Gedagtes vir elke dag
Of lees almal by Gedagtes vir elke dag
Toe ek gedink het my voete gly, het u troue liefde my regop gehou, HERE. Toe ek met baie onrus in my binneste sit, het u vertroosting my tot rus gebring.
DIE HUWELIK IN GEDRANG
Ds A.E. van den Berg
“En Hy antwoord hulle en sê: Het julle nie gelees dat Hy wat hulle gemaak het, hulle van die begin af man en vrou gemaak het nie” (Mt.19:4).
Die huwelik is ʼn instelling van God tussen een man en een vrou en dus heilig. Satan probeer hierdie heilige instelling met onheilige verdraaiings te kelder en ontvang, tragies genoeg, met toenemende steun van ontspoorde kerke.
In 2000 is die Pienk Loerie-fees vir homoseksuele persone vir die eerste keer in Knysna, Suid-Afrika gehou en deur 20,000 mense bygewoon. Dit word sedertdien jaarliks aangebied. Onlangse internasionale opnames het skokkende statistieke aan die lig gebring. In Spanje was 91% van die ondervraagdes ten gunste van homoseksualisme en huwelike van die selfde geslag. In Duitsland was dit 87%, in Frankryk 86%, in Brittanje 81% en in die VSA 60%!
Homoseksuele huwelike neem wêreldwyd toe soos wat ongelowiges God se heilige instelling uitdaag en die heidendom bevoordeel. Ongelukkig is huwelike van dieselfde geslag in November 2006 ook in Suid-Afrika goedgekeur.
Wat sê die Bybel van die huwelik? Dat dit van die begin af deur God ingestel is. “…Het julle nie gelees dat Hy wat hulle gemaak het, hulle van die begin af man en vrou gemaak het nie?” (Mt.19:4). In vers vyf sê Jesus dat man en vrou deur die huwelik een vlees word. In vers 6 sê Hy iets belangrik – die huwelik is ’n verbintenis waarin God mense verbind. Dis ’n goddelike instelling en nie ’n burgerlike aangeleentheid nie.
Omdat God parameters vir ’n huwelik bepaal en nie mense nie, lê huweliksluiting nie op die terrein van die staat nie, maar op die van die kerk alleen. Om voor ʼn landdros te trou, het geen Skrifgronde nie. Dis soos iemand wat slaghuis toe gaan om mediese sorg te verkry!
God ag die huwelik belangrik. Dis trouens die toonbeeld van sy verhouding met die kerk. Daarom moet dit rein wees. “Laat die huwelik in alle opsigte eerbaar wees en die bed onbesmet; want God sal hoereerders en egbrekers oordeel” (Heb.13:4).
Die Bybel noem die huwelik ’n verbintenis tussen ’n man en ’n vrou. Dit praat nêrens van ’n verbintenis tussen mense van die selfde geslag nie. Sulke gruwels het net onder heidene voorgekom. Daarom veroordeel God homoseksualisme in geen onduidelike taalnie. Dis ʼn gruwel in sy oë: “Met ’n manspersoon mag jy ook geen gemeenskap hê soos ’n mens met ’n vrou het nie. Dit is ’n gruwel” (Lev.18:22). Die Bybel bepaal ʼn straf daarvoor: “En as ’n man met ’n manspersoon gemeenskap het…het hulle al twee iets gruwelik gedoen. Hulle moet sekerlik gedood word…” (Lev.20:13).
God het by geleentheid so kwaad vir die beoefening van homoseksualisme geword dat Hy vir Sodom en Gomorra met vuur en swael verwoes het. Homoseksualiste moenie God probeer korrigeer nie!
Paulus beskryf homoseksualisme as ’n vergryp teen die menslike natuur: “Daarom het God hulle oorgegee aan skandelike hartstogte , want hulle vroue het die natuurlike verkeer verander in dié wat teen die natuur is; net so het ook die manne die natuurlike verkeer met die vrou laat vaar en in hulle wellus teenoor mekaar ontbrand….en in hulleself die noodwendige vergelding van hulle dwaling ontvang” (Rom.1:26,27).
1 Kor.6:9,10 sê Paulus dat mense wat hierdie gruwel bedryf die ewige verderf tegemoet gaan. 1 Tim.1:10 sê hy dat homoseksualisme in stryd met die gesonde leer is en in Judas vers 7 praat die apostel van mense wat agter vreemde vlees aanloop. Dis homoseksualisme en ’n vergryp teen God se wil!
In Ps.2 lees ons: “Die konings van die aarde staan gereed en die vorste hou saam raad teen die Here en sy Gesalfde sê: Laat ons hulle bande stukkend ruk en hulle toue van ons afwerp!” (:2,3). Hierdie bande en toue, is goddelike instellings wat bewustelik verbreek word. Ook die huwelik. As ʼn land teen God se opdrag in opstand kom,volg sy straf: “U sal hulle verpletter met ’n ysterstaf, U sal hulle stukkend slaan soos ’n erdepot” (vers 9).
Ontspoorde kerklui probeer al lank om homoseksualisme Bybels te regverdig. Hulle verwys bv. na die besondere vriendskap tussen Dawid met Jonathan. So ook dié tussen Rut en Naomi. Dis alles ongegronde afleidings en verdien die veragting wat dit toekom! Daarbenewens beweer hulle dat Jesus nooit iets oor homoseksualisme gesê het nie. Hy het wel oor egskeiding en egbreuk gepraat maar nie oor homoseksualisme nie. Die afleiding wat gemaak word, is dat dit dan nie sonde is nie.
Jesus waarsku die Skrifgeleerdes van sy tyd dat hulle dwaal omdat hulle die Skrif nie ken nie. Die Skrif is baie duidelik – homoseksualisme is ’n gruwel en ’n vergryp teen God se instelling van die huwelik. Net omdat Jesus niks daaroor sê nie, beteken nie dat Hy dit sito-sito aanvaar het nie. Hy was eerder eens met die Joodse wet se veroordeling daarvan!
Voorstanders van homoseksualisme sê dat jy homoseksueel gebore word. Dis die grootste onsin denkbaar! Jy word nie so gebore nie, maar wel so gemaak. Dis ʼn opvoedingsgebrek. By mans is dit te sterk moeder-bindinge en by vrouens te sterk vader-bindinge. Dis nie ’n geval van chromosoom-afwykings soos bv. by Down-sindroom nie. Indien dit ʼn chromosoomafwyking was, sou God dit nie veroordeel en twee stede met vuur en swawel verbrand het nie.
Die Bybel het niks teen selfde-geslag platoniese verhoudings nie. Dié tussen Dawid en Jonathan dui ongetwyfeld op gelowige vriendskap. Die Septuagint (Griekse vertaling OT) gebruik die woord phileo om hierdie vriendskap te beskryf wat broederliefde beteken. Vir dié tussen Rut en Naomi word storge gebruik wat familie-liefde beskryf. Nêrens is erotiese liefde eros ter sprake nie.
God stel die huwelik as ’n heilige verbintenis tussen een man en een vrou in. Die Satan ontwrig dit met ’n gruwel wat van wellus spreek en kan nie anders as om gestraf te word nie!
Die liefde is ’n wonderlike ding en belangrik in ʼn huwelik. Dis egter nie al waaroor die huwelik gaan nie. Dis ’n unieke instelling wat oor die verbintenis van ’n man en vrou handel waarbinne kinders verwek en gesinne gevoed word. Selfde geslag huwelike maak dit onmoontlik en belaglik.
Twee mans mag goeie vaders wees, maar nie een van hulle kan ’n moeder wees nie. God het dit nie so beskik nie. Twee vrouens mag beide goeie moeders wees. Nie een van hulle kan egter ’n goeie vader wees nie. God het dit nie so beskik nie. ’n Kind kan net deur een vader en een moeder opgevoed word.
Gelowiges moet God se instelling van die huwelik eerbiedig – ’n instelling tussen een man en een vrou. Alle ander huwelik-verbintenisse is van Satan. Die Bybel swyg nie oor hierdie gruwel nie. Gelowiges moet ook nie!