Gedagtes vir elke dag
Of lees almal by Gedagtes vir elke dag
Hoe kom Jesus aarde toe? As ‘n Regter; Openbaring is duidelik hieroor. Met sy eerste koms het Jesus as ‘n nederige dienskneg gekom. Met sy tweede kom Hy as Regter en dit gaan vreeslik wees: “En ek het ‘n groot wit troon gesien en Hom wat daarop sit, voor wie se aangesig die aarde en die hemel weggevlug het....” (Openb.20:11).
DEMONIESE MARIA-VERSKYNSELS
Ds. A.E van den Berg
“Julle mag vir julle geen afgode maak nie; en ’n gesnede beeld of ’n klippilaar mag julle vir julle nie oprig nie en ’n steen met beeldhouwerk in julle land nie opstel om julle daarby neer te buig nie; want Ek is die HERE julle God” (Lev.26:1).
Inleiding
Protestante sal nooit die Roomse Kerk (RK) se afgodiese liefde en toewyding aan Maria begryp nie. Daarvoor moet ʼn mens as’t ware met ʼn Roomse gewete gebreinspoel wees. Die Bybel vermeld geen heilige moeder of koningin in die hemel nie. Dit wat die RK leer is suiwer Babilonies en niks anders nie as ’n herlewing van die ou Babiloniese afgodsdiens wat die godin Semiramis net met ʼn ander naam vereer:
“Die kinders maak hout bymekaar, en die vaders steek die vuur aan, en die vroue knie deeg om koeke te maak vir die hemelkoningin en vir ander godedrankoffers uit te giet om My te terg” (Jer.7:18).
1. Verskynsels
Getuienisse oor verskynsels van hierdie godin is eie aan die RK. Lidmate glo vas dat dit van goddelike oorsprong is en van Maria se voortgaande moederlike sorg vir die kerk getuig. Die verskynsels vestig glo mense se aandag op een of ander aspek van die kerk veral met die oog op die behoeftes van die tyd.
Sommige het met bonatuurlike gebeure soos bv. genesing gepaard gegaan om die aandag op die boodskap te vestig.
Die RK aanvaar egter nie alle aansprake van verskynsels nie en het ʼn amptelike ondersoekproses van stapel gestuur om die egtheid daarvan te ondersoek. Dit het ook al gebeur dat die egtheid van ʼn verskynsel nie ondersoek is nie maar dat die godsdiensgebruike wat dit laat ontstaan het sondermeer goedgekeur is.
Baie van die aansprake wat ondersoek is, is afgekeur. Van die laastes is “Our Lady of Surbiton” wat in 2007 verwerp is. Sommige van die verskynsels wat wel goedgekeur is, het sedertdien ʼn groot impak op die breë kultuur soos bv. Our Lady of Guadalupe in Mexiko.
2. Afgodery
Vir van die verskynsels het die aanskouers gevra om ʼn plek van aanbidding tot hul eer op te rig. Dit sê baie. Die satan begeer om aanbid te word (Mt.4:8-10). So ook sy dienaars wie se aanbiddingsplekke gewilde pelgrimsoorde geword het en miljoene besoekers per jaar lok.
Die basilika vir Our Lady of Guadalupe (Mexiko) ontvang bv. nagenoeg 10 miljoen besoekers per jaar, die Sanctuary of Our Lady of Fátima (Portugal) 6-8 miljoen en die Sanctuary of OurLady of Lourdes (Frankryk) 5 miljoen.
Die RK gee besondere eer aan die Fatima-verskynsel wat in 1917 aan drie jong kinders in Portugal verskyn het. Dit het voorspellings, versoeke, waarskuwings en beloftes rakende die Roomse geloof gemaak wat spoedig tot formele gebede in die kerk ontaard het.
Sommige van hierdie kerke stuur selfs standbeelde van dié verskynsel as gelukbringers na huise om op ʼn sentrale plekke geplaas te word sodat lidmate in weerwil van God se bevel daarvoor kan neerkniel en tot Maria bid.
“Jy mag vir jou geen gesnede beeld of enige gelykenis maak van wat bo in die hemel is, of van wat onder op die aarde is, of van wat in die waters onder die aarde is nie. Jy mag jou voor hulle nie neerbuig en hulle nie dien nie; want Ek, die HERE jou God, is ’n jaloerse God...” (Ex.20:4,5).
God haat afgodery.
“God is Gees; en die wat Hom aanbid, moet in gees en waarheid aanbid” (Joh.4:24).
3. Bose geeste
Hierdie verskynsels is bose geeste; engele wat voor die skepping teen God in opstand gekom en saam met Satan uit die hemel gewerp is (2 Pet.2:4; Judas:6). Hulle slaag daarin om mense te mislei, selfs kerke:
“.... Want die satan self verander hom in ’n engel van die lig. Dit is dus niks besonders wanneer sy dienaars hulle ook voordoen as dienaars van geregtigheid nie, maar hulle einde sal wees volgens hulle werke” (2 Kor.11:14,15).
Leë siele neig tot booshede. Daarom verskyn bose geeste telkens aan mense wat kennis van die bonatuurlike wil bekom. Wie ʼn onheil uitbroei, word spoedig self daardeur vernietig!
Alle bonatuurlike verskynsels moet gelowiges aan die geestelike stryd in die geloofslewe herinner. Efes.6 praat van ’n stryd wat nie teen vlees en bloed gevoer word nie, maar teen die onsigbare magte van die duisternis. Bose geeste verskyn in alle denkbare vorms, selfs in geestelike gewaad.
Wie sy ore vir bonatuurlike verskynsels uitleen, maak die deur vir die satan oop. Dis hoe die Fatima-verskynsel amptelike Roomse dogma geword het; ‘n kerk wat die duisternis met haar rug na die lig aanbid!
“En Hy sê vir hulle: Julle verstaan dit goed om die gebod van God opsy te sit en so julle oorlewering te onderhou” (Mark.7:9).
Die donker wêreld van die satan prikkel sommige mense se belangstelling. Wie nie met die satan handel wil dryf nie, moet uit sy winkel wegbly. Dis uiters gevaarlik want wie volgens die satan se kode leef, word aan sy reëls gebind!