms doelbewus verkeerd net om nie deur hul groep verwerp te word nie al beteken dit dat hulle ontrou aan hul eie hart is.
Mense reageer in sulke gevalle baie soos diere. Hulle doen wat die res van die groep doen en voel geborge tussen mense wat eenders is. Hulle is, soos in Jesus se tyd, bang vir die gevolge van anders te wees:
”Tog het niemand openlik oor Hom gepraat nie, uit vrees vir die Jode” (Joh.7:13).
6. Die laaste lojaliteit
Blinde lojaliteit lei maklik tot breinspoeling. Dis waarmee die Roomse Kerk haar lidmate al eeue lank breinspoel. Die selfde ding steek sy kop by talle plaaslike Protestantse uit– buig of word uitgeskop! Dis die begin van die openbaring van die kerk van die Antichris aan die suidpunt van Afrika.
“Hulle het een gesindheid en sal hulle krag en mag oorgee aan die dier” (Openb.17:13).
Slot
Waar staan jy? Maak jy jou eie besluite of volhard jy met jou lidmaatskap aan dwaalkerke? Tou jy maar blindelings in die ry? Watter soort wêreld skep ons vir ons geliefdes as die waarheid nie meer vir ons saak maak nie?