Gedagtes vir elke dag
Of lees almal by Gedagtes vir elke dag
Die vraag kan gevra word of mense nog so selfsugtig in hulle optrede teenoor mekaar sou wees indien hulle volle begrip van hulle status hier op aarde gehad het. Die moderne mens glo dat hy sy eie baas is en daarom kan doen en sê wat hy wil. As ons vir hierdie lewe aan onsself behoort, sal dit ook in die lewe hierna so wees en wát 'n ellendige vooruitsig om tot in ewigheid slaaf van die sonde te wees! Lees weer Rom 14:7 en 8: "Want niemand van ons leef vir homself nie en niemand sterf vir homself nie; want as ons lewe, leef ons tot eer van die Here; en as ons sterwe, sterf ons tot eer van die Here..." Kom ons praat geduldiger met mekaar, en help mekaar vrywilliglik met klein en groot take – tot eer van die HERE!
LOOF DIE HERE!
HOE GOED IS DIT OM DIE HERE TE LOOF!
Hannes Ollewagen
Ps. 92:1-16
“Dit is goed om die Here te loof en tot eer van u Naam te psalmsing, o Allerhoogste, om in die môre u goedertierenheid te verkondig en u getrouheid in die nagte;” (:2&3).
“Hoe groot is u werke, o Here; baie diep is u gedagtes!” (:6).
Die Psalmdigter herinner ons in hierdie gedeelte aan ‘n belangrike saak. Ons word daaraan herinner dat dit nie alleen nodig is om God te loof nie, maar ook dat dit goed is om God te loof.
Ons leef in ‘n land met ‘n goddelose en mens-gerigte grondwet. Die fokus is deurgaans op die mens en daarom sal selfsug en eiewaan in só ‘n samelewing deurentyd toeneem. Die fokus is alleen op dit wat vir mý (volgens eie oordeel) goed is, dit wat vir mý lekker is, dit wat vir mý gerieflik is en dit wat ék wil en sal, ongeag wat die gevolge daarvan op die samelewing rondom my sal wees. Dit is natuurlik glad nie goed nie – nie vir myself of vir diegene rondom my nie.
Wanneer ons in opregtheid die HERE loof, word ons daardeur herinner dat daar ‘n lewende God is voor wie se Aangesig ons as mense leef. Ons hart, siel en gedagtes word op Hom,eerder as net op onsself, gerig. Ons word aan sy Almag herinner. En ons word daaraan herinner dat ons voor Hom sal verskyn om van ons lewe en dade rekenskap te gee. Dit laat ons besin alvorens ons met iets begin. Ons bedink wat die gevolge van ons optrede ook teenoor diegene rondom ons sal wees. Dit is natuurlik goed.
Dit is seker baie logies dat enige mens soveel as moontlik moet probeer doen wat goed is. En as ons leer dat dit goed is om God te loof, is dit seker betaamlik om te sê dat ons God ook so dikwels as moontlik moet loof. Ons lof aan God moenie alleen tot spesiale geleenthede of ons geestelike samekoms wat dalk eenmaal per week plaasvind, beperk word nie. Ons behoort God elke dag van ons lewe te loof.
Ons leer dit uit die voorbeeld van koning Dawid, geliefdes. “Bet. Elke dag wil ek U loof en u Naam prys vir ewig en altyd.” (Ps. 145:2). Luister ook na die woorde uit Ps. 119:164. “Ek loof u sewe maal elke dag oor u regverdige verordeninge.”
Ons leer ook uit die lewe van Daniël met hoeveel getrouheid hierdie man God geloof het. En ‘n baie kosbare les uit Daniël se lewe is dat ons lof aan God ook nie alleen gereserveer is vir tye van voorspoed en wanneer dit vir ons gerieflik is om God te loof nie. Daniël het God met volharding geloof selfs al het dit beteken dat dit hom moontlik sy lewe kon kos. “En net toe Daniël verneem dat die bevelskrif geskrywe was, het hy in sy huis gegaan; en hy het in sy bo-kamer vensters gehad wat oop was in die rigting van Jerusalem, en hy het drie maal op 'n dag op sy knieë geval en gebid en lofprysinge uitgespreek voor sy God, net soos hy tevore gedoen het.” (Dan. 6:11).
Dit is duidelik dat Daniël God altyddeur geloof het net soos wat dit in die geval van Dawid was. “Alef. Ek wil die Here altyd loof; sy lof sal altyddeur in my mond wees.” (Ps. 34:2). Hierdie manne het geweet dit dit goed is om God te loof. En daarom het hulle dit gedoen. Ons behoort hulle goeie voorbeeld na te streef.
Ons lees in Matt. 26 van die laaste Pasga van Christus saam met sy dissipels. En ook hier word die verrigtinge nie afgehandel alvorens daar lof aan God toegebring is nie. “En nadat hulle die lofsang gesing het, het hulle uitgegaan na die Olyfberg.” (Matt. 26:30). Dit is daarom ook gepas dat Paulus dit as ‘n opdrag aan die Efésiërs gegee het om aan God lof toe te bring. “Spreek onder mekaar met psalms en lofsange en geestelike liedere; en sing en psalmsing in julle hart tot eer van die Here,” (Efés. 5:19).
Mag ek en u as God se kinders ook probeer om te doen wat goed is. En mag ons God met opregtheid en getrouheid deurentyd die lof toebring wat Hom alleen toekom!
“…Die lof en die heerlikheid en die wysheid en die danksegging en die eer en die krag en die sterkte aan onse God tot in alle ewigheid! Amen.” (Open. 7:12).