Gedagtes vir elke dag
Of lees almal by Gedagtes vir elke dag
Het ons volk ons hart wat aan God behoort van Hom gesteel? Seker daarom dat ons Hom nie meer ken nie - afgedwaal het. Die troos is egter dat Hy dit nie so aanvaar nie! In Jeremia 24:7 sê Hy wat Hy ook vandag vir die Boerevolk in Suid-Afrika sê: "En Ek sal hulle 'n hart gee om My te ken, dat Ek die HERE is; en hulle sal vir My 'n volk wees, en Ek sal vir hulle 'n God wees, want hulle sal na My terugkeer met hul hele hart".
SATAN DIE VERLOORDER
Ds A.E. van den Berg
“En die groot draak is neergewerp, die ou slang wat genoem word duiwel en Satan, wat die hele wêreld verlei...” (Openb.12:9).
Hoe lyk Satan? Niemand weet nie. Sommige mense stel hom baie vreemd en selfs komieklik voor – ʼn bokagtige wese met horings, gesplete kloue en ʼn drietandvurk. Sulke voorstellings is nie Bybels nie. Dis hoe talle Middeleeuse kunstenaars hom visueel voorgestel het en die voorstellings byval gevind het.
Satan en sy demone is geeste. Hulle het nie hande, voete of enige ander sigbare menslike kenmerke nie. Dis een van die redes waarom die Bybel nie Satan se voorkoms beskryf nie. Wanneer Paulus na hom as ʼn engel van die lig verwys, praat hy nie sy voorkoms nie maar van sy gevaarlike, veranderende gedaante en optrede waarmee hy mense deur die eeue mislei.
Al wat ons van die Satan weet, is dat hy voor sy val ʼn leier-engel in die hemel by God was. Hoe hy tans lyk, weet niemand nie. Misleiers dra almal maskers waarmee hulle hul boosheid versteek ten einde mense te mislei. Jesus sê: “Die dief kom net om te steel en te slag en te verwoes...” (Joh.10:10).
Waar Satan vandaan kom?. Al wat ons weet, is dat hy nie van ewigheid af daar is nie. Hy moes wel voor Adam geskape gewees het. Ons lees in Gen.3:1vir die eerste keer van hom: “Maar die slang was listiger as al die diere van die veld wat God gemaak het...”. Die eerste keer dat die naam Satan in die Bybel vermeld word, is eers in 1 Kron.21:1: “Toe het Satan teen Israel opgetree en Dawid aangehits om Israel te tel”.
Satan verskyn in die eerste boek van die Bybel as ʼn slang. So ook in die laaste boek van die Bybel: “En die groot draak is neergewerp, die ou slang wat genoem word duiwel en Satan, wat die hele wêreld verlei...” (Openb.12:9).
Uit Eseg.28 is dit duidelik dat Satan aanvanklik ʼn engel was: “Jy was in Eden, die tuin van God.... Jy was ʼn gerub met uitgespreide vlerke...” (:13,14). As hy in Genesis sy opwagting maak, is hy egter die leier van die bose geeste. God het hom en sy makkers na ʼn mislukte opstand in die hemel uitgewerp. Daarom is die eerste omskrywing van sonde: Opstand teen God.
Met die uitstuur van die dissipels op hul eerste sendingtog sê Jesus: “.... Ek het die Satan soos ʼn bliksem uit die hemel sien val” (Luk.10:18). Jesus waarsku hulle dat Satan en sy trawante die wêreld vir die dissipels moeilik gaan maak.
In Hebreeus beteken Satan teenstander. As Petrus kapsie teen Jesus se woorde oor sy komende lyding maak, sê Hy vir Petrus: “Gaan weg agter my, Satan!” Die bedoeling is teenstander. In Jes.14:12 van die King James uitgawe van die Bybel is daar nog ʼn naam vir Satan– Lucifer. In Afrikaans lui dit: “Hoe het jy uit die hemel geval, o morester, seun van die dageraad....”
Die naam Lucifer kom nie in die Hebreeuse teks van die OT voor nie. Dis ʼn beïnvloeding van die Latynse vertaling (Vulgaat). In Latyn beteken Lucifer letterlik die bringer van lig. Dis ʼn titel wat Jesus vir homself in Openbaring toeëien: “.... Ek is die wortel en die geslag van Dawid, die blink morester”(22:16). Jesus was die ware Bringer van lig: “Ek is die lig van die wêreld”.
Satan se bose invloed op die mens word van die begin af duidelik as hy hom in die Tuin van Eden as een van die diere, nl. ʼn slang, voordoen net om die eerste mensepaar te mislei. Daarna hits hy vir Kain aan om sy broer Abel dood te maak. In Openb.20:2 word hy ʼn draak en ou slang genoem. Mattheus noem hom die versoeker (4:3) en Beëlsebul (12:27). Jesus noem hom die vader van leuens (Joh.8:44) en owerste van hierdie wêreld (Joh.12:31).
Satan is die hooffiguur van sonde. Sy val het by trots begin–hy wou ten alle koste God se almag bekom. Hierdie begeerte was so intens dat hy nie eens Jesus ontsien het nie. Hoor wat sê hy vir Jesus om van sy verlore aansien te probeer herwin: “Weer neem die duiwel Hom saam na ’n baie hoë berg en wys Hom al die koninkryke van die wêreld en hulle heerlikheid, en sê vir Hom: Al hierdie dinge sal ek aan U gee as U neerval en my aanbid” (Mt.4:8,9).
Satan het selfs by geleentheid sy opwagting by engele in die hemel gemaak. In die eerste hoofstuk van Job lees ons: “En op ʼn dag toe die seuns van God kom om hulle voor die Here te stel, het die Satan ook onder hulle gekom” (1:6). God het Satan toegelaat om hom op Job se trou teenoor sy eie ontrou te wys.
Die eerste ding wat ons van Satan moet weet, is dat hy ʼn misleier is. Paulus waarsku sy lesers dat Satan hom as ʼn engel van die lig voordoen terwyl hy in werklikheid mense hel toe lei (2 Kor.11). En hierdie pad is breed. Jesus sê: “Gaan in deur die nou poort, want breed is die poort en wyd is die pad wat na die verderf lei, en daar is baie wat daardeur ingaan” (Mt.7:13). Satan laat die breër pad beter as die smal pad na die hemel lyk; wat ʼn misleiding!
Moet nooit enige misleier die skuld gee as jy jouself laat mislei het nie. As jy sondig moet jy nooit sê dat die duiwel jou dit laat doen het nie. Net soos wat die eerste mensepaar die keuse gehad het om vir Satan nee te sê, het elke mens die selfde keuse. Ons is vir elke oortreding self verantwoordelikheid. “Maar elkeen word versoek as hy deur sy eie begeerlikhede weggesleep en verlok word” (Jak.1:14). God waarsku vir Kain: “ ... die sonde lê voor die deur en sy begeerte is na jou, maar jy moet daaroor heers” (Gen.4:7).
Satan weet dat sy tyd uitloop en ʼn verskriklike oordeel op hom wag: “...want die duiwel het na julle neergedaal met groot woede, omdat hy weet dat hy min tyd het” (Openb.12:12). Hy is vir die ewige hel bestem. Jesus sê: “Dan sal Hy ook vir die aan sy linkerhand sê: Gaan weg van My.... in die ewige vuur wat berei is vir die duiwel en sy engele” (Mt.25:41).
Satan weet hy dat die ewige oordeel op hom wag en hy sidder want dan word hy eerste in die hel gewerp. “En die duiwel wat hulle verlei het, is in die poel van vuur en swawel gewerp waar die dier en valse profeet is; en hulle sal dag en nag gepynig word tot in alle ewigheid” (Openb.20:10).
Niemand vrees die hel meer as Satan self nie. Hy is nie die stoker van die hel wat hom verlustig in mense wat daarin beland nie. Hy is ʼn veroordeelde gevangene op pad daarheen. Jesus het hom reeds oorwin. Gevolglik kom die dag al hoe nader dat sy mag finaal gebreek gaan word: “En die groot draak is neergewerp, die ou slang wat genoem word duiwel en Satan, wat die hele wêreld verlei...” (Openb.12:9).
Sataniste glo anders. Hulle glo weer dat daar ʼn finale slag gaan plaasvind en dat die Satan oor Jesus gaan triomfeer. Wat ʼn skok wag daar nie op hulle as hulle op die oordeelsdag met aanvoerder en al in die hel gewerp gaan word nie!
Omdat Satan weet dat sy tyd uitloop, spits hy hom op kerke toe. Hy mislei hulle om gruwels soos homoseksualisme en ander sondes te ontsondig. En hulle val daarvoor! Die Bybel waarsku: “Wees nugter en waaksaam, want julle teenstander, die duiwel loop rond soos ʼn brullende leeu en soek wie hy kan verslind” (1 Pet.5:8). Kerke smaak vir hom die heel lekkerste!
Gee aan die duiwel geen vatkans in jou lewe nie. Jesus het vir jou aan ʼn kruis gesterf om ʼn ewige heerlikheid saam met Hom deur te bring en nie ʼn ewige hel saam met die vader van die leuen nie!