Gedagtes vir elke dag
Of lees almal by Gedagtes vir elke dag
Ons land het baie donker geword. Daar is bykans geen terrein wat nie aangetas is nie. Die kerklike terrein is die hartseerste! Dis asof die hel se magte oor ons eens sonnige land ontketen is. Wat ’n behoefte het ons volk nie aan die lig van Jesus as die blink Môrester nie!
GOD, GRENSE EN SATAN
Ds A. E. Van den Berg
“So sal elkeen van ons dan vir homself aan God rekenskap gee” (Rom.14:12)
In Junie 2002 het Israel begin om ʼn 700 km betonmuur met hoë grensdrade tussen hulle en die alom vyandige Palestynse gebied op te rig en het van toe af baie internasionale kritiek ontvang. Israel het haar egter nie van stryk laat bring nie en is die onderneming al feitlik 70% voltooi.
Die nodigheid van grense het al in talle akademiese kringe ʼn vraagstuk geword. Dis vir sekeres amper ‘n vloekwoord omdat dit kwansuis klanke van gedwonge skeiding, skending van menseregte en onregpleging eggo.
Ongeag wat mense ook al daaroor sê, is grense onontbeerlik vir enige ordelike samelewing. Dit verseker en bevorder sinvolle gemeenskapontwikkeling. Die Groot Muur van China is sprekende ʼn voorbeeld hiervan. Dit het ʼn gevorderde beskawing effektief teen eertydse barbaarse Mongoolse invalle beskerm.
Alle grense is egter nie ewe goed nie. Daar is sekeres wat ʼn negatiewe invloed gehad het omdat dit mense wat bymekaar behoort het van mekaar af weggehou, Die ystergordyn tussen Oos- en Wes-Europa, veral die een tussen die eertydse Oos- en Wes-Duitsland is so ʼn voorbeeld. So ook die grens tussen Noord-en Suid-Korea wat die gevolg van kommunisme en die sg. koue oorlog is.
Desondanks is die wenslikheid van grense beter as geen grense nie. Mense kan nie sonder grense sinvol bestaan nie en Satan haat dit. Die Antichris poog om grense uit te wis en die mensdom onder die mag van Satan te bring. Dit het alreeds met die totstandkoming van die Europese Unie begin wie se uiteindelike doel is om nasionale grense tussen lidlande op te skort en almal in een superstaat saam te vat.
Dit het met die totstandkoming van die Schengen-ooreenkoms begin waarbinne nasionale grense feitlik betekenisloos geword het. Mense kan nie net as toeriste vrylik in hierdie lande beweeg nie, maar ook vir werk- en verblyf-doeleindes. Die negatiewe gevolge daarvan word duidelik in die vlugteling-krisis in Europa gesien waar dinge weens die afskaffing van grense gereeld handuitruk en goeie rasseverhoudings feitlik onmoontlik maak!
Die geskiednis leer dat goeie grense goeie bure maak. Na die skepping het ʼn verskeidenheid van mensegroeperings ontstaan wat later in volke ontwikkel envan mekaar afgeskei het. Dit het goeie orde tussen mense met uiteenlopende gedragspatrone gebring. Ons eie land kan van die jare getuig toe ons ʼn hoë produksie- en lae misdaadsyfer gehad het omdat politieke grense rassebotsings voorkom en vrede en voorspoed bewerk het.
Volke met vae of geen grense is slegter daaraan toe as volke met afgebakende grense nie. Die donker Middeleeue wat na die val van die Romeinse beskawing gevolg het, was juis chaoties omdat daar geen duidelike grense was nie. Daar was bv. niks om swakker volke teen sterk invallers te beskerm nie wat miljoene mense se dood beteken het.
Omdat God ʼn God van orde is, het Hy van meet af grense tussen verskillende volke ingestel: “Toe die Allerhoogste aan die nasies ʼn erfdeel gegee het, toe Hy die mensekinders van mekaar geskei het, het Hy die grense van die volke vasgestel volgens die getal van die kinders van Israel.” (Deut. 32:8).
“En U het aan hulle koninkryke en volke gegee en dié volgens bepaalde grense verdeel....” (Neh.9:22).
“En Hy het uit een bloed al die nasies van die mensdom gemaak om oor die hele aarde te woon, terwyl Hy vooraf bepaalde tye en grense van hulle woonplek vasgestel het, sodat hulle die Here kon soek, of hulle Hom miskien kon aanraak en vind, al is Hy nie ver van elkeen van ons nie;” (Hand.17:26,27).
God het egter nie net grense ingestel om volke van mekaar te skei nie, maar ook om sy wil op aarde uit te voer. Die eerste mensepaar was bv. van sulke grense bewus: “En die HERE God het aan die mens bevel gegee en gesê: Van al die bome van die tuin mag jy vry eet, maar van die boom van die kennis van goed en kwaad, daarvan mag jy nie eet nie.” (Gen.2:16,17). God het ʼn grens gestel!
Ongelukkig leef ons in ʼn tyd waar daar gepoog word om Godgegewe grense op te hef. Ontspoorde teoloë probeer hard om Bybelse waarhede met allerhande teologiese bedrog uit te skakel. Ontspoorde kerke het bv. reeds die grens van een man en een vrou in die huwelik uitgewis en werk soos die NG Kerk tans aan ʼn huweliksformulier vir mense van die selfde geslag!
Mense verheidens teen ʼn skrikwekkende tempo. Hulle word bv. aangepor om hul liggame met tatoeëermerke en metaalvoorwerpe te mismaak. Sommige lyk soos oorlogskilderye! Om nie eens van die inboorlingskywe in die oorbelle te praat nie! Dis duidelik demoniesbegeesterd. Satan is los!
Ons moet ons lewens oppas. Ons behoort nie aan onsself nie maar aan God. Dawid skryf: “Want Ú het my .. in my moeder se skoot geweef. My gebeente was vir U nie verborge toe ek in die geheim gemaak is nie, kunstig geweef in die dieptes van die aarde. U oë het my ongevormde klomp gesien; en in u boek is hulle almal opgeskrywe: dae dat alles bepaal was....” (Ps.139)
Jou lewe is ʼn gawe van God. Daar kom ʼn dag dat jy dit moet teruggee. Daarom moet ons die grense wat God gestel het, eerbiedig. Satan haat sulke grense. Volgens hom moet mense daarvan afsien, selfs van die grens van die lewe. Hulle het in ons land selfs die reg om met aborsies moord te pleeg. Dis glo menseregte!
As die grense wat God vir ʼn ordelike samelewing gestel het, uitgewis word, moet mense nie wonder waarom ons land so verval nie. Dis baie duidelik God se straf! “En omdat hulle dit nie die moeite werd geag het om God in erkentenis te hou nie, het God hulle oorgegee aan 'n slegte gesindheid, om te doen wat nie betaam nie” (Rom.1:28).
Dit wat God ongelyk geskape het, word vandag bewustelik gelyk geskaaf om die mensdom vir die koms van die Antichris voor te berei. Hy sal alleenlik oor ʼn mensdom sonder grense sy wêreldmag kan uitoefen. En hy gaan!
Dit bring gelowiges by nog ʼn grens- tussen hulle wat die wil van God doen omdat hulle Hom liefhet en Sy Woord eerbiedig en,hulle wat God se grense bewustelik probeer uitwis.
Die opstand teen God sal einde kry: “ Want ons moet almal voor die regterstoel van Christus verskyn, sodat elkeen kan ontvang wat hy deur die liggaam verrig het, volgens wat hy gedoen het, of dit goed is of kwaad” (2 Kor.5:10).
Op die dag van afrekening kry God se laaste grens vorm. Elke mens wat op die aarde geleef het, kan net aan een kant van hierdie grens staan - of aan die regte of aan die verkeerd kant van God. Wie aan die verkeerde kant staan, is vir ewig verlore. Wie aan die regte kant staan, is vir ewig geluksalig. Paulus skryf aan die Romeine: “So sal elkeen van ons dan vir homself aan God rekenskap gee”.