Gedagtes vir elke dag
Of lees almal by Gedagtes vir elke dag
Onthou jy toe jy klein was het jy gebid: "Liewe Jesus ek is klein; maak my asseblief my hartjie rein."? Vandag moet jy meer as tevore vir 'n rein hart bid want Satan beur met alle mag om ons onrein te maak sodat ons nie God se belofte sal beleef toe Hy gesê het wie rein van hart is sal Hom eendag van aangesig tot aangesig sien.
OM MET GOD TE SPOT
Ds A.E. van den Berg
“Want die toorn van God word van die hemel af geopenbaar oor al die goddeloosheid en ongeregtigheid van die mense wat in ongeregtigheid die waarheid onderdruk ...” (Rom.1:18).
ʼn Volk wat God se Woord minag, kan nie staande bly nie, veral soos met Suid-Afrika gebeur het. Mense het hier aan die suidpunt van Afrika teen God se skeppingsorde in opstand gekom, die leuen bo die waarheid verkies en dra vandag die bittere gevolge daarvan. Dit het ʼn lugleegte gelaat wat met allerlei sedelose praktyke gevul is waarvan homoseksualisme sekerlik die heel walglikste is.
Die Bybel veroordeel homoseksualisme in geen onduidelike taal nie en skep nie die geringste ruimte vir enige verdraagsaamheid daarvoor nie. Dit word nêrens as ʼn eiesoortige erotiek beskou nie. Wat sedelik verkeerd is, kan nooit vir God reg wees nie!
Homoseksualisme is een van die gruwelikste vorms van sedeloosheid van alle tye. Lev.18 bevat ʼn lys van sedelike grense wat nie oorgesteek mag word nie:
“Met ’n manspersoon mag jy ook geen gemeenskap hê soos ’n mens met ’n vrou het nie. Dit is ’n gruwel” (:22).
Wie dit beoefen het, kon met die dood gestraf word:
“En as ’n man met ’n manspersoon gemeenskap het soos ’n mens met ’n vrou het, het hulle al twee iets gruwelik gedoen. Hulle moet sekerlik gedood word....” (Lev.20:13):
Paulus skryf:
“Of weet julle nie dat die onregverdiges die koninkryk van God nie sal beërwe nie? Moenie dwaal nie! Geen hoereerders of afgodedienaars of egbrekers of wellustelinge of sodomiete of diewe of gierigaards of dronkaards of kwaadsprekers of rowers sal die koninkryk van God beërwe nie. En dit was sommige van julle; maar julle het jul laat afwas....” (1 Kor.6:9-11).
Dit slaan gelowiges derhalwe plat dat sekere kerke homoseksualisme kan goedpraat, homoseksuele leraars op hul kansels toelaat, homoseksuele leraarspare in die bediening het en selfde geslag huwelike voltrek! Hoor hulle dan nie wat die Bybel sê nie?
“...mense wat — al ken hulle die verordening van God goed, dat die wat sulke dinge doen, die dood verdien — dié dinge nie alleen self doen nie, maar ook hulle goedkeuring skenk aan die wat dit doen” (Rom.1:32).
Wat is duideliker as dit!
Is kerke nie veronderstel om teen sonde te waarsku nie?
“Want dit moet julle weet dat geen hoereerder of onreine of gierigaard, wat ’n afgodedienaar is, ’n erfdeel het in die koninkryk van Christus en van God nie” (Efes.5:5).
“Maak dood dan julle lede wat op die aarde is, naamlik hoerery, onreinheid, hartstog, slegte begeertes en gierigheid, wat afgodediens is” (Kol.3:5).
Die eerste negatiewe ding wat God in die Bybel sê, is dat dit nie goed is dat die mens alleen is nie. Daarom het Hy self die huwelik ontwerp:
“En die HERE God bou die rib wat Hy van die mens geneem het, tot ’n vrou en bring haar na die mens. Toe sê die mens: Dit is nou eindelik been van my gebeente en vlees van my vlees. Sy sal mannin genoem word, want sy is uit die man geneem. Daarom sal die man sy vader en moeder verlaat en sy vrou aankleef. En hulle sal een vlees wees” (Gen.2:22-24).
God het die huwelik ingestel om Hom te verheerlik. Geen gruwel kan dit doen nie!
Gesonde geslagtelike gedrag skep lewe. Homoseksualisme baar die dood. Daarom praat die Bybel nêrens van ʼn heilige verbintenis tussen mense van dieselfde geslag nie. So ʼn huwelik is nie ’n seën nie, maar om God openlik en uitdagend te tart!
Waar kom homoseksualisme vandaan? Van die satan. Hy is ʼn teenstander van God en homoseksualisme is sy teenontwerp van die huwelik. Satan se ontwerp wedywer vandag binne hoofstroom kerke met God se heilige huweliksontwerp!
Wie hierdie gruwel bedryf, bevind hul in ʼn onbeskermde geestesgebied met bose geeste wat hul in wellus teenoor mekaar laat ontbrand. Hierdie geeste was al in Sodom en Gomorra bedrywig. Dit wat was, sal weer wees. Jesus sê:
“Maar op die dag toe Lot van Sodom uitgaan, het vuur en swawel van die hemel afgereën en almal vernietig. Net so sal dit wees in die dag wanneer die Seun van die mens geopenbaar word” (Luk.17:29,30).
Dinge verander kort voor die wederkoms; ʼn geweldige opbloei van homoseksualisme met kerke se seën en bevestigings!
God veroordeel homoseksualisme nie anders as in die verlede nie:
“Jesus Christus is gister en vandag dieselfde en tot in ewigheid” (Hebr.13:8).
Gelowiges kan hoogstens medelye met homoseksuele mense hê, maar nie met hul beoefening daarvan nie. Homoseksueles word nie so gebore nie maar verkeerd grootgemaak. By mans is dit aan te sterk moederbindinge en by dogters aan te sterk vaderbindinge te wyte. Die dogter word soos ʼn man en die seun soos ʼn dogter grootgemaak.
God het by geleentheid so toornig op homoseksualisme geword dat Hy twee stede wat daarvan deurtrek was met vuur en swael verwoes het (Gen.19). Om hierdie gruwel as ’n chromosoom-afwyking te regverdig, is ʼn gerieflike bos waaragter sonde verskuil word. Indien homoseksualisme ʼn chromosoom-afwyking is, sou God dit nie as ʼn gruwel veroordeel en Sodom en Gomorra verwoes het nie.
Homoseksualisme is ’n bewustelike verdraaiing van God se skeppingsorde en ʼn ergerlike vergryp teen die menslike natuur:
“Daarom het God hulle oorgegee aan skandelike hartstogte, want hulle vroue het die natuurlike verkeer verander in dié wat teen die natuur is; net so het ook die manne die natuurlike verkeer met die vrou laat vaar en in hulle wellus teenoor mekaar ontbrand en in hulleself die noodwendige vergelding van hulle dwaling ontvang” (Rom.1:26,27).
Die skerp toename deesdae in homoseksualisme dui duidelik op ʼn skerp toename in heidendom. Die twee loop hand aan hand. Homoseksualisme is ’n spottery met God:
“Moenie dwaal nie; God laat Hom nie bespot nie; want net wat die mens saai, dit sal hy ook maai” (Gal.6:7).
Die Bybel is duidelik oor die uiteindelike lot van diegene wat homoseksualisme beoefen:
“Of weet julle nie dat die onregverdiges die koninkryk van God nie sal beërwe nie? Moenie dwaal nie! Geen hoereerders of afgodedienaars of egbrekers of wellustelinge of sodomiete of diewe of gierigaards of dronkaards of kwaadsprekers of rowers sal die koninkryk van God beërwe nie” (1 Kor.6:9,10).
Van al die plae wat die mensdom kan tref, is kerklike misleiding die skadelikste. Kyk maar net wat vandag in baie van die groot kerke plaaslik en internasionaal gebeur; hulle laat mense die dood vir die lewe laat aansien! Kerke omhels die wêreld in plaas daarvan om die dwaasheid daarvan aan die lig te bring:
“...want daar sal 'n tyd wees wanneer hulle die gesonde leer nie sal verdra nie, maar, omdat hulle in hul gehoor gestreel wil wees, vir hulle 'n menigte leraars sal versamel volgens hulle eie begeerlikhede, en die oor sal afkeer van die waarheid en hulle sal wend tot fabels. Maar wees jy in alles nugter.....” (2 Tim.4:3,4).
Wat is die oplossing?
Om God te bid dat Hy ons land sal genees en vir ons nuwe leiers op geestelike en politieke gebied gee wat Hom nie tart nie maar doen wat Hy vra. Sy belofte aan oud Israel is ook ʼn belofte aan ons eie volk:
“...en (as) my volk, oor wie my Naam uitgeroep is, hulle verootmoedig en bid en my aangesig soek en hulle bekeer van hul verkeerde weë, dan sal Ék uit die hemel hoor en hulle sonde vergewe en hulle land genees” (2 Kron.7:14)