Gedagtes vir elke dag
Of lees almal by Gedagtes vir elke dag
Oorloë en stryd word veroorsaak deur mense wat eie, aardse belange wil dien. Daarom sal dit vermy kan word deur eerder ander belang te dien. Soek na dinge wat vrede bring want ons word in die Woord aangesê om die vrede te soek en dit na te jaag; dit sal lei tot die uitbou van God se koninkryk en die uitvoering van die liefdesopdrag om God en jou naaste lief te hê.
GLO JY AAN, OF IN JESUS?
Ds A.E. van den Berg
“En Jesus sê vir die Jode wat in Hom geglo het: As julle in my woord bly, is julle waarlik my dissipels” (Joh.8:31).
In Jesus se tyd was daar drie groepe Jode. Die grootste een het uit hulle wat Hom gehaat het, bestaan. In Joh.15:25 haal Jesus Ps.35:19 aan: “… Hulle het My sonder oorsaak gehaat”. Dis hulle wat uitgeroep het: “Kruisig Hom! Kruisig Hom!”
Die tweede groep was kleiner en het wel aan Jesus, maar nie in Hom geglo nie. By hulle dood was hulle net so verlore as diegene wat Jesus gehaat het. Die derde groep was die kleinste. Hulle het in Jesus geglo en hul siele is gered.
Hierdie drie groepe bestaan steeds, maar nie meer onder die Jode nie, wel onder die ganse mensdom. Daar is eerstens diegene wat Jesus openlik haat soos die Sataniste, heidense gelowe, kommuniste ens. en meer as ’n biljoen sterk.
Die tweede groep is ook groot en glo slegs aan Jesus, maar nie in Hom nie en gaan selfs kerktoe. Die derde groep is baie klein – hulle wat in Jesus glo. As iemand aan een van die eerste twee groepe behoort, is hul siele verlore. Slegs die derde groep beërwe die ewige geluksaligheid. Wie derhalwe slegs aan Jesus, maar nie in Hom glo nie, is vir ewig verlore!
Baie mense glo wel aan ’n historiese Jesus nl. dat Hy gebore is, gekruisig is, uit die dood uit opgestaan en ten hemel gevaar het, maar dit is al. Hulle glo aanJesus maar nie in Hom nie en het derhalwe geen behoefte aan redding nie.
Joh.8:31 handel oor die derde groep – Jode wat in Hom geglo het. Die Griekse woord vir geloof beteken “om iemand met die hele hart te vertrou”. Min Jode het Jesus so vertrou. Ongelukkig het niks intussen verander nie. Mense glo steeds aan Jesus maar nie in Hom nie. Hulle siele is verlore. “...’n geslag wat rein is in sy eie oë en tog van sy vuilheid nie gewas is nie” (Spr.30:12).
God roep deur die eeue mense na die hek van verlossing. Hierdie hek staan vir almal oop. Ongeloof laat die meeste ongeërg verbyloop. Daarom sê Jesus: “...want baie is geroep, maar min uitverkies” (Mt.20:16).
Die Bybel sê dat ons slegs gered word as ons in Jesus glo. Jesus se liefde is egter ’n voorwaardelike liefde en nie vir almal nie. Slegs vir sy uitverkorenes. “As julle in my woord bly, is julle waarlik my dissipels”. Dis ʼn voorwaarde vir redding – jy kan nie bloot aan Hom glo nie, jy moet in Hom glo.
Wie in Jesus glo, het die waarheid lief en haat die leuen. Die waarheid behaag God en maak sondaars vry (Joh.8:32). En dis in sy Woord opgeteken vir elkeen om te glo. Ongelukkig doen mense nie moeite daarmee nie. Jesus waarsku die kerklui dat hulle dwaal omdat hulle die Skrifte nie ken nie (Mt.22:29).
Jesus is daarop gesteld dat sy Woord eerbiedig word. Wie in Jesus glo, het ’n hekel aan leuens en dwaalleer, maar ’n hartstog vir die waarheid. Baie mense wat kerktoe gaan, glo elke storie wat, as wat daar van God gepraat word, vanaf kansels opgedis word en besef nie dat Satan ʼn meesterlike verleier is wat die leuen na die waarheid laat klink nie!
Wie in Jesus glo, doen wat Hy vra. “As julle My liefhet, bewaar my gebooie”(Joh.14:15). Dis immers wat geloof is – jy doen wat God vra. Abraham word die vader van die gelowiges genoem omdat hy gedoen het wat God gevra het. Hy was selfs bereid om sy enigste seun te offer. God se weg was sy weg.
Sonde laat mense net hul eie weg inslaan. Jesus was in Getsemane menslik benoud en het God gebid om Hom die komende lyding te spaar. Dan hoor ons Hom sê: “Laat nogtans nie my wil nie, maar u wil geskied” (Luk.22:42). Wie in Jesus glo, se eiewilligheid verdwyn.
Abraham is die grootste geloofsheld van die Ou Testament. Toe hy sy seun wou offer, het God hom gekeer en gesê: “… nou weet ek dat jy God vrees….” (Gen.2212). Ja, geloof is om jou nette in die onbekende te laat sak sonder om te weet wat die vangs gaan oplewer. God het geweet dat Abraham die toets sou slaag. Hy het ’n behae in onvoorwaardelike liefde. God gee aan sommige meer geloof as aan ander as hulle bereid is om meer van Hom te ontvang.
Daarvoor moet ons die Bybel goed ken. Dis die enigste vasstaande maatstaf om te weet wat reg of verkeerd is. Slegs hulle wat in Jesus glo, aanvaar dit so. Wie slegs aan Hom glo, volg hul eie kop en praat selfs sonde goed. Hulle glo dat as jy gered is, jy met sonde kan voortgaan. Dis nie wat die Bybel sê nie! Let op die teksvers: “As julle in my woord bly, is julle waarlik my dissipels”. As ons nie in Jesus glo nie, behoort ons nie aan Hom nie. In Joh.15 vergelyk Jesus gelowiges met ’n loot wat in ’n wingerdstok geplant is. Solank dit daar bly, leef dit. As dit uitgeruk word, is dit net goed vir brandhout.
’n Evangelie wat mense se sondige idees bo die Woord van God plaas, is nie van Jesus nie, maar van Satan. Ek wonder hoeveel prediking is vandag nog suiwer Evangelies? Ons hoor toenemend van gruwels soos homoseksualisme en saamblyery wat deur kerke goedgepraat word. Luister hulle dan nie na wat God in sy Woord sê nie? Geen wonder dat die land so verval nie – kerklui glo hoogstens aan Jesus maar nie meer in Hom nie!
Die tyd het aangebreek dat die volle raad van God vanaf kansels verkondig word. Satan mislei miljoene mense met halwe waarhede. Dit gebeur as die Bybel uit verband aangehaal word. As dit nie reg gebruik word nie, lei dit tot menseverheerliking. Paulus waarsku in sy brief aan die Romeine dat die mens aan die einde van die tyd verheerlik gaan word.
Daar is geen waarheid buite die Bybel nie. Die Bybel laat jou in Jesus glo en nie aan Hom nie. Moenie jou geloof in dinge buite die Bybel plaas nie. Onderskei baie duidelik tussen ’n valse geloof en reddende geloof. Buite die Bybel om is alle geloof ongeloof. En ongeloof is meer as blote oordeelsfoute of mislukte pogings om die waarheid te bekom – dis bewustelike opstand teen God: jy weet wat reg is, maar doen dit nie!
Ongeloof en ongehoorsaamheid is sinonieme. Jy bedrieg jouself deur kerktoe te gaan maar in ongeloof te leef: “Hulle bely dat hulle God ken, maar hulle verloën Hom deur die werke, omdat hulle gruwelik en ongehoorsaam is en ongeskik vir elke goeie werk” (Tit.1:16).
Ongeloof maak jou dood. Toe die Israeliete deur die Rooisee getrek en die wonderversorging van God aanskou en beleef het, het hulle steeds nie geglo nie. Daarom het God ’n hele geslag in die woestyn laat omkom. Geloof is om in die teenwoordigheid van die versorgende God te verkeer en Hom te bewonder.
Dis tyd dat ons as volk met volle oorgawe na Jesus terugkeer want ons is, soos Jes.53 sê, skape wat elkeen sy eie kop volg en verdwaal het. Die Boerevolk moet soos die verlore seun na hul hemelse Vader terugkeer en Hom met hul hele lewe begin dien. Om die lewe in ongeloof deur te bring, is erger as die dood. Laat ons nie in twee groepe wees nie, maar as een; ‘n geestelike familie wat nie aan Jesus glo nie maar in Hom.