Gedagtes vir elke dag
Of lees almal by Gedagtes vir elke dag
Die groot vraag voor die wit troon sal wees: “Wat het jy met jou lewe gedoen?” Ons sal eerlik moet antwoord want ons staan voor Een wat dwarsdeur ons sien. “Here, U deurgrond en ken my” (Ps.139:1). Ons kan God nie ‘n rat voor die oë draai nie! Alles sal openbaar gemaak word.
Pinkster 2016: DIE BRUIDEGOM IS OP PAD (3)
3. Geen vertraging nie
Mt.25:1-13; 2 Petr.3:1-9
” Maar laat hierdie een ding julle nie ontgaan nie, geliefdes, dat een dag by die Here soos duisend jaar is en duisend jaar soos een dag” (2 Pet.3:8)
Niemand weet die dag en datum wanneer Jesus weer kom nie. Al wat ons weet, is dat Hy reeds oppad is. Petrus vat in die gelese gedeelte alles wat ons oor die eindtyd moet weet in ʼn neutedop saam. Eerstens dat ons alreeds in die eindtyd is.
Dit het met Jesus se eerste koms na die aarde begin. Ons jaartelling bevestig dit. Die mensegeskiedenis word in ʼn vóór-Christus en ʼn ná-Christus tydperk verdeel. Gevolglik is Jesus die snypunt van die geskiedenis. Die Hebreër-briefskrywer skryf: “Nadat God baie keer en op baie maniere in die ou tyd gespreek het… het Hy in hierdie laaste dae tot ons gepreek deur die Seun”(1:1).
Die eerste gelowiges het die wederkoms baie gou verwag. Toe die jare egter verloop en niks gebeur nie, het sommige ernstig begin twyfel of Jesus werklik weer sou kom en of sy uitsprake oor hierdie saak nie miskien anders verstaan moes word nie. Ongelowiges het selfs gespot en gesê: “Waar is die belofte van sy wederkoms?”
Petrus reageer op hulle vraag deur na die verlede terug te kyk en sommer baie ver terug! Hy neem sy lesers terug tot by Noag wat destyds ook onder baie spotters deurgeloop het toe hy vir baie jare lank ʼn reuse boot, honderde kilometers van die naaste see af, op droë land gebou het. In 2 Petr.3:7 raai Petrus sy lesers aan om altyd oor hulle skouer terug te kyk na wat God in die verlede gedoen het. In die tyd van Noag het die spotters hul nie aan Noag se waarskuwings gesteur nie totdat dit op ʼn bepaalde dag sonder ophou begin reën en die mensdom op agt na vergaan het!
Die feit dat Jesus nog nie teruggekeer het nie, beteken nie dat Hy ontrou aan sy belofte is nie. Nee, Hy hou vir altyd sy woord! Daarvoor het Hy, soos met die sondvloed, ʼn dag bepaal waarvan net Hy weet. Die Woord van God roep ons telkens op om meer as ooit Jesus se tweede koms te wagte te wees omdat daardie dag baie nader is as toe Hy die uitsprake gemaak het. Die spotters gaan weer tweede kom!
In 2 Petr.3:8 sê Petrus iets belangriks - God sien tyd baie anders as ons. 1000 jaar is vir Hom soos een dag. Gevolglik moet ons as’t ware ons horlosies met dié van Hom sinchroniseer indien ons die dinge van die eindtyd wil verstaan. Ons moet by Hom aanpas en nie Hy by ons nie. Ons moenie spekuleer oor wanneer Jesus weer gaan kom nie, maar, soos ʼn Noag van ouds, by mense aandring om hulle vir daardie dag gereed te kry soos die Gelykenis van die Tien Maagde dan ook waarsku.
Petrus gee in vers 9 ʼn belangrike rede waarom die wederkoms nog nie plaasgevind het nie. Jesus talm omdat daar nog te veel leë sitplekke aan die feesmaaltafel is. Aan die einde van alle tye wag daar op alle gelowiges ʼn feesmaal. Openbaring is vol daarvan. Al die plekke aan daardie tafel moet gevul word alvorens Jesus weer kom. Een ding moet ons weet: God het nie mense vir die hel gemaak nie, maar vir ʼn hemelse feesmaal. Alvorens hierdie getal nie vol is nie, sal Jesus nie kom nie.
Dan kom Petrus met ʼn verrassing as hy in vers 12 sê dat die wederkomsdatum nie vas en onveranderlik is nie. Gelowiges kan dit deur hul getuienis hetsy verhaas of vertraag. Getuienislewering en gehoorsaamheid aan God bring die wederkomsdatum as’t ware nader. Hoe meer mense tot bekering kom, hoe gouer word die sitplekke vol en kan die fees begin.
Hierdie waarheid roep elke gelowige tot volgehoue, ernstige getuienislewering op. Ons kan die feesmaal vol en die tyd korter praat. Die eindtyd rus eintlik op twee pilare – die eerste een is Jesus se hemelvaart en die tweede sy wederkoms. Deur ons getuienislewering en bekerings skuif hierdie twee pilare al hoe nader aan mekaar. Hoe lakser ons is, hoe verder skuif hul van mekaar af weg.
In vers 13 sê Petrus dat gelowiges op pad na hul ewige adres is; dié van die feessaal in die hoofstraat van die nuwe Jerusalem. Dis die Vaderhuis waarvan Christus in Joh.14 praat. So ʼn heerlike vooruitsig behoort gelowiges opgewonde te maak. Ons kan amper nie wag dat dit moet aanbreek nie! Gelukkig is die uurglas besig om te sak al is dit korreltjie vir korreltjie.
Ons het nou gehoor wat mense oor Jesus se wederkoms sê, maar wat sê Hy self daaroor? In Matt 24 vra die dissipels van Hom ʼn aanduiding oor hoe ver die wederkoms in die toekoms lê. Jesus noem geen datum nie, maar sê net dat die tydperk net voor die wederkoms deur onaangename gebeure wat ʼn verskriklike impak op die mensdom gaan hê, gekenmerk sal word. Dis ook nie net tot een geslag beperk nie, maar sal herhaaldelik oor die hele wêreld voorkom totdat Hy op die wolke kom. In hierdie tyd sal gelowiges weereens besef dat hulle slegs pelgrims op die aarde is.
Jesus waarsku dat sekere bose mense na vore sal kom en daarop aanspraak maak dat hulle die beloofde Messias is. Hulle gaan baie mense verlei en duisende volgelinge werf. Verder sê Jesus dat sy koms so groot en omvangryk sal wees dat almal oor die wêreld heen dit oombliklik sal sien. Ek lees onlangs van ʼn ontspoorde teoloog wat Jesus se belofte betwyfel. Hy sê, omdat die aarde nie plat nie maar rond is, dit nie vir Jesus moontlik sal wees om op een tydstip gesien te word nie.
Hy het al te duidelik met God se skepping ʼn probleem. Het God dan nie die aarde uit niks geskep nie? Wat kan wonderliker as dit wees? Indien dit vir Hom moontlik was om die aarde uit niks te skep, waarom sal dit nie vir Hom moontlik wees om sy Seun so te laat verskyn dat elke aardbewoner dit op die selfde tydstip kan sien nie?
Wat moet ons wat na Jesus se wederkoms uitsien intussentyd doen? Moet ons maar sommetjies maak en oor die dag en datum spekuleer? Nee, ons moet op ons pos wees en geduldig op ons hemelse bruidegom wag. Ons mag nie soos die vyf dwase maagde wat ook op die bruidegom se koms gewag het, maar nie gereed was nie, onkant betrap word. Ons moet eerder soos die vyf verstandige maagde aktief op Jesus wag, want dan sal ons aan die einde hoor: “Mooi so, goeie en getroue dienskneg, oor weinig was jy getrou, oor veel sal Ek jou aanstel. Gaan in in die vreugde van jou heer” (Matt.25:21).