Gedagtes vir elke dag
Of lees almal by Gedagtes vir elke dag
Met Jesus se oorwinning aan die kruis is Satan en sy magte as verloorders gemerk. Jesus is die Oorwinnaar ook in jou lewe, en jy kan in sy krag oor die mag van die Bose triomfeer.
DIE NOOD AAN GODVRESENDE LEIERS
‘N BOODSKAP AAN ALLE BLANKE AFRIKANERS
Ds A.E. van den Berg
“Maar kies jy uit die hele volk bekwame manne wat God vrees, betroubare manne wat onregverdige wins haat. En stel die aan oor hulle...” (Ex.18:21)
Het die kerk 'n sê oor politiek of moet dit daar uitbly? Baie mense dink dat die kerk uit die politiek moet bly. Dis die verkeerdste ding om te doen – die kerk is dan God se spreekbuis. Is daar ooit iewers 'n lewensterrein waar God niks te sê het nie? Swyg die Bybel miskien oor politieke sake? Allermins! Die Bybel praat verrassend baie oor politiek en gee duidelike aanwysings oor hoe dit bedryf moet word. God se Woord slaan geen lewensterrein oor nie; ook nie die politiek nie.
Politiek is nie 'n vuil ding soos wat baie mense beweer nie. Dis eerder 'n heilige saak omdat dit die sinvolle ordening van menslike gemeenskappe is sodat mense in vrede en geregtigheid kan woon en werk. Paulus skryf: “Laat alles welvoeglik en ordelik toegaan” (1 Kor.14:40). Dit geld ook vir die politiek.
God is 'n God van orde en die Satan die bewerker van chaos. Waar daar chaos heers, heers die Satan. Volksleiers wat God eer, leef ordelik, Wie Hom verag, leef wetteloos soos wat in ons eie land gebeur het toe die Christelike grondwet in 1996 afgeskaf en met 'n wêreldse een vervang is – daar is nou meer as 80 moorde per dag!
In die gelese gedeelte is Israel op pad na Kanaän, 'n heidenland maar ook 'n beloofde land. Israel was vir 400 jaar slawe sonder 'n eie politieke sisteem. Na die uittog was hulle wel vry, maar moes daadwerklik staatkundig beheer word. Behalwe Moses wat die regspraak beoefen het, was daar geen ander politieke strukture in plek nie.
Omdat die Israeliete moeilik was en Moses opdraande gegee het, was hy dikwels op moedverloor se vlakte met die spul. By geleentheid het dit vir hom te veel geword: “Toe het Moses die Here aangeroep en gesê: Wat moet ek met hierdie volk doen? Dit skeel maar min of hulle stenig my” (Ex.17:4). Die situasie het om vaste politieke ordening geroep. 'n Geordende wetsbepaling moes ingestel word.
Tydens Moses se besoek aan sy skoonvader, het die wyse oubaas hom goeie raad gegee: “Maar kies jy uit die hele volk bekwame manne wat God vrees, betroubare manne wat onregverdige wins haat. En stel die aan oor hulle...” (Ex.18:21). Hy gaan verder: “Maak dit so ligter vir jou , en laat hulle saam met jou dra.... As jy dit doen en God jou dit beveel, kan jy dit uithou en sal ook al hierdie mense tevrede na hulle woonplek gaan” (:22,23).
Jetro sê vir Moses om die volk polities te orden. Indien hy nie daarin gaan slaag nie, sal hy nooit sinvol lei nie. Politieke ordening is egter 'n moeilike taak en nie vir elke Jan rap en sy maat bedoel nie - ook nie vir een man alleen bedoel nie.
Paulus skryf: “In die eerste plek vermaan ek dan dat smekinge, gebede, voorbedes, danksegginge gedoen moet word vir alle mense; vir konings en almal wat hooggeplaas is, sodat ons 'n rustige en stil lewe kan lei in alle godsvrug en waardigheid” (1 Tim.2:1,2).
Die Bybel gee duidelike riglyne hoe 'n volk polities gerig moet word. Die eerste vereiste is dat slegs gelowiges as leiers gekies moet word. 'n Hart wat in die bloed van Jesus gewas is, is vir 'n volk meer werd as ongelowige akademici. Ongelowiges is nooit goeie politici uit nie, veral nie in Afrika met sy aptyt vir heidense rituele nie. Dit maak 'n land agterlik en laat leiers dikwels slegs in grade van boosheid van mekaar verskil. Politici wat egter voor die Koning van alle konings buig en sy Woord liefhet, is 'n volk se juwele.
Verder moet godvresende politici die stryd teen booshede voer en 'n volk tot skuldbelydenis en verootmoediging ter genesing van hul land oproep: “...en my volk oor wie my Naam uitgeroep is, (as) hulle (hul) verootmoedig en bid en my aangesig soek en hulle bekeer van hulle verkeerde wee, dan sal Ek uit die hemel hoor en hulle sonde vergewe en hulle land genees” (2 Kron.7:14).
Verder sê die Bybel dat gelowiges nie by verkeerde dinge betrokke mag raak nie: “...en hou nie gemeenskap met die onvrugbare werke van die duisternis nie, maar bestraf dit liewer” (Efes.5:11). Dit geld ook vir alle leiers. Booshede moenie verdra word nie maar bestraf word. In die Grieks is bestraf 'n baie sterk werkwoord wat beteken om in die kiem te smoor – dit mag nie ontkiem nie! Kyk maar net hoe ontkiem homoseksualisme nie in talle kerke!
Verder sê God se Woord dat leiers hul vir 'n gesonde gemeenskap moet beywer. Nehemia is 'n goeie voorbeeld van so 'n persoon: “Julle sien die nood waar ons in is, dat Jerusalem woes lê ....
kom, laat ons die muur van Jerusalem opbou, dat ons nie langer 'n voorwerp van smaad kan wees nie ( Neh.2:17). Soos 'n goeie herder vir sy kudde na goeie weiding lei, sal gelowige leiers hul volk na goeie dinge lei. Dit gaan vir hul nie oor eie belang nie maar oor volksbelang en kan geen korrupsie groei nie.
Agas was in die tyd van Jesaja die koning van Juda en baie sleg. Hy het selfs van sy kinders aan die afgod Molog geoffer. Ja, soos die koning, so ook die volk. Onreg en korrupsie was aan die orde van die dag. Daarom praat God ernstig met die volk: “Was julle, reinig julle, neem die boosheid van julle handelinge voor my oë weg, hou op om kwaad te doen, soek die reg, beteuel die verdrukker, doen reg aan die wees, verdedig die saak van die weduwee” (Jes.1:16,17).
Alles in Suid-Afrika roep om dringende herstel. Alles het in die spoelsloot van die lewe beland – politiek, kerk, kultuur, handel, ja, alles! Nêrens gaan dit beter as in die goeie ou verlede nie. Dit gebeur as daar geen Christengrondwet meer is nie en die Tien Gebooie met 'n handves van Mense-regte vervang is. “Die konings van die aarde staan gereed, en die vorste hou saam raad teen die Here en sy Gesalfde en sê: Laat ons hulle bande stukkend ruk en hulle toue van ons afwerp!” (Ps2:2,3).
Suid-Afrika het sedert 1994 met iets anders as die nag donker geword. Kan die lig weer oor ons land skyn? Ja, deur leiers wat deur God stuur is; manne en vroue wat die wedergeboorte gesmaak het. Hulle trek nie in dieselfde juk met heidene nie en kan derhalwe nie omgekoop word nie. Sulke leiers is nie skaam is vir die waarheid nie en sê Satan die stryd aan,
Is daar in ons land sulke mense? Ja, daar is. Die tyd het aangebreek dat hulle na vore kom. Baie van hulle weet nog nie dat God hulle in die toekoms gaan gebruik nie. Dink maar aan Dawid wat 'n skaapwagter was toe hy tot koning gesalf is: “Verder het Samuel aan Isai gevra: Is dit al die seuns? En hy se: Die kleinste is nog oor, en kyk, hy pas skape op.... En die Here sê: Staan op, salf hom, want dit is hy” (1 Sam. 16:11,12).
Wat staan ons te doen? Bid dat God ons genadig sal wees en gelowige leiers stuur om ons volk deur die heersende politieke woestyn na 'n Kanaän van Godsaanbidding en Godsverheerliking op eie bodem sal lei.
“Welgeluksalig is die nasie wie se God die Here is, die volk wat Hy vir Hom as erfdeel uitgekies het. Die Here kyk van die hemel af; Hy sien al die mensekinders. Uit sy woonplek aanskou Hy al die bewoners van die aarde, Hy wat die hart van hulle almal formeer, wat let op al hul werke. Kyk, die oog van die Here is op die wat Hom vrees, op die wat op sy goedertierenheid wag; om hulle siel te red van die dood en hulle in die lewe te hou. Ons siel wag op die Here; Hy is ons hulp en ons skild omdat ons op sy heilige Naam vertrou. Laat u goedertierenheid, Here, oor ons wees net soos ons op U wag!” (Ps.33).