Gedagtes vir elke dag
Of lees almal by Gedagtes vir elke dag
Hoe duidelik waarsku Petrus nie oor die spotters wat ons vandag in ons geledere sien nie! In II Petrus 3 sê hy "Dit moet julle weet, dat daar aan die einde van die dae spotters sal kom wat volgens hulle eie begeerlikhede wandel." Ons sien daagliks hoe mense die Bybelse waarhede misbruik om hul eie ongeloof te regverdig en twyfel by ander te saai. Maar God het ons ook 'n skild gegee waarmee ons onsself kan beveilig hierteen naamlik om te bly leef in alle godsvrug en heiligheid om so gereed te wees vir die Wederkoms van die Here.
BEKENDSTELLING VAN DIE HEILIGE GEES
Ds A.E. van den Berg
“Almal is met die Heilige Gees vervul en hulle het in ander tale begin praat soos die Heilige Gees dit aan hulle gegee het ..... en hulle was almal verbaas en .... sê vir mekaar: Is almal wat daar spreek dan nie Galileërs nie? En hoe hoor ons hulle, elkeen in ons eie taal waarin ons gebore is?” (Hand 2:4,7,8).
Gelowiges verskil dikwels van mening. Een ding waaroor almal wel saamstem, is dat daar ʼn God in die hemel is. Maar hoe weet ons dit? Het iemand Hom toevallig ontdek? Nee, Hy het Hom aan die mens bekend gestel. Was dit nie daarvoor nie, het ons God nooit geken nie.
Ongelukkig is daar baie afgodery in die wêreld en dit neem toe. Met dwaalleer soek die mens na ʼn god. In egte godsdiens gebeur die teenoorgestelde; God soek die mens. As Hy nie na ons soek nie, sal ons Hom nooit vind nie.
God het Hom egter as ʼn Drie-eenheid bekend gemaak; drie persone in een wese; Vader, Seun en Heilige Gees. Dis nie ʼn drie godedom soos wat die Jehova Getuies leer nie, maar ʼn Drie-eenheid wat aan die hand van ʼn baie eenvoudige voorbeeld verduidelik kan word nl. dié van water. As water baie warm gemaak word, verander dit in stoom. As dit baie koud gemaak word, verander dit in ys. Dit bly water. So is die Drie-eenheid – drie Openbaringspersone maar een wese.
Ons herdenk vandag die uitstorting van die Heilige Gees. Hy het nie eers na Jesus se hemelvaart ontstaan nie, maar was reeds voor die skepping al daar. “In die begin het God die hemel en die aarde geskape. En die aarde was woes en leeg, en duisternis was op die wêreldvloed, en die Gees van God het gesweef op die waters” (Gen.1:1,2). Hy was reg van die begin af by die skepping betrokke.
Alhoewel die Heilige Gees nie baie in die OT op die voorgrond tree nie, was Hy wel aanwesig. Toe Moses op pad na Kanaän so erg met die opstandige Jode te doen gekry het dat hy handdoek wou ingooi, het God hom aangesê om 70 van die oudstes in die laer af te sonder waarna Hy sy Gees oor hulle vaardig laat raak het waarna hulle Moses bygestaan het om die volk te lei. Sedertdien het die Sanhedrin (Joodse Raad) altyd uit 71 lede bestaan.
Ná Jesus se aardse bediening was dit tyd dat die Heilige Gees sterker op die voorgrond moes tree en aan die gelowiges bekend gestel moes word. Lukas skryf in Hand.2 van die uitstorting van die Heilige Gees – sy bekendstelling.
In die OT ontmoet ons hoofsaaklik net die eerste Persoon van die Drie-eenheid nl. God die Vader. Aan die begin van die NT ontmoet ons die tweede Persoon nl. Jesus, die Seun van God. Tien dae na sy hemelvaart ontmoet ons die derde Persoon van die Drie-eenheid – die Heilige Gees.
Dit beteken egter nie dat die eerste twee die Persone van die Drie-eenheid hul daarna aan die toneel onttrek het nie. Hulle was nog steeds daar en intens met die mensdom gemoeid. In die laaste gedeelte van die NT val die klem egter hoofsaaklik op die werk van die Heilige Gees omdat die Christen-kerk met sy uitstorting gestig is en die Christendom daarna uitgebrei het.
Hoe weet ons dat die Heilige Gees nie ʼn derde godheid was soos wat die Jehova Getuies met hul dwaalleer verkondig nie? Hand.5 vertel van ʼn sekere Ananias wat ʼn deel van die geld wat vir die versorging van die gemeente in Jerusalem na die apostels moes kom, vir homself gehou het. Toe dit aan die lig kom, het Petrus hom sterk aangespreek: “Waarom het die Satan jou hart vervul om vir die Heilige Gees te lieg .... Jy het nie vir mense gelieg nie, maar vir God” (:3,4).
God en die Heilige Gees word op een voet geplaas. Die Heilige Gees is werklik en vir ewig God. Paulus skryf: “Weet julle nie dat julle ʼn tempel van God is en die Gees van God in julle woon nie?” (1 Kor.3:16).
Die Heilige Gees doen groot dinge in mense waarvan die wedergeboorte die belangrikste is omdat, as dit gebeur, die mens hom dan tot Jesus bekeer. Dis die belangrikste wat met ʼn sondaar kan gebeur – die verskil tussen ʼn ewige lewe en ʼn ewige dood! As die Heilige Gees ʼn mens nie tot bekering roep nie, sal hy nooit die ewige gesluksaligheid beërwe nie, selfs nie sy beste werke nie. Dis die pad van saligheid by die Heilige Gees wat mense tot bekering roep.
Daarna lei die Heilige Gees gelowiges in die waarheid omdat die waarheid ons gees vry maak: “Die Here is die Gees, en waar die Gees van die Here is, daar is vryheid” (2 Kor.3:17). Jesus maak ʼn belofte: “...maar die Trooster, die Heilige Gees, wat die Vader in my Naam sal stuur, Hy sal julle alles leer en sal julle herinner aan alles wat Ek vir julle gesê het” (Joh.14:26). “Maar as die Trooster gekom het wat Ek vir julle van die Vader sal stuur, die Gees van die waarheid wat van die Vader uitgaan, sal Hy van my getuig” (15:26). In ons wêreld van leuens is die waarheid soos ʼn vars bries in ʼn baie bedompige kamer!
Die waarheid lei ons altyd na die ware kerk en laat ons die gemeenskap van heiliges beleef. Heiliges is nie sondeloos nie, maar mense wat tot bekering gekom het: “Maar wie die Here aanhang, is een gees met Hom” (1 Kor.6:17).
Ná Pinksterdag het iets spontaan posgevat – gelowiges het hulle van die Joodse kerk afgeskei en by mekaar ingeskakel: “En almal wat gelowige geword het, was bymekaar....” (Hand.2:44). Wat het die gelowiges bymekaar laat inhaak? Die bekering tot Jesus Christus. Een van die Gees se grootste werke is om mense van sonde te oortuig want sonder ʼn sondebesef is bekering onmoontlik.
In Hand.2 het die Heilige Gees mense van sonde oortuig en in ʼn gemeenskap van gelowiges saamgebind en almal se oog opgeval: “...terwyl hulle God geprys het en in guns was by die hele volk” (:47). Dis wat God wil hê – dat gelowiges saam verkeer. Daarom bely ons in die 12 Artikels dat ons in die gemeenskap van die gelowiges glo. “Die Gees self getuig saam met ons gees dat ons kinders van God is” (Rom.8:16).
Daarna lei die Heilige Gees gelowiges verder as bloot die bekering. Hy lei hul in die heiligmaking. Heiligmaking is basies daaglikse bekerings. Onthou, geen bekeerde mens is die bloudruk van geestelike volmaaktheid nie. Daar moet nog baie geestelike skaafwerk aan hom gedoen word. En dis waar die Heilige Gees ons te hulp kom. Deur ons van sonde bewus te maak, help Hy ons om ons al hoe meer vir Jesus af te sonder.
Daarom moet elke gelowige na meer vervulling met die Heilige Gees smag. Gelowiges word die dag van hul bekering met die Heilige Gees vervul. Pasop vir die dwaling van die sg. tweede seën (secondblessing) wat die Charismate verkondig. Hulle glo dat die vervulling (doop) met die Heilige Gees eers na die bekering plaasvind. Dis onskriftuurlik. Nee, elke gelowige is met sy bekering met die Heilige Gees in sy Drie-enige volheid vervul.
Die Heilige Gees verrig wonderlike dinge in ons lewe, maar moet nooit as iets afsonderlik van die Vader en die Seun beskou nie want dan verval ons in die selfde dwaalleer waarin miljoene Charismate wêreldwyd verstrengel geraak het en wat die persoon van die Heilige Gees onreg aandoen.
Die uitstorting van die Heilige Gees is die nakoming van Jesus se belofte: “En kyk, Ek is met julle al die dae tot aan die voleinding van die wêreld. Amen” (Mt. 28:20). Kom ons dank God saam met miljoene gelowiges oor die wêreld heen vir die uitstorting van sy Gees wat ons help gereed kry vir ʼn ewige, heerlike lewe saam met Hom!