Gedagtes vir elke dag
Of lees almal by Gedagtes vir elke dag
Lyding maak gelowiges sterk. Dit brei, vorm en verdiep. Dit gee ons krag en weerstand. Kortom: Dit gee ons geestelike staal.
DIE GRUWEL VAN GESLAGSONTDANING
Ds. A.E van den Berg
Die Bybel is ʼn gesaghebbende bron van inligting en raad wat God beskik het om gelowiges te leer om tot sy eer te leef. Om tot sy eer te leef, is die gelowige mens se hoogste strewe. Niks is belangriker as dit nie: “Laat alles wat asem het, die HERE loof! Halleluja!” (Ps.150:6). Om so te kan leef, moet die mens God se wil leer ken en sy verordeninge gehoorsaam.
Jesus sê vir sy dissipels: “As julle My liefhet, bewaar my gebooie” (Joh.14:15). Om God se gebooie te bewaar, moet ons die Bybel ken. Dis die enigste normatiewe maatstaf vir die lewe en leer mense om tussen reg en verkeerd te onderskei; ook op seksuele gebied. En dis belangrik.
God het op die sesde skeppingsdag die mens as man en vrou gemaak om sy beelddraers te wees (Gen.1-2). Die mens is die enigste van sy skeppings wat God se beeld dra; ʼn beeld wat in sy hele lewenssamestelling sigbaar is. Nie eens ʼn liggaamsgebrek kan dit verander nie. ʼn Ontmande het bv. destyds nie vroulik geword nie, maar steeds man gebly.
Dawid sê in Ps.139:13-16 dat die mens se hele bestaan deur God beskik is. Hy het lank voor ʼn geboorte besluit of ʼn mens manlik of vroulik sou wees. Dis sy geskape natuur en sal tot die dood toe so bly. Dit wat onnatuurlikheid is, is nie God se wil nie maar aangeleer. Wie seksueel tot sy eie geslag aangetrokke voel se onnatuurlike drange plaas hom dus buite die wil van God.
Paulus skryf: “ ... want hulle vroue het die natuurlike verkeer verander in dié wat teen die natuur is; en net so het ook die manne die natuurlike verkeer met die vrou laat vaar en in hulle wellus teenoor mekaar ontbrand: manne het met manne skandelikheid bedrywe...” (Rom.1:26,27).
’n Mens word as man of vrou met ʼn chromosoom-patroon gebore wat reeds met bevrugting vasgelê is. Niks kan daaraan verander nie. Daarom kan ’n man bv. nooit kinders baar of ’n vrou prostaatkanker opdoen nie.
Geslagsontdaning is ʼn geestesversteuring wat die mens in stryd met sy geboortegeslag bring. Hy laat sy innerlike eenselwigheid oor sy uiterlike een heers. God het die mens geskep om voort te plant en dit selfs ten spyte van die sondeval laat voortduur:
“En die mens het sy vrou Eva beken, en sy het swanger geword en Kain gebaar en gesê: Ek het 'n man verkry met die hulp van die HERE” (GEN.4:1).
Omgekeerde geslagsgedrag is in werklikheid niks nuut nie. Dit was betreklik algemeen in die Ou Ooste afgodskulture. Vandaar God se opdrag in Deutr.5:22
“ ʼn Vroumag geen mansklere dra nie, en 'n man mag geen vroueklere aantrek nie; want almal wat dit doen, is vir die HERE jou God 'n gruwel”.
Soos met baie van die ander Deuteronomium-wette was hierdie betrokke wet ook in die lig van die gruwel wat Israel se omliggende heiden-nasies bedryf het, geskryf. Israel moes vir God heilig leef en sy skeppingswil in hul voorkoms en geslagtelike optrede vertoon. Mans en vrouens moes duidelik onderskei word.
Paulus benadruk hier die liggaamlike heiligheid:
“Julle moet niks met seksuele losbandigheid te doen hê nie. Elke ander sonde wat 'n mens doen, vind buite sy liggaam plaas, maar iemand wat seksueel losbandig lewe, vergryp hom aan sy eie liggaam. Of besef julle nie dat julle liggaam 'n tempel van die Heilige Gees is nie? Julle het die Heilige Gees, wat in julle woon, van God ontvang, en julle behoort nie aan julleself nie: julle is gekoop, en die prys is betaal. Julle moet God dus in julle liggaam verheerlik” (1 Kor.6:18-20).
Die afgelope paar dekades word gekenmerk aan ʼn jammerlike tendens om Bybelse sedelike norme te verweer. Kerke ontsondig bv. homoseksualisme en swyg gevolglik oor geslagsontdaning omdat die een nie goedgepraat en die ander een veroordeel kan word nie!
Wie geslagsontdaning beoefen, maak soms van hormoonbehandeling en kosmetiese snykunde gebruik om hul geslagseienskappe te verander en hul liggaam in lyn met hul sonde te bring. Dis ʼn bewustelike ontheiliging van’n liggaam wat deur God gemaak is en sonde.
Mense wat glo dat hulle in ’n verkeerde liggaam gebore is, sê daarmee vir God dat Hy ’n fout gemaak het. Nee, God is volmaak en sonder foute. Mense word nie verkeerd gebore nie, maar wel verkeerd opgevoed. Homoseksualisme is by mans verkeerde moederbindinge en by vroue verkeerde vaderbindinge.
Geslagsontdaning en homoseksualisme gaan hand aan hand. Indien ʼn persoon biologies manlik is maar hom met die vroulike psige vereenselwig, sal hy tot mans aangetrokke voel en seksueel met hulle wil verkeer.
Die verwering van Bybelse sedelike norme is die herlewing van ʼn baie ou dwaling - Gnostisisme. Gnostici het die mens se liggaam as onbelangrik beskou en die rede was al wat vir hulle belangrik was. Hulle het bv. geglo dat die rede die geslag bepaal het en nie die liggaam nie. Gevolglik het homoseksualisme hoogty onder hulle gevier.
Verloopte teoloë gee voor dat hul aandrang op die hervorming van sekere Bybelse leerstellings geen poging is om menslike ervaring bo die Bybelse leer te stel nie. Dit dien slegs om oor argaïese Bybelse sienings te herbesin en met meer liefdevolleoptredes te vervang. Nuwe teologiese inligting kan selfs geloofsoortuigings ingrypend verander!
Sulke kerklui wantrou nie noodwendig God se Woord nie maar worstel wel in die lig van sulke nuwe inligting en hul eie ervarings daarmee. Hulle gebruik die gelykenisse in Luk.15 om te glo dat God wel geslagsontdanemense aanvaar. Dit moet glo vir kerke ʼn voorbeeld van ʼn liefdevolle toelating van sulke mense wees. Nodeloos om te sê, word die ware betekenis van hierdie Skrifgedeeltes ernstig omseil!
Die opstandige mens wil volstrekte seggenskap oor sy eie liggaam hê. In plaas van baas oor sy eie lewe te wees, word hy, ironies genoeg, ’n slaaf van Satan en verwar hy slawerny met vryheid. Geslagsveranderingoperasies los nie die geestesontwrigting wat daarmee gepaard gaan op nie. So ʼn geskende liggaam laat die persoon lewenslank met ʼn innerlike konflik worstel wat nooit met ʼn uiterlike skending sal verdwyn nie.