Gedagtes vir elke dag
Of lees almal by Gedagtes vir elke dag
'n Mens se kruis hier op aarde is nie 'n las nie, dis 'n skat aan jou gegee sodat jy daaruit kan leer en groei – moet dit dus nie sleep nie, dra dit!
VOLHARD IN DIE GELOOF!
Hannes Ollewagen
Hebreërs 12:1-29
Die samelewing van ons tyd is so belas met die dinge van die wêreld wat geen heil inhou nie, maar steeds sleep mense hierdie laste saam. Die las van die gejaag na geld, die las om mense te probeer behaag, die las om deur my vriende aanvaar te word, daardie dinge wat eintlik ‘n las vir my word, omdat ek nie meer myself kan wees nie, want ek moet my eie karakter en beginsels prysgee om daardie las te kan saamdra. Nou wonder ons waarom daar soveel hartseer en ongelukkigheid in die wêreld is?
In vers 1 van die gelese gedeelte word ons opnuut uitgenooi om die las en sonde wat ons so maklik omring af te lê om sodoende die wedloop van die lewe met volharding te voltooi. Ons moet die wedloop van ons lewe m.a.w. aflê as ‘n wedloop/lewe vir Christus met ons oog gevestig op ons Leidsman en nie op die aarde en verganklike dinge wat ons so maklik omring en verlei nie. Ons moet onthou dat ons op aarde geplaas is om God te dien – ons is atlete in sy wedloop en daarom moet dit vir ons gaan om sy eer en om Hom diensbaar te wees. Hy is die Leidsman en Voleinder van die geloof en ons moet Hom gedurig in ons wedloop op aarde navolg. Onthou, Hy het die wedloop alreeds voltooi en sit aan die regterhand van God – Hy ken die weg daarheen die beste en daarom kan ons Hom ten volle vertrou om ons op die regte pad te lei. Hy is immers die enigste weg na ewige saligheid.
Dikwels verdwaal ons hier op aarde gedurende ons wedloop en voordat ons onsself kan kry, is ons omring deur die sonde tot so ‘n mate dat ons nie eers meer rondom ons kan sien dat ons op ‘n dwaalweg verkeer nie. Dit is dan wanneer onse Vader ons soms tugtig om ons terug te lei na Hom. Hy straf ons nie omdat Hy ons haat en wil sien seerkry nie, maar allermins wil Hy hê dat ons vir ewig verlore moet gaan en daarom sal Hy ons straf wanneer dit nodig is. Soos wat enige goeie vader sy kind sal tugtig om van hom ‘n gebalanseerde en standvastige volwassene te probeer maak om hom sodoende teen onnodige hartseer as grootmens te spaar. Die tugtiging van die Here lyk gewoonlik midde die omstandighede nie asof Hy vir ons omgee nie en soms wil ons in ons harte vra hoe Hy dan kan toelaat dat só ‘n vernietigende pyn of hartseer my tref? As Hy my regtig liefhet, sal Hy dit mos nie toelaat nie? Ons ken ten dele, maar Hy is die Volmaakte wat alles weet – ook wat goed is vir my en nodig is in my lewe om my fiks te kry/hou vir die wedloop van my lewe waarmee ek besig is. Hy weet hoe ver die afstand is wat ek nog sal moet aflê, Hy weet hoe sterk en gedug die teëstanders sal wees, Hy weet hoe die toeskouers my sal aanmoedig of sal uitjou, maar bo dit alles weet Hy hoe lieflik die prys is wat ek sal ontvang wanneer ek die wedloop met volharding voltooi het en weet Hy ook dat Hy te alle koste wil verhoed dat ek langs die pad uit die wedloop val en daardie groot beloning misloop. . .
Langs hierdie baan waarop ons die wedloop van die lewe loop is daar soveel hindernisse, soveel versoekings. Soms wil ek opgee omdat ek moeg is, maar soms wil ek die verkeerde afdraaipaadjie kies, bloot omdat dit in die omstandighede soveel makliker en selfs beter lyk. Dit is presies wat Esau gedoen het. Net om in sy onmiddellike behoeftes te voorsien, het hy selfs die kosbaarheid van sy eersgeboortereg verag. (Vers 16). Is daar nie baie gelowiges wat ook die genade van Christus verag deur doelbewus na die sonde te haas en daarin te volhard net om hulle onmiddellike sondige begeertes te stil nie? Dit lyk dan asof die goddelose mense altyd gelukkig is en geen sorge het nie, dus is dit vir my nadelig om God te dien, want ek wil ook gelukkig wees. Mag ek dan nie ook net ‘n bietjie gelukkig wees nie? Wel, as jy nie alreeds gevul is met blydskap oor die feit dat jy die ewige lewe as geskenk van Hom ontvang het deur God se genade alleen nie, sal min dinge jou waarlik gelukkig kan maak.
Dit is nie verbasend om te sien hoe dinge elke dag meer onseker raak nie, aangesien die samelewing van ons tyd al verder wegdwaal van God. Hoe verder van Hom af, hoe onsekerder die omgewing. Een ding waarvan elke mens op hierdie aarde seker kan wees, is natuurlik die dood wat op elkeen van ons wag. Dit is daarom belangrik dat ons in ons wedloop hier op aarde sal werk om ons geloof in God onwankelbaar te maak waarmee ons ‘n onwankelbare koninkryk sal beêrwe! Die wenke om te arbei aan hierdie onwankelbare geloof is as volg – dien God welbehaaglik met eerbied en vrees en hou jou oë deurgaans gevestig op die Leidsman en Voleinder van ons geloof, Jesus Christus!